Nga Eljanos Kasaj
Gushti duket se po sjell shumë surpriza në skenën politike botërore-ku me avancimin e trupave ruse në Ukrainë, krizën politiko-ekonomike në Bashkimin Evropian dhe humbjen e autoritetit të organizatave globale(si Kombet e Bashkuara ose UNESCO) nën presionin e politikave sovranisto-nacionaliste të cilat sot po dominojnë në shumë vende të botës, nevoja për dialog dhe diplomaci të sinqertë është duke formuar realitete të reja gjeo-politike, “laboratorët” e të cilëve sot janë Pekini, Uashington-i, New-Dehli dhe Moska.
Secili prej këtyre “laboratorëve” ka karakteristikat, tipologjinë dhe unikalitetin(çfarë mund ta quajmë ndryshe si veçanti) e tij, analiza e të cilit ka nevojë për një gjuhë të veçant dhe të bazuar në fakte në korespondencë të zhvillimeve aktuale në terren.
Sot do të hedhim një sy dhe të analizojmë një grup ngjarhesh të cilat u zhvilluan brenda mureve të Kremlinit plak dhe të cilat sot po sjellin(ose do të sjellin me padyshim) ndryshime radikale në realitetet tona gjeo-politike/diplomatike dhe ekonomike.
Moskë-Kuala Lampur(6 Gusht)
Presidenti rus Vladimir Putin zhvilloi një takim me Mbretin e Malajzisë, Sulltan Ibrahim Iskandar. Takimi u zhvillua në Sallën e Gjelbër të Pallatit të Madh të Kremlinit dhe zgjati afërsisht dy orë e 20 minuta.
Në përputhje të rreptë me protokollin ceremonial, presidenti rus e shoqëroi personalisht mysafirin e tij të huaj deri në shkallët e Pallatit të Madh të Kremlinit.
“Dua t’ju falënderoj për pritjen. Është një nder i madh për mua të takohem me ju në Moskë. Gjithmonë kam ëndërruar t’ju takoj. Do të doja t’ju falënderoja sinqerisht për ftesën”, tha Sulltani malajzian gjatë takimit me presidentin rus në Kremlin.
Sulltani Ibrahim gjithashtu admiroi cilësitë udhëheqëse të presidentit Putin, duke vënë në dukje se ai e kishte udhëhequr vendin “nëpër kohë sfiduese dhe të vështira.”
“Në të njëjtën kohë, ju dëshmuat se ishit një figurë e fortë qeveritare në një kohë kur nevojiteshin vizion dhe qëndrueshmëri”, theksoi ai.
Aktualisht kreu i shtetit malajzian ndodhet në Rusi për një vizitë shtetërore me statusin më të lartë diplomatik, e cila lejohet vetëm një herë gjatë mbretërimit të një monarku në Malajzi. Përveç kësaj, kjo ishte hera e parë që kreu i shtetit malajzian udhëton në Federatën Ruse që nga koha e vendosjes së marrëdhënieve diplomatike në vitin 1967 (në kohën e Bashkimit Sovjetik). Vizita mbretërore do të vazhdojë deri më 10 gusht. Sulltani Ibrahim Iskandar është planifikuar gjithashtu të vizitojë qytetin e Kazanit, kryeqendra e Republikës së Tatarstanit.
Ky takim vuri sërisht në dukje statusin unikal diplomatik dhe politik të Rusisë në vendet e Azisë Jug-Lindore dhe Organizatës ASEAN, duke treguar qartësisht se Rusia jo vetëm që nuk është e izoluar, por me luftën e saj kundër bllokut BE-SHBA-NATO është duke fituar admirimin e gjithë asaj pjese të botës, që evropianët me mendjemadhësinë e tyre sot ende i etiketojnë si “botë e trete”,”destinacione të lira turistike” ose “thjesht vendeve të prapambetura diktatoriale”-duke e materializuar më tej idenë e saj të multipolarizimit global.
