Plenumi i 4-t i Komitetit të 20-të Qendror të Partisë Komuniste të Kinës ka tërhequr këto ditë vëmendje ndërkombëtare. Strategjia për “nxitjen e pavarësisë dhe vetëmbështetjes shkencore e teknologjike të nivelit të lartë dhe zhvillimin e forcave të reja prodhuese cilësore” gjatë periudhës së Planit të 15-të Pesëvjeçar ka sjellë diskutime të shumta në mediat e huaja. Shumë media ndërkombëtare komentojnë se ky plenum tregon që Kina i kushton rëndësi zhvillimit me cilësi të lartë dhe rolit kyç të shkencës e teknologjisë në krijimin e forcave të reja prodhuese cilësore, duke ofruar gjithashtu drejtim të ri për zhvillimin global.
Nga aspekti global, revolucioni i ri teknologjik dhe transformimi industrial po ecin me ritme të shpejta, ndërsa proteksionizmi e ngadalësimi i zhvillimit ekonomik po krijojnë sfida të reja. Vendet po kërkojnë burime të reja rritjeje. Nga aspekti i brendshëm, në pesë vjetët e fundit Kina ka mbi 500 mijë ndërmarrje të teknologjisë së lartë dhe 26 nga 100 qendrat më të mëdha të inovacionit në botë, duke u renditur e para në botë. Inovacioni është bërë motor kryesor i zhvillimit ekonomik. Mënyra se si të shfrytëzohet mundësia historike për të zhvilluar forcat e reja prodhuese cilësore është bërë një temë e pashmangshme në planin e 15-të pesëvjeçar.
Dokumenti i miratuar në plenum përcakton qartë drejtimet kryesore, që janë forcimi i inovacionit origjinal dhe teknologjive thelbësore, thellimi i integrimit mes inovacionit shkencor e atij industrial, si edhe përparimi i ndërtimit të një “Kine digjitale”. Këto masa tregojnë që zhvillimi i forcave të reja prodhuese cilësore lidhet ngushtë me inovacionin teknologjik, përmirësimin industrial dhe transformimin e gjelbër, duke nxitur zhvillimin me cilësi të lartë të Kinës dhe duke i sjellë energji të re dhe mundësi të reja botës, komenton Grupi Mediatik i Kinës.
Foto nga VCG
Kina, me një popullsi prej mbi 1.4 miliard banorësh dhe më shumë se 400 milionë konsumatorë me të ardhura të mesme, përbën një treg të rrallë dhe të madh në botë. Në pesë vjetët e ardhshëm, Kina do të përdorë teknologjitë digjitale dhe inteligjente për të transformuar industritë tradicionale, do të zhvillojë sektorët e rinj, si inteligjenca artificiale dhe teknologjitë e reja të informacionit, si edhe do të projektojë zhvillimin në fushat e së ardhmes, si teknologjitë kuantike dhe bioteknologjia. Këto do ta shndërrojnë tregun e vet në një hapësirë për testimin e aplikimin e risive dhe përfitimin global prej tyre.
Foto nga VCG
Më e rëndësishmja, forcat e reja prodhuese cilësore nuk do të jenë vetëm motor i ekonomisë kineze, por një forcë e re nxitëse për ekonominë botërore, vijon komenti i CMG-së. Si nyjë e rëndësishme në zinxhirët globalë të industrisë dhe furnizimit, zhvillimi i forcave të reja prodhuese cilësore gjatë periudhës së Planit të 15-të Pesëvjeçar do të krijojë më shumë mundësi bashkëpunimi ndërkombëtar dhe do t’i shtyjë vendet e tjera drejt transformimit digjital, inteligjent dhe të gjelbër.
Sipas mediave ndërkombëtare, Kina po rrit forcat e saj prodhuese nëpërmjet përparimeve teknologjike dhe risive. Nga Plani i 14-të Pesëvjeçar te Plani i 15-të Pesëvjeçar e vizioni për vitin 2035, Kina po tregon vendosmëri për të hartuar e zbatuar planet afatgjata. Me energji të re e të qëndrueshme, modernizimi i stilit kinez do të ecë me siguri përpara, duke i dhënë ekonomisë botërore më shumë gjallëri, mbyllet komenti i CMG-së./CGTN
