Alexey Zaytsev
Ambasadori i Rusisë në Shqipëri
Përgjatë gjithë historisë së saj shumëshekullore, Rusia ka kaluar periudha sprovash dhe tronditjesh, të cilat populli ynë i ka kapërcyer dhe është bërë më i fortë, më i bashkuar, duke u frymëzuar për arritje dhe fitore të reja.
Sot, Rusia, duke sfiduar botën e përqendruar te Perëndimi, është në ballë të luftës për formimin e një rendi të ri botëror shumëpolar, më të drejtë dhe më të balancuar, duke ofruar një alternativë tjetër ndaj ambicieve neokoloniale të Perëndimit dhe modelit socio-kulturor që ai imponon.
Duke dashur të ruajë pozitat dominuese në marrëdhëniet ndërkombëtare dhe parimet diskriminuese të shpërndarjes së pasurive natyrore, Perëndimi po ndërmerr një sërë përpjekjesh maksimale për të përmbajtur Rusinë.
Evropa po kërkon hapur të na shkaktojë një “disfatë strategjike” në fushën e betejës, po bën gjithçka të mundur për të zgjatur konfliktin në Ukrainë dhe po minon pëpjekjet për paqe, pavarësisht faktit, nëse ato vijnë nga Moska, Uashingtoni apo kryeqytete të tjera.
Bashkimi Evropian po furnizon regjimin e Kievit me para dhe armë, duke zbatuar konceptin e “luftës deri në ukrainasin e fundit”. Kuptohet, që e gjithë kjo bëhet në kurriz të taksapaguesve evropianë, pa marrë parasysh problemet ekonomike në rritje dhe rënien e standarteve të jetesës së popullsisë. Nën sloganin e trilluar të një kërcënimi rus ka nisur një program militarizimi i industrisë, i paparë që nga Lufta e Dytë Botërore. Po kërkohen zgjidhje të rafinuara për të organizuar sa më mirë rrëmbimin e paligjshëm të aseteve financiare ruse të ngrira.
Kundër Rusisë janë vendosur më shumë se 30 mijë sanksione, më shumë se kundër Koresë së Veriut, Iranit dhe Sirisë të marra së bashku. Juridiksionet perëndimore kanë bllokuar rezervat sovrane ruse në shumën prej rreth 300 miliardë dollarë amerikanë, kanë vendosur sanksione ndaj institucioneve financiare, kanë shkëputur sistemin bankar rus nga sistemet ndërkombëtare të transmetimit të të dhënave, kanë vendosur ndalime dhe kufizime të shumta në furnizimin me lëndë të para, mallra dhe teknologji për në Rusi dhe jashtë saj, dhe kanë vendosur kufizime të shumta personale për qytetarë rusë. Së fundmi, Perëndimi ka kaluar në të ashtuquajturat sanksione dytësore, nga të cilat vuajnë edhe vendet e treta.
Por shpresat se sanksionet do të vepronin menjëherë, se ekonomia ruse do të binte në kolaps dhe shoqëria do të destabilizohej, nuk u justifikuan. Pavarësisht presionit të paprecedentë nga jashtë, vendi ynë mbetet një fuqi dinamike në zhvillim me tregues makroekonomikë të qëndrueshëm. Flukset e tregtisë së jashtme janë riorientuar dhe transaksionet ndërkombëtare janë konvertuar në valutën kombëtare. Rritja e PBB-së gjatë tre viteve të fundit tejkaloi 10%. Industria është ristrukturuar dhe po zbaton një program të zëvendësimit të importit.
Pavarësisht presionit nga jashtë, Rusia sot po realizon një kompleks të tërë projektesh kombëtare në shkallë të gjerë në fushën sociale dhe demografike,që i dedikohen forcimit të institucionit të familjes, mbështetjes së fëmijëve dhe të të rinjve, zhvillimit të kujdesit shëndetësor dhe rritjes së jetëgjatësisë.
Viti 2026 u shpall nga Presidenti V.V.Putin si Viti i Bashkimit të Popujve të Rusisë. Kjo mishëron angazhimin e shtetit në mbështetje të kulturës, gjuhës dhe identitetit të popujve që banojnë në vendin tonë, duke simbolizuar unitetin qytetar të shtetasve rusë, pavarësisht rajonit, ku jetojnë.
Në kuadrin e forcimit të sovranitetit teknologjik janë hartuar dhe po zbatohen programe për zhvillimim e ekonomisë së të dhënave, transformimin dixhital të shtetit, robotizimin e prodhimit, krijimin e një baze të pavarur komponentësh për industrinë, subvencionimin e prodhimit të dronëve civilë dhe komercialë.
Një vëmendje e madhe po i kushtohet projektit kombëtar “Infrastruktura për Jetën”, e cila parashikon modernizimin e shërbimeve publike dhe arritjen e një niveli cilësisht të ri të zhvillimit urban.
Në shkallë me të vërtetë kontinentale janë drejtimet prioritare në infrastrukturën e transportit: zhvillimi i korridorit “Veri-Jug”, zgjerimi i Sistemit Hekurudhor Lindor, i cili përfshin Hekurudhat Trans-Siberiane dhe Bajkal-Amur, zhvillimi i Rrugës Detare Veriore. Këto akse transporti po ndikojnë tashmë në konfigurimin e logjistikës globale.
Përpjekjet e Perëndimit për të izoluar Rusinë në arenën ndërkombëtare dështuan. Pavarësisht stimulimit të ndjenjave rusofobe dhe përpjekjeve të pandërprera për të njollosur imazhin e vendit tonë, ai po forcon rolin e tij si një pjesëmarrës aktiv dhe i rëndësishëm i komunitetit ndërkombëtar, ai ka fituar pozita kyçe në organizatat ndërkombëtare dhe si anëtar themelues i OKB-së mbështet parimet e Kartës së saj. Një vëmendje e madhe i kushtohet bashkëpunimit në bashkimet integruese rajonale dhe botërore. Vit pas viti po rritet rëndësia dhe pesha e BRICS – hallka kryesore në ndërtimin e një rendi të ri botëror shumëpolar.
Një theks i rëndësishëm po i vihet zhvillimit të bashkëpunimit brenda SCO-së, EAEU-së, CIS-së dhe CSTO-së, të cilën Moska e kryeson këtë vit. Në të gjitha forumet e disponueshme, ne vazhdimisht mbështesim zhvillimin e bashkëpunimit të barabartë dhe me dobi të ndërsjellë, si dhe krijimin e një arkitekture sigurie të barabartë dhe të pandashme.
Sot, Rusia po zgjeron në mënyrë aktive kontaktet e saj me partnerë konstruktivë në të gjithë botën. Një nga prioritetet e politikës së jashtme të vendit tonë është bashkëveprimi me vendet e Jugut Global, të cilave u ofrojmë një dialog ndërqytetërues në vend të qasjes neokolonialiste.
Pa një Rusi të fortë, sovrane, krijimi i një rendi botëror të ekuilibruar dhe të drejtë është i pamundur sot.
© 2026 Argumentum
