Kryeministri Edi Rama deklaroi sot në Kuvend se “nëse Partia Demokratike do të bëjë zgjedhjen që të drejtohet nga një ‘i vdekur’ (Sali Berisha), ne me PD-në do të ndërpresim çdo marrëdhënie”.
Duke iu drejtuar deputetëve të opozitës nga foltorja e Kuvendit, Rama tha se “gjithsesi këtu jeni deputetë të zgjedhur, edhe pse ata që ju zgjodhën nuk e dinin që do t’ja punonit kështu”.
“Por ju jeni këtu dhe jeni fakt dhe realitet. Ne do ta bëjmë këtë përpjekje, por dy gjëra duhet të jenë shumë të qarta: e para, me Saliun nuk kemi punë. Saliu për ne është i vdekur, kuptohet politikisht dhe institucionalisht, jo biologjikisht. Biologjikisht, sinqerisht, ne i urojmë jetë të gjatë. Por me të vdekurin që e keni në mes të shtëpisë dhe nuk dini çfarë t’i bëni, ne mos na ngatërroni”, tha Rama.
Kryeministri shtoi se “ne nuk e zgjedhim se kush e drejton grupin parlamentar dhe PD-në, por nëse ju do të bëni zgjedhjen të drejtoheni nga një ‘i vdekur’, ne me PD-në do të ndërpresim çdo marrëdhënie”.
“E rëndë, e lehtë, këtë e gjykoni ju. Për ju nuk ka gjë më të rëndë, se ju e keni kaluar ylberin. Kur një grup njerëzish bindin veten që një i vdekur është i gjallë dhe bindin edhe popullin për këtë, ata janë për t’u mëshiruar. E rëndë, e lehtë, kjo nuk ka rëndësi fare për ne. Nëse ju do të keni Saliun në krye është zgjedhja juaj. Unë nuk po merrem me të, po merrem me ju, se ju jeni këtu dhe duke qenë se ju jeni këtu, ne me ju komunikojmë dhe ndërveprojmë dhe për këtë proces, për të cilin po flasim, dhe duam ta bëjmë duke u konsultuar edhe me ju”, tha Rama.
Rama tha se “ne nuk i zgjedhim kundërshtarët, kjo nuk diskutohet, por me të vdekurit nuk bashkëpunojmë dhe kjo nuk diskutohet”.
“Ka të vdekur që janë gjallë që i kemi yje që na udhëheqin në rrugën tonë të jetës, sepse janë të pavdekshëm. Ka të gjallë që janë të vdekur. Një pjesë e tyre janë të vetëdijshëm dhe tërhiqen në perëndimin e tyre fiziologjik dhe kryejnë ritualin e të jetuarit me njerëzit e tyre, ashtu sikurse ka disa të tjerë që nuk janë të vetëdijshëm që kanë vdekur. Por nuk u vihet faj atyre, përgjegjësia është e atyre që mendojnë se janë gjallë dhe kërkojnë të bindin njerëzit për këtë”, tha Rama.
Duke iu drejtuar deputetëve të opozitës, Rama tha se “është e drejta juaj të zgjidhni të vdekurin për t’ju prirë, por ne kemi të drejtë të refuzojmë çdo komunikim me të vdekurit, me të gjallët që janë të vdekur dhe kutërbojnë në mes të skenës politike”.
Rama tha se “është e vërtetë që ndryshimet kushtetuese u bënë në 2008-ën, pikërisht për të shmangur atë që mund të ndodhte sot, që një i vdekur të merrte peng gjithë dynjanë”.
“Për të shmangur këtë dhe atë që ndodhi në 2007-ën, një tjetër skandal në pikëpamje të frymës, ne bëmë atë që bëjnë të gjitha republikat parlamentare në Itali, Greqi, Gjermani. Ndaj në 3 raundet e para kërkohet konsensus”, tha Rama.
Kryeministri shtoi se “në 3 raundet e para ne do të synojmë një president që të marrë edhe vota të opozitës, në mos të gjitha, një pjesë”.
Rama kërkoi që deputetët e opozitës ta respektojnë këtë proces.
“Tani jeni bërë si Ambasada amerikane këtu në Tiranë, ju caktoni se kush duhet të rrijë, kush duhet të ikë dhe merrni edhe raportin e DASH sikur e keni nxjerrë ju. Është thjesht qesharake që ju flisni sikur ju jeni me imunitet diplomatik nga Ambasada amerikane dhe vini na bëni leksione. Kapuni pas flamurit të PD-së dhe mundohuni ta ngrini se e keni bërë si ato çarçafët e shtëpive të qejfit që nuk dihet kush i tund e kush i shkund, se flamurin e Amerikës ka kush e tund, e tundin amerikanët. Mos na e qani hallin ne, as për marrëdhëniet me Amerikën, as me Europën dhe as me shqiptarët. Janë 3 marrëdhënie që për fat të keq të këtij vendi dhe për shkakun tuaj, janë ekskluzive tonat, na e keni lënë ju. Lojërat e brendshme me flamur amerikan ju bëjnë vetëm qesharakë”, tha Rama.
Sa për standardin, vijoi ai, “kur t’i vini gishtin këtu një deputeti që është siç është i shtrirë aty në mes të shtëpisë i vdekuri juaj (Sali Berisha), atëherë flasim për standard”.
“Jemi parti të lira dhe gjykojmë njeriun. Gjykojmë drejtpërdrejt rolin e secilit dhe nuk merremi me familjen, fisin, farën. Nuk është kjo puna jonë dhe nuk na konkurroni dot as në këtë pikë. Ju ishit ata që nxorët 5 mijë veta në 2 mijë karrige. Si me të vdekurin, si pa të vdekurin, ne nuk na mundni dot, sepse ju jetoni në mohim, nuk shihni realitetin. Kur i vdekuri del ju udhëheq dhe ju thotë unë jam gjallë ka vdekur Amerika, kjo është edhe më keq se numërimi mbrapsht. Kam dëgjuar që po i bashkoheni si zogjtë e korbit, një nga një, bëjeni, por do bëheni qesharakë. Ne këtu nuk jemi për partitë tona, partitë tona janë për vendin tonë dhe ju jeni pjesë e vendit tonë. Mos ia lini Shqipërisë gurin në qafë me të lyer bardhë e blu”, shtoi ai./ata
