Sipas Forcave Ajrore Ukrainase, Rusia sulmoi gjatë natës me 805 dronë luftarakë dhe 13 raketa. Ky besohet të jetë numri më i madh i dronëve të përdorur nga Rusia që nga fillimi i sulmit në shkurt 2022.
751 dronë dhe katër raketa u interceptuan nga sistemet e mbrojtjes ajrore. Qytetet ukrainase u shënjestruan në pothuajse çdo rajon të vendit. Sipas autoriteteve, tre persona u vranë dhe shumë qytetarë u plagosën.
Sulme ndaj ndërtesave të banimit
Në kryeqytet, Kiev, disa ndërtesa banimi u dëmtuan rëndë.Sipas kryetarit të bashkisë Vitali Klitschko, të paktën dy persona u vranë dhe njëmbëdhjetë të tjerë u plagosën. Një fëmijë njëvjeçar thuhet se ishte midis të vdekurve.
Gjatë sulmit rus ndaj Kievit, kryeministria gjithashtu me sa duket u përfshi nga flakët. “Për herë të parë, ndërtesa e kabinetit qeveritar u dëmtua në një sulm armik, duke përfshirë çatinë dhe katet e sipërme,” njoftoi kryeministrja Yulia Svyrydenko.
Shpërthime u raportuan gjithashtu në qytetet ukrainase të Odesës, Kharkivit, Dnipros, Zaporizhias dhe Kryvyi Rih. Vetëm në Zaporizhia, të paktën 15 persona u plagosën, raportoi agjencia e lajmeve Ukrinform, duke cituar administratorin ushtarak Ivan Fedorov.
Në Odesë, dronët sulmuan ndërtesa banimi dhe infrastrukturë tjetër civile. Në Kryvyi Rih, u goditën edhe objektiva në zonën urbane. Aktualisht është e pamundur të verifikohen në mënyrë të pavarur këto raportime.
Alarm kufitar në Perëndim
Polonia është gjithashtu në gatishmëri të lartë për shkak të sulmeve ajrore ruse në Ukrainën perëndimore. Vendi i BE dhe aleatët e saj kanë dërguar avionë ushtarakë në zonën kufitare me Ukrainën. “Avionët polakë dhe aleatë po operojnë në hapësirën tonë ajrore, ndërsa sistemet e mbrojtjes ajrore tokësore dhe të zbulimit me radar janë në gatishmëri të lartë”, tha Komanda Operacionale e Forcave të Armatosura Polake.
Reagimi i Ukrainës
Ukraina njoftoi se kishte sulmuar përsëri tubacionin e naftës Druzhba në rajonin Bryansk të Rusisë. Komandanti i forcave të dronëve ukrainase Robert Browdi raportoi se tubacioni ishte dëmtuar ndjeshëm nga një zjarr. Tubacioni i tranzitit vazhdon të furnizojë me naftë ruse vendet anëtare të BE, Hungarinë dhe Sllovakinë.
Sipas Rusisë, një sulm me dronë ukrainas shkaktoi një zjarr në rafinerinë e naftës Ilsky në rajonin Krasnodar. “Një nga objektet e përpunimit u përfshi nga flakët, por zjarri u shua shpejt”, tha administrata e këtij rajoni jugor rus. Nuk pati të plagosur. Personeli u dërgua në siguri.
Dëme nga të dyja palët
Rusia po zhvillon një luftë shkatërruese agresioni kundër Ukrainës prej më shumë se tre vjetësh e gjysmë. Anasjelltas, mbrojtësit ukrainas shënjestrojnë rregullisht objektiva në vendin fqinj, duke sulmuar kryesisht objektet e energjisë.
Viktimat civile dhe shkalla e dëmeve në Ukrainë, megjithatë, janë disa herë më të mëdha se në Rusi. Kërkesat e lideri të Kremlinit, Vladimir Putin, për t’i dhënë fund luftës së agresionit do të thonë dorëzim i plotë i Ukrainës./DW
