Nën kujdesin e Presidentit të Republikës, Sh. T. Z. Ilir Meta në Institucionin e Kreut të Shtetit u organizua sot një veprimtari përkujtimore dhe kulturore, me rastin e 5-vjetorit të shenjtërimit të bamirëses shqiptare të vlerësuar nga mbarë bota për jetën dhe veprën e saj frymëzuese e të pashembullt, Shën Nënë Tereza.
Në fjalën e Tij përshëndetëse drejtuar të udhëheqësve të komuniteteve fetare në vendin tonë, ambasadorëve të Kosovës dhe Selisë së Shenjtë, përfaqësuesve të Trupit Diplomatik, motrave të Urdhrit të Nënë Terezës, studiuesve, historianëve, diplomatëve dhe artistëve të pranishëm, Presidenti i Republikës u shpreh:
“Pesëvjetori i kremtimit të shenjtërimit të Nënë Terezës është një ditë e shënuar për mbarë njerëzimin dhe për kombin tonë.
Është dita e përkujtimit dhe respektit ndaj veprës së paharruar dhe të ndritur, njerëzore dhe hyjnore, shembullit të jashtëzakonshëm të dashurisë, që u shpalos në shërbimin e vazhdueshëm të Shën Nënë Terezës ndaj njerëzve më të varfër e më të braktisur të botës, pa dallim feje, race, kombësie apo përkatësie shoqërore.
Shën Nënë Tereza është dhe do mbetet gjithmonë një shembull i jashtëzakonshëm i misionit të bamirësisë, simbol i nënës dhe i motrës shqiptare, dhe i misionit të pareshtur të përkujdesjes ndaj të vuajturve dhe atyre që kanë nevojë më shumë për ndihmë, solidaritet dhe përfshirje sociale.
Me madhështinë e thjeshtësisë së saj, me dashurinë e madhe që dha pa kursyer, ajo është frymëzimi që na nxit çdo ditë për të bërë gjëra të vogla me dashuri të madhe.
Ashtu siç na porositi e Shenjtorja Nënë Terezë: ‘Dashuria s’mund të mbetet vetëm. Dashuria duhet të vihet në veprim dhe ky veprim është shërbimi. E djeshmja iku. E nesërmja nuk ka ardhur. Ne kemi vetëm të tashmen. Le të fillojmë!’
Ndaj mesazhi i saj duhet vënë në veprim në çdo kohë, nga çdo njeri, dhe nga çdo qeverisje, për të hartuar e vënë në zbatim politika më sociale, që sjellin ndihmë reale ndaj shtresave më në nevojë, për të sëmurët, të pastrehët, jetimët, të moshuarit dhe të pambrojturit.
“Nënë Tereza e kaloi jetën e saj duke u përkulur para atyre që ishin të vuajtur, të braktisur e të lënë të vdisnin në anë të rrugës, duke parë tek ata njerëz dinjitetin e tyre të dhënë nga Zoti,’ – tha Shenjtëria e Tij, Papë Françesku, në ceremoninë e shenjtërimit të Saj, ‘Ajo e ngriti zërin edhe para fuqive të botës, në mënyrë që ata të njohin fajet e tyre, për krimet e varfërisë, që ata vetë krijuan përmes egoizmit.’
Lufta ndaj varfërisë dhe vuajtjes së njerëzve të thjeshtë, dhe beteja për sigurimin e një kujdesi sa më të mirë jetik dhe shëndetësor, duhet të jetë një mision dhe prioritet i çdo qeverisje apo politike. Shën Nënë Tereza na tregoi se çdo gjë është e mundur kur përulesh me dashuri dhe respekt para dinjitetit njerëzor.
Ajo ishte një grua me shtat e fytyrë të imtë, por me një forcë, besim dhe dashuri të madhe, duke prekur zemrën e mbarë botës.
Kongregata e saj ka sot mbi 4 mijë motra Misionare të Dashurisë, të pranishme në 730 misione, të përhapura në 123 vende të ndryshme të botës.
Edhe në Shqipëri ka shumë qendra bamirësie, misione dhe organizata që shërbejnë nën shembullin e Shën Nënë Terezës, të cilat dëshiroj t’i falënderoj për punën dhe shërbimin e tyre të vyer!
Sikurse shpreh mirënjohje të thellë për të gjitha bashkësitë fetare në vendin tonë, të cilat kanë qenë vazhdimisht të angazhuara në shërbim të shtresave në nevojë.
Falënderoj edhe krerët e besimeve në vendin tonë, të cilët kanë apeluar pa reshtur ndaj qeverisjes, shoqërisë dhe individëve për një përkujdesje më të madhe ndaj të varfërve dhe të pambrojturve!
Shën Nënë Tereza u nderua me Çmimin Nobel për Paqen, kreu mrekulli duke shëruar të sëmurë, u kremtua në shenjtëri, por mrekullia më e madhe është shembulli i përjetshëm, që ajo iu dha të gjitha brezave dhe mbarë njerëzimit, për t’u kujdesur për më të varfrit, më të vuajturit dhe shtresat më vulnerabël të shoqërisë.
