Presidenti i Kinës, Xi Jinping, zhvilloi takime të nivelit të lartë me homologët nga Vietnami, Laosi dhe Kuba në kuadër të përkujtimit të 80-vjetorit të fitores së Luftës së Rezistencës së Popullit Kinez kundër agresionit japonez dhe Luftës Botërore Antifashiste.
Presidenti kinez Xi Jinping takon homologun vietnamez Luong Cuong
Presidenti kinez Xi Jinping u takua të enjten në Pekin me presidentin vietnamez Luong Cuong, që ka ardhur në Kinë për të marrë pjesë në përkujtimet për 80-vjetorin e fitores së Luftës së Rezistencës të Popullit Kinez kundër Agresionit Japonez dhe Luftës Botërore Antifashiste.
Xi vuri në dukje që fitorja e Luftës Antifashiste Botërore tregon plotësisht se drejtësia do të triumfojë. Ai u bëri thirrje të dy vendeve të mbrojnë së bashku rezultatet e fitores së Luftës së Dytë Botërore dhe të mbështesin barazinë e drejtësinë ndërkombëtare.
Përballë kundërrymave të unilateralizmit dhe ligjit të xhunglës, gjithnjë e më shumë vende e kanë kuptuar që kompromisi dhe lëshimi nuk kanë asnjë rrugëdalje dhe vetëm bashkimi e vetëforcimi janë shpresëdhënës, tha Xi.
Ai theksoi se e paraqiti Nismën e Qeverisjes Globale për të nxitur zhvillimin e sistemit të qeverisjes globale në një mënyrë më të drejtë dhe të barabartë.
Luong Cuong u shppreh se marrëdhëniet me Kinën kanë rëndësi strategjike për Vietnamin dhe përbëjnë një përparësi kryesore në politikën e jashtme vietnameze.
Ai shtoi që, përballë një bote ndryshimesh dhe kaosi, Vietnami do të zhvillojë me vendosmëri marrëdhëniet e tij me Kinën.
Presidenti i Kinës Xi Jinping takohet me Presidentin e Laosit
Xi Jinping, Sekretar i Përgjithshëm i Komitetit Qendror të Partisë Komuniste të Kinës dhe President i vendit u takua të enjten në Pekin me Thongloun Sisoulith, Sekretar i Përgjithshëm të Komitetit Qendror të Partisë së Revolucionit të Popullit të Laosit dhe President i Laosit.
Thongloun ndodhet në Kinë për Samitin e Organizatës së Bashkëpunimit të Shangait 2025, përkujtimet për 80-vjetorin e fitores së Luftës e Rezistencës së Popullit Kinez kundër Agresionit Japonez dhe Luftës Botërore Antifashiste, si edhe për një vizitë pune.
Xi theksoi se, duke pasur parasysh ndryshimet e thella dhe komplekse në peizazhin ndërkombëtar dhe rajonal, të dyja palët duhet t’i shohin dhe t’i zhvillojnë marrëdhëniet Kinë-Laos nga një perspektivë afatgjatë dhe strategjike, si edhe të mbështesin fuqimisht njëra-tjetrën në çështje që lidhen me interesat dhe shqetësimet e tyre kryesore përkatëse.
Kina është gati të thellojë shkëmbimet me Laosin mbi përvojën në qeverisjen partiake dhe shtetërore, tha Xi.
Të dy palët duhet të fokusohen në operimin e linjës hekurudhore Kinë-Laos dhe zhvillimin përgjatë rrugës për të përmirësuar projektet kryesore, tha Xi, duke shtuar se ato duhet të thellojnë gjithashtu bashkëpunimin në fushën e mbrojtjes, zbatimin e ligjit dhe sigurinë, si dhe në fusha të tjera.
Thongloun tha se marrëdhëniet Laos-Kinë aktualisht janë në nivelin më të mirë në histori. Laosi është gati të vazhdojë të punojë me Kinën për të zbatuar planin e ri pesëvjeçar të veprimit për ndërtimin e një komuniteti Laos-Kinë me një të ardhme të përbashkët.
Laos mbështet plotësisht Nismën e Qeverisjes Globale të propozuar nga Sekretari i Përgjthshëm Xi Jinping dhe është gati të forcojë koordinimin dhe bashkëpunimin me Kinën në skenën ndërkombëtare, tha Thongloun.
Xi Jinping-u takohet me Miguel Díaz-Canel
Të enjten paradite, sekretari i përgjithshëm i Komitetit Qendror të Partisë Komuniste të Kinës dhe president i Kinës, Xi Jinping, u takua në Pallatin e Madh të Popullit në Pekin me sekretarin e parë të Komitetit Qendror të Partisë Komuniste të Kubës dhe president i Kubës, Miguel Díaz-Canel, i cili erdhi në Kinë për të marrë pjesë në përkujtimet e 80-vjetorit të fitores së Luftës së Rezistencës të Popullit Kinez kundër Agresionit Japonez dhe Luftës Antifashiste Botërore.
Xi theksoi se Kina dhe Kuba duhet të ndjekin parimin e fateve të përbashkëta, të thellojnë besimin e ndërsjellë politik të nivelit të lartë, të forcojnë më tej shkëmbimet e nivelit të lartë, të rrisin shkëmbimet e përvojave në qeverisjen partiake dhe shtetërore, ta përkrahin fort njëra-tjetrën dhe të thellojnë vazhdimisht miqësinë e tyre të veçantë të besimit të ndërsjellë. Kina do të vazhdojë ta mbështesë fort Kubën në luftën e saj të drejtë kundër ndërhyrjeve dhe bllokadës.
Ndërsa Miguel Díaz-Canel deklaroi se përkujtimet e 80-vjetorit të fitores së Luftës së Rezistencës të Popullit Kinez kundër Agresionit Japonez ishin madhështore e të ngrohta dhe kanë një rëndësi të madhe historike. Kontributi i rëndësishëm i Kinës në fitoren e Luftës Antifashiste Botërore do të mbahet mend përgjithmonë. Kuba është vendi i parë i Amerikës Latine që ka krijuar një bashkësi dypalëshe me të ardhme të përbashkët me Kinën. Të dy partitë dhe të dy vendet kanë marrëdhënie të ngushta dhe një miqësi të pathyeshme.
Të dy palët publikuan “Deklaratën e përbashkët të Republikës Popullore të Kinës dhe Republikës së Kubës mbi përshpejtimin e ndërtimit të një bashkësie me fate të përbashkëta Kinë-Kubë” dhe nënshkruan një numër dokumentesh bashkëpunimi dypalësh për ndërtimin e përbashkët të “Një brez, një rrugë”, bashkëpunimin praktik, Nismën e Sigurisë Globale, bujqësinë, inteligjencën artificiale dhe fusha të tjera.
