Në Ditën e Dëshmorëve, më 5 maj 2025, krerët më të lartë të shtetit shqiptar zhvilluan homazhe në Varrezat e Dëshmorëve të Kombit në Tiranë, duke vendosur kurora me lule para monumentit “Nënë Shqipëri” në nderim të atyre që ranë për lirinë dhe pavarësinë e Shqipërisë.
Ceremonia zyrtare u zhvillua në prani të Presidentit të Republikës Bajram Begaj, Kryetarit të Kuvendit Elisa Spiropali, si dhe përfaqësuesve të tjerë të institucioneve shtetërore, forcave të armatosura dhe shoqatave të veteranëve. Ata nderuan kujtimin e dëshmorëve me një minutë heshtje dhe vendosën kurora me lule në nderim të sakrificës së tyre
Presidenti Bajram Begaj nderoi veprën e tyre sublime për atdheun, ndërsa përcolli një mesazh të veçantë për të rinjtë.
“Më 5 Maj, Ditën e Dëshmorëve, përulemi para guximit dhe sakrificës së atyre që dhanë gjithçka për çlirimin e Shqipërisë. Vlerat e tyre, trimëria dhe përkushtimi ndaj lirisë janë trashëgimi e shenjtë. Ne e kemi për detyrë t’i përcjellim brezit të ri këtë flakë atdhedashurie, duke nderuar përjetësisht kujtimin e tyre”, u shpreh Begaj në një postim në rrjetet sociale.
Kryeministri Rama: Të paharrueshëm dëshmorët e Atdheut
Me rastin e 5 majit, Ditës së Dëshmorëve të Atdheut, kryeministri Edi Rama nderoi sot kujtimin e atyre që dhanë jetën për lirinë e vendit.
“Të paharrueshëm dëshmorët e Atdheut”, shkruan Rama në rrjetet sociale, ndërsa ndau momente nga homazhet që po kryhen në monumentin “Nënë Shqipëri”.
Spiropali: Të realizojmë amanetin për Shqipëri të drejtë dhe demokratike
Kryetarja e Kuvendit, Elisa Spiropali, bëri sot homazhe dhe vendosi një kurorë pranë Monumentit “Nëna Shqipëri”, në nderim të Dëshmorëve të Atdheut.
“Sot përulemi me nderim të thellë ndaj Dëshmorëve të Atdheut, djemve dhe vajzave që e deshën Shqipërinë me jetë”, u shpreh ajo.
Sipas Spiropalit, sakrifica e tyre është themeli i lirisë sonë dhe të brezave.
“Nderimi më i madh për Dëshmorët është të realizojmë amanetin për të cilin ata ranë fli: Shqipërinë e zhvilluar, të drejtë dhe demokratike, e barabartë në dinjitet me kombet e kontinentit ku përkasim”, shkruan në mesazhin në rrjetet sociale Spiropali.
Dita e Dëshmorëve e ka origjinën në 5 maj 1942, kur u vra Qemal Stafa, i cili me veprimtarinë e tij u kthye në simbol të Luftës Antifashiste Nacionalçlirimtare.
Në nderim të kujtimit të të rënëve për lirinë e vendit çdo vit në Varrezat e Dëshmorëve kryhen homazhe nga krerët më të lartë të shtetit shqiptar.
5 Maji është Dita e Dëshmorëve të Atdheut që kanë dhënë jetën e tyre për liri, demokraci, të drejtat e njeriut dhe dinjitetin e çdo shqiptari.
/Argumentum.al