‘Shën Tereza është Nëna e Madhe e Botës, por ne krenohemi edhe më shumë me të, sepse ajo është Nëna e Shqiptarëve.
Ajo ishte e do njihet gjithmonë si Nëna dhe Shenjtorja Shqiptare.”
Me rastin e kësaj ditë të shënuar, kam nderin t’i akordoj dekoratën ‘Nënë Tereza’ një intelektuali dhe personaliteti të shquar të letrave shqipe, Profesorit të nderuar Anton Nikë Berisha.
Prof. Berisha është një prej shkrimtarëve dhe studiuesve më produktiv dhe më cilësor në të gjithë hapësirën shqiptare, në të gjitha vendet ku jetojnë, veprojnë dhe krijojnë shqiptarët, që nga Kosova, Shqipëria, Arbëreshët në Itali, dhe më gjerë.
Përveç kontributit të jashtëzakonshëm në studimet dhe letrat shqipe të mishëruara në dhjetëra vepra, Prof. Dr. Anton Nikë Berisha ka treguar një angazhim të pashoq edhe me shkrimet dhe botimet e tij mbi jetën dhe shërbesën e Shenjtores sonë, Nënë Tereza.
Janë mbi 15 tituj librash studimorë dhe në zhanrin e romanit, poezisë, dramës, dhe të natyrës përshkruese dhe interpretuese, ku pena e tij shpalos shpirtin e madh dhe figurën frymëzuese të shenjtores shqiptare.
Si rrallëkush tjetër, Profesor Berisha, në kompletin e veprave të tij, ngre për Shën Nënë Terezën jo vetëm monumentin njerëzor, por edhe atë letrar dhe artistik.
Me penën e tij ai ka shpalosur respektin njerëzor e shpirtëror ndaj Saj por edhe ndaj kombit të origjinës të cilit i takon.
Në veprën e tij ‘Doracak për Nënën Terezë’ ai na kujton se ‘shenjtorët kanë si detyrë kryesore t’u ofrojnë njerëzve dritën hyjnore dhe t’u hapin shtigjet e mirësisë e të përvuajtjes në jetën reale, e jo të jetojnë për kënaqësinë e tyre vetjake,’ duke dhënë kështu mesazhin, që e gjithë shoqëria jonë të mos jetë egoiste, por të angazhohet të hapë shtigjet e mirësisë ndaj njerëzve të vuajtur dhe në nevojë.
Ndaj vlerësimi i sotëm për Prof. Dr. Anton Nikë Berisha vjen në mirënjohje të punës së tij mbi 50-vjeçare, në fushën e studimeve dhe botimeve të figurave dhe personaliteteve të shquara të shkencës dhe kulturës shqiptare, veçanërisht në studimin dhe publikimin e botës dhe kulturës arbëreshe.
Dhe, për përkushtimin e tij krijues e studimor për figurën e madhe të kombit shqiptar dhe të njerëzimit, Shenjtoren Nënë Tereza.
Personalitete të tilla të letrave janë frymëzim edhe për studiuesit e rinj, të cilët i nxis të hulumtojnë sa më shumë mbi figurat e çmuara të kombit tonë. Sa më shumë të mësojmë prej tyre aq më e mirë do bëhet shoqëria jonë.
“Fryti i dashurisë është shërbimi, që është dhembshuria në veprim,’ tha Shën Nënë Tereza, ndaj të gjithë duhet të shërbejnë në fushën e tyre dhe në profesionin e tyre, e mbi të gjitha të tregojmë respektin individual, për integritetin njerëzor, e kështu do ndërtojmë një Shqipëri më të mirë dhe do kemi breza dhe një shoqëri më të dashur, më tolerante dhe më humane.” – theksoi Presidenti Meta.
Kreu i Shtetit shqiptar çmoi veprën e shkrimtarit, profesorit dhe studiuesit nga Kosova, Anton Nikë Berisha me Dekoratën “Nënë Tereza”: “Në shenjë vlerësimi të punës 50-vjeçare në fushën e studimeve dhe botimeve të figurave e të personaliteteve të shquara të shkencës dhe kulturës shqiptare, veçanërisht të atyre të botës e të kulturës arbëreshe. Me mirënjohje për përkushtimin e tij profesional dhe atdhetar si krijues dhe studiues për figurën e madhe të kombit shqiptar e të mbarë njerëzimit: Shën Nënë Terezës. Gjithashtu për njohjen e thellë dhe pasqyrimin realist të jetës dhe veprës së Shenjtores së shtrenjtë shqiptare, duke iu mundësuar studiuesve të tashëm si dhe atyre të ardhshëm, studimin sa më të imtësishëm e të saktë historikisht të figurës së Shën Nënë Terezës, si një prej personaliteteve më të shquara botërore të shekullit të njëzetë.”
Gjatë veprimtarisë, të pranishmit ndoqën një dokumentar mbi Shën Nënë Terezën, fjalimet e ambasadorëve Avni Spahiu dhe Dashnor Dervishi, recitime me thëniet e bamirëses shqiptare nga aktoret e mirënjohura Roza Anagnosti dhe Rozi Kostani si dhe vizituan stendat me libra të Prof. Dr. Anton Nikë Berishës.