Moskë-Washington D.C.(6 Gusht)
I dërguari i SHBA-së, Steve Witkoff, mbërriti në Moskë të mërkurën në një mision të minutës së fundit për të kërkuar një zgjidhje në luftën e Ukrainës, dy ditë para skadimit të afatit të caktuar nga Presidenti Donald Trump për Rusinë që të binte dakord për bksedimet e paqes(ose një armëpushimi) ose të përballej me sanksione të reja ekonomike.
Përpara takimit me Presidentin Putin,zoti Witkoff u prit nga Kirill Dmitriev, i dërguari i investimeve të Rusisë dhe kreu i fondit të saj sovran të pasurisë. Mediat shtetërore ruse i treguan të dy burrat duke shëtitur së bashku nëpër Parkun Zarjadje(Парк Зарядье) pranë mureve te Kremlinit, të zhytur në bisedë.
Sipas një zyrtari të lartë të administratës amerikane, takimi midis Witkoff dhe Presidentit Putin “shkoi mirë”, por pritet që këtë javë të vendosen sanksione dytësore kundër Moskës dhe disa prej aleatëve të ngusht të saj(si India,Brazili dhe Kina),gjë që duket se nuk ka për ta bërë më të leht zhvillimin e bisedimeve midis palëve,por pavarësisht gjithçka kanalet e komunikimit duket se janë të hapura dhe në funksion normal.
Ndërkaq, në përfundim të takimit, Presidenti Trump, sugjeroi në rrjetet sociale, se takimi midis Witkoff dhe Putin ishte “shumë produktiv”.
“U bë përparim i madh! Më pas, i informova disa nga aleatët tanë evropianë. Të gjithë janë dakord se kjo luftë duhet të përfundojë dhe ne do të punojmë drejt kësaj në ditët dhe javët që vijnë”, shkroi Presidenti Trump.
Njëkohësisht, në atë çfarë dhe mund të konsiderohet si aritja më e madhe e këtij takimi(por dhe e zotit Witkoff personalisht) ishte dakortëzimi mbi një takim tete-a-tete të liderve rus dhe amerikan.
Ky lajm u konfirmua dhe prej qarqeve të larta diplomatile ruse, ku sipas diplomatit dhe ndihmësit të Kremlinit, Jurij Ushakov, takimi midis Presidentit Trump dhe Presidentit Putin mund të zhvillohet që javën e ardhshme! Ai tha se është rënë dakord për një vend, por të dhënat s takimit do të shpallen në ditët në vijim.
“Me sugjerimin e palës amerikane, në thelb u arrit një marrëveshje për të mbajtur një takim dypalësh në nivelin më të lartë në ditët në vijim, domethënë një takim midis Presidentit Vladimir Putin dhe Donald Trump”, tha zoti Ushakov.
Kjo ishte vizita e pestë e zotit Witkoff në Rusi që nga fillimi i vitit 2025, por ndoshta dhe më e rëndësishmja në karrierën e tij(dhe në diplomacinë moderne amerikane). Herën e fundit që i dërguari i posaçëm i udhëheqësit amerikan erdhi në Moskë për bisedime ishte më 25 prill, dhe para kësaj – më 11 prill në Shën Peterburg, ku në të dyja rastet ai u prit prej Presidentit Putin.
Moskë-New Dehli-Dubai(7 Gusht)
Është konfirmuar zyrtarisht prej medias indiane se Këshilltari i Sigurisë Kombëtare i kryeministrit indian Narendra Modi, Ajit Doval, ka mbërritur në Moskë të mërkurën vonë.
Kjo vizitë vjen në një kohë të fërkimeve gjeopolitike në rritje, veçanërisht pasi Presidenti i SHBA-së Donald Trump njoftoi një taksë shtesë prej 25% ndaj Indisë për blerjet e naftës nga Rusia, duke e rritur barrën totale tarifore mbi Indinë në 50%, më e larta nga çdo partner tregtar i SHBA-së, së bashku me Brazilin(një vend anëtar ky i BRICS).
