I dërguari presidencial i Shteteve të Bashkuara për Partneritetet Globale, Paolo Zampolli, u bashkua të hënën me krerët e komuniteteve fetare në Shqipëri në Selinë Botërore të Kryegjyshatës Bektashiane, në një ceremoni kushtuar Nënë Terezës dhe 35-vjetorit të rihapjes së Selisë në Tiranë.
Selia Botërore e Bektashinjve u rihap në vitin 1991, në përfundim të një periudhe kur Shqipëria kishte ndaluar tërësisht ushtrimin e fesë.
Në ceremoni morën pjesë Kryegjyshi Botëror i Bektashinjve, Haxhi Dede Edmond Brahimaj, i njohur si Baba Mondi; Kryetari i Komunitetit Mysliman të Shqipërisë, Haxhi Bujar Spahiu; Kryepeshkopi i Tiranës, Durrësit dhe gjithë Shqipërisë, Fortlumturia e Tij Joani; Arqipeshkvi Metropolitan i Tiranës-Durrësit, Arjan Dodaj; si dhe Presidenti i Vëllazërisë Ungjillore të Shqipërisë, Erion Sylari.
“Nënë Tereza i tregoi botës se sa larg mund të arrijë një zemër shqiptare”, deklaroi Paolo Zampolli.
“Presidenti Trump e ka bërë mbrojtjen e besimit një prioritet dhe, nën drejtimin e tij dhe të Sekretarit Rubio, jam krenar të festoj këtë frymë këtu. Baba Mondi bashkon njerëz të besimeve të ndryshme për t’u shërbyer të tjerëve. Mikpritja e Shqipërisë është e famshme. Bujaria e shpirtit të saj meriton të njihet po aq”, shtoi ai.
Shqipëria e përkujton çdo vit më 5 shtator shenjtërimin e Nënë Terezës. E lindur Anjezë Gonxhe Bojaxhiu në një familje shqiptare në Shkup dhe e njohur për veprimtarinë e saj humanitare në Kalkutë, Nënë Tereza është një figurë që nderohet nga komunitetet e ndryshme fetare në Shqipëri.
Ceremonia u zhvillua në mjediset e Kryegjyshatës Bektashiane, si një simbol i bashkëjetesës fetare dhe tolerancës që karakterizon vendin.
“Nënë Tereza nuk i përkiste asnjë komuniteti të vetëm. Ajo u përkiste të sëmurëve dhe të braktisurve dhe për këtë arsye ne e nderojmë në këtë shtëpi”, u shpreh Baba Mondi.
“Dera jonë ka qëndruar e hapur për të krishterët dhe hebrenjtë për tetë shekuj, jo si një gjest politik, por si një detyrim i besimit. Jemi të lumtur të mirëpresim miqtë tanë amerikanë përmes së njëjtës derë”, shtoi ai.
Partneritet amerikan për trajtimin e kancerit
Pas ceremonisë, Zampolli vizitoi Spitalin Continental, i cili funksionon brenda kompleksit të Kryegjyshatës Bektashiane, ku u njoftua edhe një marrëveshje e re në fushën e trajtimit të kancerit.
Kryegjyshata Bektashiane ka nënshkruar një memorandum mirëkuptimi me kompaninë amerikane ImmunityBio, Inc. (Nasdaq: IBRX). Marrëveshja u bë publike përmes një videomesazhi të presidentit dhe drejtorit ekzekutiv të kompanisë, Richard Adcock, i cili iu drejtua të pranishmëve në spital.
“Vetëm pak çaste më parë, nënshkruam një memorandum mirëkuptimi me Urdhrin Bektashi dhe shtetin e ardhshëm mikroshtet Bektashi. Nuk mund të isha më i emocionuar për ta ndarë këtë lajm me popullin e Shqipërisë”, deklaroi Adcock.
ImmunityBio është themeluar nga mjeku, shkencëtari dhe sipërmarrësi Patrick Soon-Shiong, i cili shërben si kryetar ekzekutiv i kompanisë.
