Ftesa e Kryetarit të Partisë Demokratike, Lulzim Basha ndaj qeverisë është ironizuar nga kryeministri i vendit duke provokuar një “luftë” virtuale Rama-Basha-Meta. “Pasagjeri VIP”, “Makinisti” dhe “Profeti i kokoshkave” janë emrat që kanë zgjedhur liderit e Shqipërisë për njëri-tjetrin.
Kryetari i Partisë Demokratike, Lulzim Basha në një deklaratë për mediat nga Durrësi, ku vizitoi disa biznese vendase, ngriti alarmin për krizën ekonomike dhe shëndetësore që sipas tij i kanoset vendit.
“Ftesa që kam sot për qeverinë është; jepini fund lojërave dhe propagandës. Merrni planin tonë me 5 pika dhe filloni zbatojeni. E para të sigurojmë mbrojtje maksimale kundër pandemisë. Po propozojmë mbrojtje për mjekët dhe infermierët dhe rimbursim 100 për qind për të sëmurët që po kurohen në shtëpi. Një i sëmurë me COVID harxhon 600 mijë lekë për ilaçe dhe deri në 1,2 mln lekë nëse i duhet të përdorë edhe oksigjenin.
Kreu i demokratëve e cilësoi të papranueshëm vendimin e Këshillit të Ministrave të miratuar dje përmes të cilit siç tha, 1,8 mln dollarë janë hequr nga bujqësia dhe i janë dhënë inceneratorëve.
Këto para tha z. Basha duhet të shkojnë për masa ekonomike që PD i ka propozuar qeverisë.
“Kemi propozuar që të gjithë ata që kanë humbur vendin e punës të marrin 160 mijë lekë për 6 muajt e ardhshëm.
Të mbështet biznesi me 200 mijë lekë për çdo të ripunësuar dhe biznesi i vogël të marrë një çek prej 1 mijë eurosh për 6 muaj. Rënia e papunësisë do të thellojë krizën. Plani ynë duhet të nisë të zbatohet menjëherë për daljen nga kriza”, u shpreh kryedemokrati.
Por kjo ftese do te prodhonte nje lufte virtuale nga Kryeministri Edi Rama i cili ka ironizuar ftesën që kreu i PD-së dhe drejtuesit e opozitës i kanë bërë për të zbatuar një plan financiar për shpëtimin e ekonomisë.
Edi Rama shprehet se: “Programi i Lulit është një tramvaj me shalqi që nuk piqen kurrë, me Ilirin makinist, Monikën fatorino, Saliun shkarkues gazrash dhe vetë Lulin pasagjer VIP”.
Pas përgjigjes ironike të këtij të fundit, vjen reagimi i Bashës, i cili shkruan në ‘Twitter’ se ‘gërrvërret prej palaçoje nuk e mbulojnë dot dështimin tënd dhe krizën ku i ke zhytur njerëzit’.
“Gërrvërret prej palaçoje nuk e mbulojnë dot dështimin tënd dhe krizën ku i ke zhytur njerëzit. Pas çdo gërrvërri ti fsheh vjedhjet e qeverisë prej miliona eurosh, si mbrëmë me inceneratorët. Para që duhet të shkojnë te shëndetësia, të papunët, pensionistët e biznesi në krizë“, shkruan Basha ne Twitter
Po ashtu Presidenti Ilir Meta ka reaguar për deklaratat e kryeministrit Edi Rama, ku ky i fundit e kishte vendosur ne rolin e “makinistit. Në një postim në Facebook, Presidenti ironizon Edi Ramën me dramën satirike të Edmond Budinës, “Profeti i Kokoshkave”.
“Profeti i kokoshkave t’i lërë batutat bajate dhe të respektojë çdo pikë e presje të Marrëveshjes Historike të 5 Qershorit. Shefin e pakicës së pakicës, nuk ka formulë e marifet që e shpëton nga data 25 prill. Por fajin për këtë situatë të rëndë psiqike, prapë e ka Opozita e Bashkuar. Se ajo e mësoi keq duke ja lënë fushën bosh për të kapur 100% të pushteteve”,- deklaron kreu i shtetit.
© Argumentum
