Andre Ivanji- Vreme[i]
Të mërkurën në mbrëmje në Beograd, Novi Sad, Nish, Krushevac, Smederevë, Uzhice, Çaçak, Pançevo, Llazarevac, Vrbas… u zhvilluan protesta me ftesë të studentëve. Nata u shenjua nga përplasje të demonstruesve me pasuesit e Partisë Përparimtare serbe (PPS), grupe burrash të cilët përparimtarët i angazhuan të forcojnë radhët e tyre si edhe me njësitë speciale të policisë. Konfliktet mes atyre që kërkojnë shtetin e së drejtës dhe atyre që mbrojnë sundimin e Aleksandër Vuçiçit dhe të PPS-së kanë hyrë në një fazë të re. Një ditë më vonë mund të nxirren gjashtë konkluzone.
I pari Është e vërtetë lakuriqe se tashmë bëhet fjalë për konfrontimin e partisë e cila i ka hipur në shpinë shtetit dhe qytetarëve që duan t’a largojnë nga pushteti, jo si kryetar shteti, por si udhëheqës i PPS-së i cili njësive partiake u ka ndezur dritën e gjelbër që të rrihen me kundërshtarët e tyre.
I dyti Xhandarmëria, Brigada policore dhe Njësia policore për ndërhyrje nuk kanë kapacitete për të siguruar rendin dhe qetësinë në momentin kur protestat zhvillohen njëkohësisht në shumë vende në Serbi, në qytetet më të mëdha dhe në shumë lokalitete. Për shkak të mungesës së forcave njerzore janë të detyruar të nxjerrin shkopinjtë dhe të godasin qytetarët, kur marrin urdhër për t’i larguar, me shpresën se ata do të ikin me vrap. Sikur të kishin rezistencë nga ana e njerëzve që protestojnë, nuk do të ishin nbë gjendje t’i shtynin. Kjo ishte e dukshme në rrugën Kralj Millan dhe atë Nemanjina në Beograd.
I treti Nëse gjatë natës, në mesin e muajit gusht, u organizuan protesta të këtilla me një numur kaq të madhe njerëzish, shtrohet pyetja çfarë do të bëhet në shtator kur protestat të planifikohen më përpara dhe qytetarët të kthehen nga pushimet verore.
I katërti Nuk ka më hapësirë për dialog mes qytetarëve të rervoltuar dhe atyre që e sundojnë Serbinë. Kufiri është kapërcyer në momentin kur në skenë kanë hyrë haptazi formacionet paramilitare të PPS-së nën mbrojtjen e policisë.
I pesti Në pjesën e revoltuar të shoqërisë është zhdukur frika dhe i’a ka lënë vendin zemërimit. Përshkallëzimi i dhunës qëndron pezull në ajër dhe ka më shumë gjasa se qetësimi i situatës.
I gjashti Me gjithë vetëpërmbajtjen e liderve perëndimorë, skena si ato që shenjuan Serbinë të martën dhe të mërkurën nuk mund të injorohen. Është e dukshme qartë se Vuçiçit po i rrëshqet pushteti nën këmbë, se nuk është më ai udhëheqësi i madh dhe i dashur në një vend demokratik që mban gjtihçka nën kontroll, sikurse paraqitet, por autokrat që po shëndërrohet në Llukashenko i cili edhe pas nëntë muajsh nuk është në gjendje t’ia dalë mbanë me pjesën e revoltuar të shoqërisë.
[i] https://vreme.com/razno/nova-faza-protesta-sest-zakljucaka/
/Përktheu për Argumentum Xhelal FEJZA
