Dr. Marsela Musabelliu
Çdo vit në mars, “Dy Sesionet” është fraza më e përmendur në median dhe publikun kinez. Ajo i referohet takimeve të plota të Asamblesë Kombëtare Popullore (AKP) dhe Konferencës Konsultative Politike të Popullit Kinez (KKPPK). AKP-ja përshkruhet nga ligji si “organi më i lartë shtetëror i pushtetit”, dhe gjithashtu organi më i lartë legjislativ i vendit. Ndërsa, KKPPK-ja është organi më i lartë këshillimor politik i Kinës. Ajo është një organizatë e frontit të bashkuar me përfaqësim të gjerë dhe e konsultimit politik nën udhëheqjen e Partisë Komuniste të Kinës (PKK). Pothuajse të gjitha temat e rëndësishme për zyrtarët dhe publikun trajtohen gjatë seancave të këtyre takimeve të rëndësishme politike që mbahen në Pekin. Këtë vit, Sesioni i Pestë i AKP-së së 13-të mbahet nga 5 deri më 11 mars, dhe Sesioni i Pestë i Komitetit Kombëtar të 13-të të KKPPK-së zhvillohet nga 4 deri më 10 mars. Dy Sesionet vjetore ofrojnë një mundësi të mirë për të vëzhguar dhe kuptuar zhvillimin e Kinës dhe për të parë funksionimin dhe sundimin e ligjit në sistemin politik të Kinës.
Raporti i punës së qeverisë
Më 5 mars 2022, Kryeministri Li Keqiang i dorëzoi legjislaturës për shqyrtim një raport të punës së qeverisë në emër të Këshillit të Shtetit. “Ndërsa i njohim arritjet tona, ne jemi gjithashtu shumë të qartë për problemet dhe sfidat para nesh”, tha ai, duke theksuar nevojën për t’u përballur me problemet në mënyrë të drejtpërdrejtë dhe për të bërë maksimumin për të përmbushur pritshmëritë e njerëzve.
Pikat kryesore shpalosën ecurinë e punës gjatë vitit të kaluar dhe në dukje kryefjala ishtë mirëqenia dhe ekonomia. Në radhe të parë u konfirmua se rritja e Prodhimit të Brendshëm Bruto (PBB), edhe pse në një vit shumë të vështirë mes pandemisë dhe kufizimeve, u rrit me 8.1%. Por kjo nuk ishte një rritje vetëm në terma abstraktë ekonomikë pasi të ardhurat e disponueshme për frymë të rezidentëve janë rritur po me 8.1% në terma realë. Në përpjekje kolosale për të rritur mirëqënien u hapën 12.69 milionë vende të reja pune në qytete dhe qyteza dhe u aktivizuan uljet shtesë të taksave e tarifave që tejkalojnë 1 trilion juanë (afro 1,6 miliardë $).
Duke arritur në një nga vendet me shkallën e mbulimit të vaksinimit kundër Cocid-19 më të lartë në botë, u konfirmua se në Kinë më shumë se 85% e popullsisë janë plotësisht të vaksinuar. Në vitin 2021, investimet e Kinës mbajtën një vrull rimëkëmbjeje, duke luajtur një rol të rëndësishëm në optimizimin e strukturës së furnizimit, rritjen e cilësisë së furnizimit dhe rregullimin e lidhjeve të dobëta. Investimi i aseteve fikse u rrit me 4.9% nga viti në vit në mbi 54.45 trilion juanë (8.63 trilion dollarë) dhe Investimet e Huaja Direkte (IHD) në territorin kinez, u zgjeruan 14 % nga viti në vit në një nivel rekord prej 1.15 trilion juanë (afro 182 milardë dollar).
Në mënyrë shumë të kthjellët dhe skematike u parashtruan edhe disa detyra kyçe të vitit 2022 ku sërish kryefjala ishte ekonomia, zhvillimi dhe qëndrueshmeria financiare. Disa kategori si më poshtë:
Financat: Këtë vit, norma e deficitit është planifikuar të jetë rreth 2.8%, dhe pagesat e transfertave nga qeveria qendrore drejt pushtetit vendor do të rriten me rreth 1.5 trilion juanë .
Investimi i qeverisë: 3.65 trilion juanë (afro 577 milardë dollarë) obligacione speciale të qeverisjes vendore janë planifikuar të azhurnohen në 2022.
Ulja e taksave: Është vlerësuar se zbritja vjetore e taksave do të jetë rreth 2.5 trilion juanë(afro 395 milardë dollarë), nga të cilat rreth 1.5 trilion juanë (afro 237 milardë dollarë) do të mbeten në zbritjen tatimore.
Konsumi: Vazhdimi i mbështetjes në konsumin e automjeteve të reja me energji të rinovueshme dhe inkurajim në përdorimin e pajisjeve inteligjente dhe ekologjike.
Inovacioni: zbatimi i një plani dhjetëvjeçar për kërkimin bazë dhe zbatimi i një plani trevjeçar për reformën e sistemit shkencor dhe teknologjik.
