Nga Nertil JOLE
E lexova me interes dokumentin BESA që Kryeministri Rama prezantoi në mbledhjen e zgjeruar të grupit parlamentar të PS.
Një manifest i shkruar me gjuhë të thjeshtë, që më riktheu te parimet e llogaridhënies dhe transparencës në politikë, të cilat pata mundësi t’i njoh gjatë qëndrimit për studime në Britani. Pikërisht për këtë, besoj se sfida e vërtetë mbetet zbatimi i tyre në realitetin tonë.
Kontrata e besimit mes mazhorancës qeverisëse dhe qytetarëve mbështetet jo vetëm te rezultati i zgjedhjeve parlamentare, por në mënyrë të vazhdueshme edhe te respektimi i vlerave shoqërore e demokratike, ku bëjnë pjesë edhe ato tradicionalisht shqiptare. Njëra prej tyre është padyshim BESA.
Jam ndër ata që mendojnë se simbolika e këtij virtyti unik të shqiptarëve është një gjetje me përmbajtje, si shprehje e një reflektimi politik përballë situatës së re sociale në vend, e cila në vetvete është pasqyrë e demokracisë shqiptare.
Nëse do t’i referohesha Korçës dhe trevës së saj, një realitet që e njoh nga afër, do të thosha se pikërisht aty ku qytetaria, kultura dhe fjala e mbajtur kanë qenë gjithmonë vlera themelore, BESA me njerëzit e zakonshëm, në jo pak raste, është thyer. Jo nga qytetarët, por nga sjellje shpeshherë deri arkaike të atyre që kanë pasur përgjegjësi publike dhe që kanë cenuar tabanin e qytetarisë korçare, e cila në thelbin e saj mbështetet te kultura, urtësia dhe modeli i punës.
Është e pamohueshme që Kryeministri Rama ka pasur një vëmendje prioritare për juglindjen përgjatë 13 viteve të qeverisjes, por është fatkeqësisht e vërtetë edhe se besimi i tij te pushteti i deleguar është keqpërdorur në jo pak raste. Dhe jo sepse Kryeministri nuk ka kulturën të besojë e të delegojë me të drejtë përgjegjësi, por sepse përfituesit e atij besimi nuk kanë dëshmuar gjithmonë kulturën për të mos harruar se suksesi nuk është ekskluziv i askujt, por produkt i bashkimit të vullneteve, i dëshirës për më mirë dhe i besimit se kjo është e mundur.
Ky nuk është një realitet që i përket vetëm Korçës. Faza e re në të cilën ka hyrë vendi kërkon një pakt të ri funksionimi, atë të kontributeve sa më gjithëpërfshirëse dhe garantimit të meritokracisë. Kërkon një solidaritet të ri përpjekjesh për realizimin e projektit tonë kombëtar, integrimin në Bashkimin Europian. Ky prioritet është arsye e fortë për të forcuar urat tona të komunikimit dhe ndërveprimit, jo thjesht për ta përmbushur formalisht këtë objektiv, por për ta kthyer atë në mirëqenie të prekshme për çdo kategori të shoqërisë.
Partia Socialiste mbetet forca më progresiste për Shqipërinë dhe ka gjithë potencialin për të mos rrezikuar të ardhmen e saj. Është koha që pritshmëritë e qytetarëve t’i vendosim në një peshore realiste me fuqinë që bartim brenda familjes sonë politike, por edhe në spektrin më të gjerë shoqëror e politik, për të realizuar një reformim cilësor.
“Flamingo Mirror” është testi që duhet të kalojë gjithkush që, në jo pak raste, e ka menduar veten të pazëvendësueshëm në një pozicion me rëndësi publike. Sepse BESA nuk matet me fjalët që shpallim, por me përgjegjësinë për ta mbajtur atë çdo ditë.
© 2026 Argumentum
