Kryeministri i Kosovës, Albin Kurti tha të martën se sulmi i 24 shtatorit ndaj policisë në veri të vendit, është dëshmi e planeve të Serbisë për aneksimin e veriut të Kosovës.
Të dielën e 24 shtatorit në fshatin Banjskë në veri të Kosovës një grup serbësh të armatosur qëlloi mbi policinë e Kosovës duke vrarë një oficer dhe plagosur një tjetër. Përgjatë përleshjeve që pasuan, tre sulmues mbetën të vrarë.
“Ndërsa unë kam qenë në tavolinën e dialogut në Bruksel dhe në samite të Procesit të Berlinit për të arritur marrëveshje për të ardhmen, siç kemi parë para një jave Serbia po punonte në plane ushtarake për aneksimin e territorit tonë. Kjo tregon që fqinji ynë në veri nuk është i interesuar për bashkëpunim rajonal dhe anëtarësim në Bashkimin Evropian, por në vend të kësaj ka orientime alternative gjeopolitike të cilat janë pjesë e ambicieve hegjemoniste ndaj fqinjëve”, tha kryeministri Kurti.
Ai theksoi se çështja më e rëndësishme dhe urgjente sot është siguria për Kosovën e sulmuar dhe ndëshkimi për sulmuesit, shumica dërmuese e të cilëve tha ai, janë pjesë e organizatave “Mbrojtja Civile” dhe “Brigada e Veriut” të shpallura terroriste nga qeveria e Kosovës më herët gjatë vitit.
“Ndëshkimi për sulmuesit nënkupton ndëshkimin e Serbisë e cila e mbështeti financiarisht, ushtarakisht, logjistikisht, politikisht, publikisht e zyrtarisht atë që ndodhi në Banjskë të Zveçanit të dielën e 24 shtatorit. Por në të njëjtën kohë edhe dorëzimi apo ekstradimi i të gjithë atyre të cilët janë duke u përndjekur sepse ikën nga vendi i krimit dhe nga shteti ynë”, tha ai.
Kryeministri Kurti i bëri këto komente në një debat të organizuar nga Instituti i Prishtinës për Studime Politike mbi Procesin e Berlinit, që është një nismë e krijuar me synim thellimin e bashkërendimit ndërmjet vendeve të Ballkanit Perëndimor si dhe mbështetjen e procesit të anëtarësimit të kësaj pjese në Bashkimin Evropain.
Ai tha se Serbia nuk është e interesuar për bashkëpunim rajonal dhe integrim evropian, duke theksuar lidhjet siç tha gjithnjë e më të ngushta të Beogradit me Moskën.
“Për integrim dhe bashkëpunim rajonal është me rëndësi që të gjashtë vendet e Ballkanit Perëndimor, të gjitha të përparojnë në mënyrë demokratike ngase bashkëpunimi i mirëfilltë ndodh prej vlerave të përbashkëta dhe orientimit të përbashkët strategjik. Shumica e vendeve të Ballkanit i kanë këto të përbashkëta por jo të gjitha. Është e dukshme posaçërisht pas sulmit terrorist të 24 shtatorit të Serbisë kundër Kosovës, por edhe bashkëpunimit të saj të hapur dhe çdoherë e më të ngushtë me Rusinë se mungesa e bashkëpunimit rajonal është për shkak të dallimeve të thella në orientimin strategjik”, tha kryeministri Kurti.
Beogradi i ka mohuar lidhjet me ngjarjet e 24 shtatorit të cilat i mori përsipër Milan Radoiçiç, nënkryetar i deritashëm i Listës Serbe, partisë më të madhe të serbëve të Kosovës që është themeluar dhe mbështetet nga Beogradi.
Përleshjet e 24 shtatorit nxitën shqetësime të reja ndërkombëtare për qëndrueshmërinë e rajonit dhe procesin e normalizimit të marrëdhënieve ndërmjet Kosovës, që shpalli pavarësinë me mbështetjen e Perëndimit dhe Serbisë që kundërshton shtetësinë e saj më mbështetjen e Moskës.
Ngjarjet e së dielës së kaluar do të jenë pjesë e një diskutimi gjatë ditës në Parlamentin Evropian, nga i cili kryeministri Kurti tha se pret ndëshkim të qartë për sulmuesit.
“Unë besoj që diskutimet që zhvillohen në vijim përfshirë edhe ato në forumet e Bashkimit Evropian, më i larti i tyre Parlamenti Evropian, për nga përfshirja qytetare e demokratike, është siguria për Kosovën, ndëshkimet për sulmuesit dhe në të njëjtën kohë të mos provojmë të vazhdojmë me çfarëdo ideje të status quo-së, që mund ta ketë e nuk besoj që do të duhej ta kishte ndokush”, tha kryeministri Kurti./voa