Rigjallërimi rural: do të jepet mbështetje e mëtejshme për zonat që janë nxjerrë nga varfëria në zhvillimin e bizneseve të veçanta lokale, duke marrë iniciativa rurale për të përmirësuar infrastrukturën, si furnizimet me ujë, energji elektrike dhe gaz, rrugët dhe shërbimet e postës dhe të komunikimit.
Hapja e mëtejshme me botën: Promovon negocimin dhe nënshkrimin e marrëveshjeve të tregtisë së lirë me standarde të larta me më shumë vende dhe rajone. Do të punohet intensivisht për të negociuar dhe lidhur marrëveshje të standardeve të larta të tregtisë së lirë me më shumë vende dhe rajone. Investimet e huaja direkte të Kinës do të mbeten të fuqishme në vitin 2022, pasi tregu i saj i madh vendas dhe baza e fortë e prodhimit vazhdojnë të tërheqin investitorë të huaj, veçanërisht në menaxhimin e pasurisë, energjinë e re dhe sektorët e teknologjisë së lartë, sipas një raporti nga firma globale e auditimit dhe konsulencës KPMG.
Mbrojtja e mjedisit: Përmirësimi i kursimit të energjisë dhe ujit, riciklimit të materialeve të mbeturinave dhe politikave të tjera mbështetëse të industrisë për mbrojtjen e mjedisit.
Raporti i punës së qeverisë përmendi se: “duhet t’u përmbahemi politikave dhe parimeve kryesore të punës për Tajvanin, të zbatojmë strategjinë e përgjithshme të PKK-së për zgjidhjen e çështjes së Tajvanit në epokën e re, duke ju përmbajtur parimit të një Kinë dhe “Konsensusit të 1992”. Më tej Kryeministri Li Keqiang u shpreh se “Do të Kundërshtohen me vendosmëri aktet separatiste të “pavarësisë së Tajvanit” ndërhyrjen e forcave të jashtme. Bashkatdhetarët në të dy anët e ngushticës duhet të punojnë së bashku për të krijuar kauzën e lavdishme të përtëritjes kombëtare.”
Objektivat kryesore për vitin 2022
Kina vendos objektivin e saj të rritjes së PBB-së për vitin 2022 në rreth 5.5%, planifikon të krijojë më shumë se 11 milionë vende të reja pune në vitin 2022, të mbajë ICK-në e saj në rreth 3% dhe planifikon të ulë raportin e deficitit të saj ndaj PBB-së në rreth 2.8% për vitin 2022.
Politikat fiskale dhe monetare për vitin 2022 mbështetet në bazat e ekonomisë së Kinës, të cilat mbeten të pandryshuara dhe nxisin rritjen afatgjatë. “Qeveria kineze do të mbajë rripin e saj të shtrënguar” shënon raporti, duke kuptuar se do të mbajë shpenzimet qeveritare të ulëta. Kina do të mbajë përgjithësisht të qëndrueshëm kursin e këmbimit RMB; do të ndërmarrë veprime më të forta kundër monopoleve dhe konkurrencës së pandershme për të siguruar një mjedis tregu të rregulluar mirë dhe të drejtë.
Politikat sociale për vitin 2022 ravijëzojnë se Kina do të konsolidohet plotësisht dhe do të bazohet në arritjet e saj në eliminimin e varfërisë; do të përmirësojë masat për politikën e tre fëmijëve; do të vazhdojë kontrollin e saj rutinë efektiv të COVID-19 për të parandaluar rastet hyrëse dhe rishfaqjet e brendshme dhe do të përshpejtojë kërkimin dhe zhvillimin e vaksinave dhe ilaçeve efektive dhe do të vazhdojë zbatimin e programeve të vaksinimit.
Diplomacia e Kinës për vitin 2022 vazhdon në linjën e saj të përhershme duke nënvizuar se do të kontribuojë më shumë për paqen dhe prosperitetin botëror. Një theks i veçantë u vendos edhe në bashkëpunim të cilësisë së lartë në kuadër të Nismës “Një brez, Një rrugë” duke promovuar vlerat e përbashkëta të gjithë njerëzimit
Një sërë masash pragmatike këtë vit, të cilat synojnë ndërtimin e një tregu të fortë vendas, nxitjen e imputeve të rritjes, nxitjen e shpenzimeve konsumatore dhe zhbllokimin e potencialit për investime bazuar në fuqizimin e ekonomisë dhe zhvillimit me cilësi të lartë.
Duke observuar fjalët kyçe të këtij raporti vërehet se soliditeti i qeverisjes dhe projeksionet për të ardhmën janë të konsoliduara në fjalët zhvillim, stabilitet, modernizim socialist, inovacion, punësim, reforma, hapje e mëtejshme me botën etj. Duke marrë parasysh që bazat afatgjata të Kinës mbeten të pandryshuara, qëllimet e saj për vitin 2022 janë të realizueshme dhe do të ndihmojë në rritjen e besimit të tregut në terma afatmesëm dhe afatgjatë, duke injektuar kështu një shtysë në rimëkëmbjen ekonomike globale