Partneri i dytë i marrëveshjes është Epitopoietic Research Corporation (ERC-Belgium S.A.), kompani biofarmaceutike në fazën klinike, e drejtuar nga themeluesi dhe drejtori ekzekutiv Apostolos Stathopoulos, MD, PhD.
Terapia kryesore e kompanisë për glioblastomën, GLIOVAC (ERC-1671), ka përfunduar një studim të Fazës II dhe ka marrë përcaktimin Fast Track nga Administrata Amerikane e Ushqimit dhe Barnave (FDA).
Bashkëpunimi me partnerët parashikohet të zhvillohet në kuadër të një “Charter for Universal Healing”, ndërsa sipas njoftimit pritet që në këtë konsorcium të përfshihen edhe kompani të tjera të fushës së mjekësisë dhe bioteknologjisë.
Adcock e përshkroi marrëveshjen si një angazhim afatgjatë.
“ImmunityBio është këtu për vitet që vijnë, duke punuar krah për krah me Urdhrin Bektashi për të sjellë trajtime të avancuara kundër kancerit te njerëzit e Shqipërisë, në Ballkan, në Europën e gjerë dhe, në fund, në të gjithë botën”, tha ai.
Partneriteti bazohet në parimin “Paqe përmes Shëndetit, Njerëzim përmes Shërimit”.
Sipas angazhimeve të shpallura, pas krijimit të shtetit sovran, nisma synon që, në varësi të kapaciteteve, trajtimet e miratuara për qytetarët shqiptarë të ofrohen pa pagesë.
Ndërkohë, përmes të ashtuquajturit “Balkans Peace Discount”, parashikohet që pacientëve të kualifikuar nga vendet e Ballkanit t’u ofrohet kujdes shëndetësor me kosto të reduktuar ose, në raste të përshtatshme, pa pagesë.
Marrëveshja parashikon gjithashtu mekanizma të pavarur mbikëqyrjeje. Një Komitet Ndërkombëtar i Pavarur Mbikëqyrës, ku shumica e anëtarëve do të jenë mjekë ose shkencëtarë pa interesa financiare në kompanitë partnere, do të bashkëpunojë me Autoritetin Bektashi për Shëndetin dhe Barnat për vlerësimin dhe mbikëqyrjen shkencore.
Asnjë trajtim nuk do të administrohet pa pëlqimin e lirë, me shkrim dhe të informuar të pacientit, pas informimit mbi natyrën e trajtimit, rreziqet, statusin rregullator dhe alternativat e disponueshme, përfshirë trajtimet standarde.
Shqipëria dhe tradita e bashkëjetesës fetare
Gjatë vizitës së tij në Tiranë, Zampolli vuri në dukje edhe historinë e Shqipërisë në mbrojtjen e hebrenjve gjatë Luftës së Dytë Botërore.
Nën parimin shqiptar të Besës, familje myslimane dhe të krishtera strehuan hebrenj, shpesh duke rrezikuar jetën e tyre. Yad Vashem ka njohur një numër të konsiderueshëm shqiptarësh si “Të Drejtë mes Kombeve”.
“Presidenti Trump e ka bërë luftën kundër antisemitizmit një prioritet”, tha Zampolli.
“Historia e Shqipërisë tregon se si duket guximi moral: vendi doli nga Holokausti me më shumë hebrenj sesa kishte para luftës, sepse familjet shqiptare mbrojtën njerëzit që ishin në rrezik. Kjo histori duhet të mësohet në klasat në të gjithë Europën. Ajo i jep angazhimit të sotëm për të luftuar antisemitizmin një shembull të fuqishëm”, shtoi ai.
Axhenda e Zampollit në Tiranë përfshiu gjithashtu takime me ministrin për Evropën dhe Punët e Jashtme, ministrin e Shëndetësisë, ministrin e Ekonomisë dhe Inovacionit, si dhe me drejtuesit e grupeve parlamentare të mazhorancës dhe opozitës në Kuvendin e Shqipërisë.
© 2026 Argumentum
