Kryeministri Edi Rama reagoi sot pas deklaratës së zëdhënësit të Departamentit të Shtetit, Matthew Miller për lirimin e tre policëve të Kosovës.
Në një reagim në rrjetet sociale, Rama theksoi se, “sa më shumë mbahen në Serbi këta tre burra që edhe sikur ta kenë shkelur vijën e kufirit s’kanë kryer asnjë krim, aq më pak do jetë e mundur që marrëdhëniet tona bilaterale të mos bëjnë shumë hapa mbrapa. Kjo do jetë java e rikthimit të akullit mes nesh nëse ata nuk lirohen. Nga ana tjetër nëse de-eskalimi nuk ndodh e humbura e madhe do të jetë Kosova, sepse Serbia mbase nuk jeton dot pa u riizoluar”, nënvizoi Rama.
Rama gjithashtu i bëri apel sot kryeministrit të Kosovës që të dalë nga guaska e vetizolimit dhe të mos e humbë Veriun duke parë kudo armiq e tradhtarë.
“Nga ana tjetër nëse de-eskalimi nuk ndodh e humbura e madhe do të jetë Kosova – sepse Serbia mbase nuk jeton dot pa u riizoluar! Druaj shumë se sa më shumë Albini këmbëngul në të tijën kundër aleatëve, aq më shumë situata mund të agravohet, duke rikthyer KFOR-in në krye të punës! E atëherë lamtumirë për kushedi sa kohë edhe kontrollit formal të shtetit mbi krejt territorin dhe ta gëzojmë një Republikë të KFOR-it në Veriun e Kosovës! Albin, dil nga guaska e vetizolimit dhe mos e humb Veriun duke parë kudo armiq e tradhtarë! Koha është tani dhe po fluturon!”, shkroi Rama.
Tre zyrtarë kufitarë të Kosovës u rrëmbyen në 14 qershor nga forcat serbe gjatë një patrullimi në vijën kufitare në veri të Kosovës. Njësia policore ka qenë duke patrulluar thellë brenda territorit të Kosovës për të parandaluar shfrytëzimin e rrugëve ilegale. Për tre policët e Kosovës Gjykata e Lartë në Kralevë vendosi më 16 qershor masën e paraburgimit.
