Komisioni Evropian dënon mohimin e gjenocidit dhe revizionizmin, duke theksuar se pajtimi dhe marrëdhëniet e mira fqinjësore mbeten thelbësore për të ardhmen e Ballkanit Perëndimor.
Komisioni Evropian ka reaguar pas vdekjes dhe varrimit të ish-komandantit të Ushtrisë së Republikës Sërpska, Ratko Mlladiq, duke dënuar glorifikimin e kriminelëve të luftës, mohimin e gjenocidit dhe revizionizmin.
Në një deklaratë të publikuar nga Shërbimi Evropian për Veprimin e Jashtëm, zëdhënësi i Komisionit Evropian, Christian Wigand, theksoi se këto qëndrime janë në kundërshtim me vlerat themelore evropiane dhe nuk kanë vend as në Bashkimin Evropian dhe as në vendet kandidate për anëtarësim.
“Çdo glorifikim i kriminelëve të luftës, mohimi i gjenocidit dhe revizionizmi bien ndesh me vlerat më themelore evropiane dhe nuk kanë vend në BE apo në vendet kandidate për në BE”, deklaroi Wigand.
Ai rikujtoi se Mlladiq ishte dënuar për krime lufte, gjenocid dhe krime kundër njerëzimit dhe se ai vdiq ndërsa po vuante një dënim të përjetshëm.
“Ratko Mlladiq ishte një kriminel lufte i dënuar, i cili kishte kryer krime lufte, gjenocid dhe krime kundër njerëzimit. Ai vdiq ndërsa po vuante një dënim të përjetshëm për krime kundër njerëzimit dhe gjenocidin në Srebrenicë”, thuhet në deklaratë.
Mlladiq u dënua me burgim të përjetshëm në vitin 2017 nga Gjykata Penale Ndërkombëtare për ish-Jugosllavinë. Gjykata i cilësoi krimet e tij ndër më të rëndat të njohura nga njerëzimi.
Komisioni Evropian e vendosi reagimin e tij në një kontekst më të gjerë të së kaluarës së Ballkanit Perëndimor, duke i cilësuar konfliktet e armatosura të viteve ’90 si “ndër momentet më të errëta të historisë së fundit të Evropës”.
BE shprehu solidaritet me viktimat, të mbijetuarit dhe familjet e tyre, ndërsa theksoi se pajtimi dhe marrëdhëniet e mira fqinjësore mbeten thelbësore për ndërtimin e një të ardhmeje të përbashkët në rajon.
“Bashkimi Evropian është partner i të gjitha vendeve të Ballkanit Perëndimor për të mbështetur përpjekjet e tyre për të nxitur pajtimin dhe stabilitetin rajonal, si dhe për të gjetur dhe zbatuar zgjidhje përfundimtare dhe gjithëpërfshirëse për mosmarrëveshjet rajonale dhe dypalëshe, në përputhje me të drejtën ndërkombëtare”, theksoi Wigand.
Ratko Mlladiq vdiq më 27 gusht në Hagë, në moshën 84-vjeçare. Ish-komandanti serb i Bosnjës po vuante dënimin e përjetshëm për gjenocid, krime kundër njerëzimit dhe krime lufte të kryera gjatë luftës në Bosnje dhe Hercegovinë.
© 2026 Argumentum
