Drejtues të shtetit dhe politikës në Shqipëri dhe Kosovë kanë uruar Talat Xhaferin dhe shqiptarët në Maqedoninë e Veriut e cila do të ketë kryeministrin e parë shqiptar.
Nga Shqipëria, Presidenti Bajram Begaj i uroi suksese, Talat Xhaferin me rastin e zgjedhjes së tij në krye të qeverisë së Maqedonisë së Veriut.
“Urimet e mia më të përzemërta qeverisë së re teknike të Maqedonisë së Veriut dhe Kryeministrit të saj, zotit Talat Xhaferi”, thuhet në mesazhin e Presidentit.
Pavarësisht kufizimit në kohë dhe në kompetenca, vijon mesazhi i Presidentit, kjo qeveri ka sfidën dhe privilegjin për të realizuar zgjedhje të lira e të ndershme, për të ruajtur stabilitetin dhe kursin euro-atlantik të vendit si dhe të dëshmojë aftësinë për të qenë gjithpërfshirëse dhe bashkëpunuese me të gjithë faktorët pa dallim politik dhe etnik.
Begaj deklaroi se shqiptarët janë një faktor i rëndësishëm për stabilitetin dhe ardhmërinë e RMV.
“Ky është rasti që ata të dëshmojnë se e shohin lidershipin vetëm në perspektivën e integrimit të RMV në BE. Suksese!”, thuhet në mesazhin e Presidentit.
Ministri për Evropën dhe Punët e Jashtme Igli Hasani, i uroi suksese, Talat Xhaferin me rastin e zgjedhjes së tij në krye të qeverisë së Maqedonisë së Veriut.
Hasani u shpreh besimplotë se Kryeministri Talat Xhaferi dhe kabineti i tij qeveritar do të përmbushin angazhimet dhe detyrimet e programit qeveritar, si dhe vijimin e punës për realizimin e proceseve që dalin nga negociatat për anëtarësim me BE-në dhe përshpejtimi i integrimit evropian.
“Suksese kryeministrit të parë shqiptar në historinë e Maqedonisë së Veriut!.
Besimplotë se Kryeministri Talat Xhaferi dhe kabineti i tij qeveritar do të përmbushin angazhimet dhe detyrimet e programit qeveritar, që nga organizimi i zgjedhjeve të lira, të ndershme e demokratike, vijimi i punës për realizimin e proceseve që dalin nga negociatat për anëtarësim me BE-në dhe përshpejtimi i integrimit evropian, rritja dhe zhvillimi i ekonomisë dhe lufta kundër krimit dhe korrupsionit”, thuhet në mesazhin e ministrit Hasani.
Po ashtu Kryetari i Partisë Demokratike Lulzim Basha ka uruar Talat Xhaferin për zgjedhjen e tij si kryeministër i parë shqiptar në Maqedoninë e Veriut.
Përmes një postimi në Facebook, Basha thekson se Maqedonia e Veriut dëshmoi sot një standard shembullor për bashkëjetesën ndëretnike dhe rolin e shqiptarëve si faktor paqeje dhe stabiliteti në Ballkanin Perëndimor.
“Urime të përzemërta Talat Xhaferi, Kryeministrit të parë shqiptar në Maqedoninë e Veriut. Pa vizionin, përkushtimin dhe vendosmërinë e Ali Ahmeti, kjo do të ishte e pamundur. Roli konstruktiv dhe përkushtimi ndaj vlerave euroatlantike i shqiptarëve të Maqedonisë së Veriut ka qenë përcaktues për anëtarësimin në NATO dhe në hapjen e negociatave për anëtarësim në Bashkimin Europian. Maqedonia e Veriut dëshmoi sot një standard shembullor për bashkëjetesën ndëretnike dhe rolin e shqiptarëve si faktor paqeje dhe stabiliteti në Ballkanin Perëndimor. Duke i uruar suksese kryeministrit Talat Xhaferi, shpreh shpresën dhe besimin që rruga europiane e Maqedonisë së Veriut të vazhdojë pa u ndalur”, shprehet Basha.
Ndërsa nga Kosova, Presidentja Vjosa Osmani, ka uruar emërimin e Talat Xhaferit kryeministër të Maqedonisë së Veriut, transmeton Anadolu.
Në një reagim në rrjetet sociale, Osmani, duke uruar Xhaferin, ka thënë se emërimi i tij kryeministër shënon moment historik për komunitetin shqiptar të Maqedonisë së Veriut.
“Dita e sotme shënon një moment historik të rëndësishëm për të gjithë komunitetin shqiptar në Maqedoninë e Veriut, duke reflektuar kontributin e tyre jetik në shtetësinë e vendit dhe rrugëtimin drejt integrimit euroatlantik”, shkroi Osmani.
Osmani i uroi qeverisë dhe të gjitha institucioneve të Maqedonisë së Veriut suksese.
Kryeparlamentari Konjufca: Emërimi i Xhaferit kryeministër, arritje e rëndësishme për të gjithë shqiptarët
Edhe kryetari i Kuvendit të Republikës së Kosovës Kosovës, Glauk Konjufca, ka uruar emërimin e kryeministrit të ri të Republikës së Maqedonisë së Veriut, Talat Xhaferi.
Nëpërmjet rrjeteve sociale, Konjufca e konsideroi emërimin e Xhaferit si “arritje të rëndësishme për të gjithë shqiptarët”.
Kryeparlamentari kosovar Konjufca tha se Xhaferi deri dje udhëhoqi shkëlqyeshëm Kuvendin e vendit mik të Kosovës.
“Kryeministri shqiptar, sado me kompetenca dhe kohë të limituar, thyen një barrierë të perceptimit për këdo. Urojmë që kjo përgjegjësi e re t’iu shërbejë të gjithë qytetarëve pa dallim. Bërja e Xhaferit kryeministër deri në realizimin e zgjedhjeve në Maqedoninë e Veriut vjen si mundësi që pjesëmarrja dhe integrimi i plotë i shqiptarëve të vlerësohet si synim i pashmangshëm, aq sa edhe përparimtar, prej të cilit përfiton më së miri vetë Maqedonia e Veriut”, shkroi Konjufca.
Tutje, Konjufca tha se shpreson dhe beson se një hap i tillë do t’i hapë rrugë ndryshimeve të përparimit të vazhdueshëm politik në Maqedoninë e Veriut.
Kuvendi i Maqedonisë së Veriut me shumicë votash sot votoi qeverinë teknike me kryeministër Talat Xhaferi.
Xhaferi është kryeministri i parë në Maqedoninë e Veriut nga komuniteti etnik shqiptar.
Siç ishte paralajmëruar, në kuadër të përgatitjeve për zgjedhjet parlamentare të parapara të mbahen më 8 maj 2024, më 25 janar Dimitar Kovaçevski dha dorëheqje nga posti i kryeministrit, e më pas Talat Xhaferi dha dorëheqje nga posti i kryetarit të Kuvendit.
/Argumentum.al
