Avancimi i negociatave për anëtarësimin në Bashkimin Evropian është prioriteti i projektbuxhetit 2025 për politikën e jashtme.
Projektbuxheti i Ministrisë së Evropës dhe Punëve të Jashtme për vitin 2025 parashikon fonde të ndara për aktivitete diplomatike dhe konsullore, si dhe për menaxhimin dhe administrimin e politikave të jashtme.
Buxheti total arrin në 3 874 300 000 lekë me një ndarje të qartë të fondeve për aktivitete të ndryshme. Kjo tregon një fokus në përmirësimin e infrastrukturës diplomatike dhe forcimin e marrëdhënieve me vendet e tjera.
Fondi prej 3 564 300 000 që është dedikuar për këtë ministri, është një rritje e konsiderueshme, krahasuar me vitet e kaluara. Ky është një tregues i angazhimit për të forcuar pozitat diplomatike dhe për të përmirësuar qeverisjen në fushën e politikës së jashtme.
Buxheti për planifikimin, menaxhimin dhe administrimin është 598 490 000 lekë, gjë që tregon një vëmendje të veçantë ndaj strategjive të planifikimit dhe menaxhimit efektiv të burimeve.
Me një fond prej 2 957 230 000 lekë, mbështetja diplomatike jashtë shtetit thekson rëndësinë e mbështetjes diplomatike për qytetarët dhe bizneset në diasporë. Ky fond tregon një angazhim për të ofruar shërbime më të mira dhe më të plota.
Sa i takon aktivitetit diplomatik dhe konsullor të MEPJ-së buxheti parashikon 318 580 000 lekë, duke reflektuar nevojën për të mbështetur përfaqësitë konsullore dhe diplomatike në nivel global.
Në relacionin e buxhetit për politikën e jashtme theksohet se, objektivat kryesorë që synohen të arrihen nga aktiviteti i Ministrisë për Evropën dhe Punët e Jashtme për vitin 2025-2027 janë vijimi i angazhimit politik e diplomatik të MEPJ dhe përfaqësive në shtetet anëtare të BE për avancimin e negociatave për anëtarësimin në Bashkimin Evropian.
Forcimi i dialogut me institucionet e BE, në të gjitha nivelet dhe formatet, lidhur me çështje të politikës së përbashkët të jashtme e të sigurisë, përfshirë sanksionet e BE dhe zbatimin e tyre në territorin shqiptar;
Kryerja me sukses e procesit të negociatave të anëtarësimit për të gjitha çështjet në grup kapitujt e acquis të BE-së, ku MEPJ është kryesuese (kapitulli 31) apo kontribuese (kapitulli 24 dhe kapitulli 30).
Rritja e kontributit dhe rolit aktiv të Shqipërisë në organizatat ndërkombëtare, në zbatim të prioriteteve të politikës sonë të jashtme dhe në funksion të paqes, sigurisë dhe adresimit të sfidave të përbashkëta, me qëllim realizimin e një përfaqësimi sa më dinjitoz në OKB.
Angazhim dhe kontribut i shtuar/intensiv e strukturave ne MEPJ dhe misioneve të Përhershme të RSH në Gjenevë, Nju-Jork dhe Vjenë, në funksion të mandatit si anëtar i Këshillit të të Drejtave të Njeriut (KDNJ) të OKB-së për periudhën 2024-2026; si anëtar i Bordit Ekzekutiv të UNESCO-s për periudhën 2023-2027 (mandati ka filluar që nga 1 janar 2024); si anëtar i Komisionit për parandalimin e Krimit dhe Drejtësinë Penale (CCPCJ) për periudhën 2025-2027 dhe si anëtar i Bordit të UN Women për periudhën 2025-2027.
Vijimësi e angazhimit proaktiv të vendit, pas përfundimit të mandatit si anëtar jo i përhershëm i KS të OKB-së për periudhën 2022-2023.
Si anëtare e NATO-s, Shqipëria do vijojë të jetë pjesë aktive e vullnetit të palëkundur të Aleancës Atlantike për të siguruar dhe mbrojtur çdo pëllëmbë të territorit aleat, duke kontribuar ushtarakisht në përforcimin më të madh të NATO-s në Lindje të territorit aleat që nga Lufta e Ftohtë. Ajo do të kontribuojë aktivisht në unitetin e Aleancës dhe në rëndësinë thelbësore të lidhjes Transatlantike, në mënyrë që NATO të mbetet kolonë stabiliteti për gjeneratat e ardhshme.
Forcimi i marrëdhënieve me vendet e rajonit dhe bashkëpunimit rajonal;
Konsolidim i marrëdhënieve me Kosovën, përmes G2G, zbatimit të marrëveshjeve të përbashkëta, angazhimit për njohjen ndërkombëtare të shtetit të Kosovës, për pjesëmarrjen dhe anëtarësimin e saj në organizatat rajonale dhe ndërkombëtare, etj.
Forcimi i kohezionit të shqiptarëve në rajon; zhvillimi i mëtejshëm i marrëdhënieve me vendet e tjera, me prioritet marrëdhëniet me partnerët strategjikë, vendet mike dhe aleate; hapja e ambasadave në Ukrainë, Bosnjë e Hercegovinë, Azerbajxhan, Indi, Indonezi e Kenia.
Forcimi i dimensionit të diplomacisë ekonomike në strukturë, përmbajtje dhe mekanizma të reja për një qasje proaktive dhe gjithëpërfshirëse, me krijimin e Bordit te Investimeve dhe Eksporteve dhe Rrjetit të Atasheve Tregtarë nderi/këshilltarë të jashtëm, për të maksimizuar përfitimet kombëtare në tregti dhe investime, rritur bashkëveprimin ekonomik me botën e jashtme, promovuar dhe mbrojtur interesat kombëtare ekonomike, nxitur zhvillimin ekonomik të qëndrueshëm të vendit dhe gjetur në arenën ekonomike botërore tregje e partnerë të rinj për tregti, eksport, biznes dhe know-how; promovimin dhe rritjen e imazhit të Shqipërisë jashtë kufijve, si dhe forcimin e brand-it të saj si destinacion turistik.
Bashkëpunimi me partnerët ndërkombëtarë për të gjetur mundësi dhe zbatuar projekte që i sjellin shqiptarët e diasporës gjithmonë e më afër vendit të tyre. Marrëveshje me vende të ndryshme që synojnë të ndihmojnë dhe lehtësojnë jetën e përditshme të diasporës (marrëveshje për njohjen e lejeve të drejtimit dhe ato për sigurimet shoqërore).
Modernizimi i shërbimeve konsullore në përmbushje të detyrave që rrjedhin nga Strategjia Kombëtare për Diasporën, duke synuar përafrimin e diasporës me vendin, identifikimin e nevojave dhe problemeve të tyre dhe ndërmjetësimi për zgjidhjen e tyre në vendin pritës./ATA
