Ka përfunduar takimi i mbajtur në Bruksel mes presidentit të Serbisë Aleksandar Vuçiç dhe kryeministrit të Kosovës Avdullah Hoti.
Kreu i ekzekutivit kosovar u shpreh se “ka pasur progres” për sa i përket zhvillimit ekonomik dhe çështjeve të tjera të lëna pezull siç janë njohja reciproke dhe normalizimi i marrëdhënieve mes dy vendeve. Kryeministri i Kosovës u shpreh optimist dhe besimplotë për rolin e ndërkombëtarëve në këtë proces.
Pas takimit në Bruksel, kryeministri i Kosovës, Avdullah Hoti listoi dy çështjet që janë diskutuar mes dy shteteve, përkatësisht çështja e të pagjeturve dhe zhvillimi ekonomik. Ai e cilësoi këtë takim si të vështirë, ndërsa shtoi se kjo do jetë faza përmbyllëse e çështjeve që janë të hapura në raport me Serbinë.
“Ka qenë takim i vështirë. Qëndrimin tonë e kam prezantuar në këtë takim dhe nuk do të lëviz asnjëherë nga ai qëndrim. Kjo është faza finale e përmbylljes së çështjeve të hapura me Serbinë”.
Kreu i qeverisë së Kosovës shtoi më tej se ky proces do të marrë disa javë e muaj, por jo më shumë, raporton Radio Evropa e Lirë.
Më tej Hoti u shpreh se: “Jemi në fazën përfundimtare të përmbylljes së marrëveshjes përfundimtare me Serbinë”. Për sa i përket kundërshtive nga opozita në Prishtinë, Hoti tha se ka pasur koordinim me të gjitha institucionet ndërsa pretendoi se dialogu “është në fazën finale të përmbylljes së marrëveshjes”.
Presidenti i Serbisë, Aleksandar Vuçic tha se bisedimet me kryeministrin e Kosovës, Avdullah Hotin nuk kanë qenë aspak të lehta. Ashtu siç tha Hoti, edhe presidenti serb u shpreh se temat që janë diskutuar ka qenë ajo e të zhdukurve gjatë luftës dhe çështjet ekonomike.
“Bisedimet për të zhdukurit dhe të zhvendosurit do të vazhdojnë të mërkurën tjetër në nivelin teknik”, tha ai.
Ai ka zbuluar edhe kërkesën direkte që ka shtruar në tryezën e takimit pala kosovare, e cila ka kërkuar hapjen e arkivave të policisë së Serbisë. Më tej kreu i Serbisë, Aleksandar Vuçiç, shtoi se vetë ai ka kërkuar që edhe Kosova duhet të hapë arkivat e Ushtrisë Çlirimtare të Kosovës.
“Ne jemi të gatshëm t’i përgjigjemi çdo kërkese të shqiptarëve. Kudo që ata mendojnë se mund të tregojnë në hartë një vend ku atyre u duket, ose ku mendojnë se është e mundur që të ketë ndonjë varrezë me shqiptarë, ne jemi të gatshëm së bashku me ta dhe me praninë e evropianëve të tregojmë nëse ka diçka apo jo. Por, ne kërkuam të njëjtën të drejtë për ne. Sepse deri më tani nuk kemi pasur qasje në Llapushnik, Gjakovë, Koshare dhe në disa lokacione të tjera”, u shpreh Vuçiç.
Më herët përpara takimit, përfaqësuesi i BE-së, Josep Borrell qe shprehur i kënaqur se “BE ka marrë tashmë në dorë timonin e dialogut” dhe i pati uruar palët për “angazhimin e treguar” për faktin se Hoti e Vuçiç e zhvilluan takimin pak ditë pasi kryen një diskutim me videokonferencë.
Përmes një postimi në Twitter, Presidenti i Këshillit Evropian, Charles Michel gjithashtu mirëpriti rinisjen e dialogut Beograd-Prishtinë dhe “angazhimin e treguar nga të dyja palët”.