Aktualisht, prej raportimeve mediatike të Agjencisë Telegrafike të Lajmeve Ruse(TASS), gjatë kësaj vizite të shtetarit të lartë indian do të diskutohen tri çështje kryesore:
a)Në krye të axhendës do të jetë afati kohor i dorëzimit të sistemeve të mbetura të raketave ruse S-400 Triumf( C-400 Триумф ), të cilat luajtën një rol vendimtar gjatë përplasjes ushtarake Indi-Pakistan dhe Operacionit Sindoor në maj 2025( duhet të theksojmë këtu se kjo shënon vizitën e parë të zotit Doval në Rusi që nga Operacioni Sindoor, megjithëse ai u takua me zyrtarë rusë gjatë takimit në Organizatën e Bashkëpunimit të Shangait në Pekin në qershor);
b)Një tjetër çështje kyçe që ka të ngjarë të dalë në pah është njohja e legjitimitetit të regjimit taleban në Afganistan nga Rusia, një veprim që ka implikime për Indinë ashtu si dhe për gjithë rajonin e Kashmirit, një zonë kjo militarisht konfliktuale midis Indisë dhe Pakistanit.
c)Së fundi vendimi i Administratsë së Uashingtonit për të vendosur tarifa shtesë në vlerën 25% ndaj Indisë në lidhje me blerjen e naftës dhe produkteve të naftës ruse. Përveç vendimit të marrë më parë nga SHBA-të për të vendosur një tarifë prej 25% për mallrat indiane, norma për Indinë pas këtyre tarifave të fundit do të jetë 50%!-duke e kthyer tashmë “presionin e sanksioneve kundër Rusisë” në një luftë të vërtet kundër BRICS dhe pjestarëve në organizatat e reja multinacionale(globale) që sot po minojnë dominimim e “Botës së Parë/Perëndimore”.
Vizita e zotit Doval do të pasohet nga një angazhim më i gjerë diplomatik, me Ministrin e Punëve të Jashtme të Indisë Subrahmanjam Jaishankar që është planifikuar të vizitojë Rusinë në javën e tretë të gushtit për takimin e Komisionit Ndërqeveritar Indi-Rusi (IRIGC-TEC), vizitë e cila do të synoj të forcoj më tej mardhëniet bilaterale,teknologjike,medicinale dhe ushtarake midis dy vendeve.
Njëkohësisht me vizitën e Këshilltarit Indian,ditën e sotme në Areoportin Vunkovo të Moskës ka mbëritur Presidenti i Emirateve të Bashkuara Arabe, Sheikhu Mohamed bin Zayed Al Nahyan.
Gjatë vizitës, Presidenti Al-Nahyan dhe Presidenti rus Vladimir Putin pritet të diskutojnë partneritetin strategjik midis dy vendeve dhe mënyrat për ta forcuar atë, veçanërisht në fushën ekonomike, tregtare, të investimeve, të energjisë dhe fusha të tjera-duke afirmuar edhe një herë lidhjet e ngushta të Rusisë me botën arabe dhe myslymane.
Rezultatet
Gjatë këtyre dy ditëve takimet midis delegacioneve të huaja dhe udhëheqjes ruse kanë treguar se dinamizmi dhe objektivizmi i palëve është qartëduar tashmë dhe se nuk ka më kohë për të humbur në në analizimin e lëvizjeve ose kalkulimin e shkak-pasojave të tyre, pasi tashmë palët e njohin mirë njëra-tjetrën dhe e kanë të qartë çfare secila prej tyre synon të arij.
Kjo sigurisht,e thekson dinamizmin e dialogut midis tyre,ashtu si mundësinë e konfrontimit-por,duke ditur realitetet socio-ekonomike sot në botë,mund të themi se rezulatatet e axhendave diplomatike synojnë para sē gjithash ruajtjen e dialogut,në bazë të të cilit synohet ruajtja e shpejtësisë për tu adaptuar në ndryshimet gjeo-politike dhe socio-ekonomike që superfuqitë kanë si karakteristikë të tyre dhe që i dallon ato nga vended e tjera.
/Argumentum.al
