Donald Trumpi është presidenti i parë në historinë e SHBA që shkeli në territorin e Koresë së Veriut. Së bashku me pushtetmbajtësin Kim Jong Un, ai kaloi drejt Veriut në zonën e çmilitarizuar.
Presidenti i SHBA Donald Trump dhe kryetari i shtetit i Koresë së Veriut Kim Jong Un u takuan në kufirin midis Koresë së Veriut dhe asaj të Jugut. Trumpi është Presidenti i parë në detyrë i SHBA, që hyri në tokën e Koresë së Veriut komuniste. Vijën e demarkacionit ai e kaloi në vendin e quajtur Panmunjom. “Jam krenar që e kam kaluar këtë vijë,” tha presidenti i SHBA. Pastaj, së bashku me Kimin ai kaloi në territorin e Koresë së Jugut, ku u takuan me Presidentin Moon Jae In. Pasoi një bisedë me dyer të mbyllura.
Përsëri bisedime rreth konfliktit bërthamor
![USA | Nordkorea | Entmilitarisierte Zone | Donald Trump | Kim Jong Un (AFP/Getty Images/B. Smialowski)](https://www.dw.com/image/49417584_404.jpg)
Trumpi dhe Kimi ranë dakord që t’i rinisin bisedimet mes dy vendeve. Në javët e ardhshme, do të ngrihen grupe pune në të dyja anët. Grupin e SHBA do ta krijojë Ministri i Jashtëm Mike Pompeo. Shtetet e Bashkuara të Amerilës kërkojnë çarmatimin e plotë bërthamor të Koresë së Veriut. Përveç kësaj, SHBA dhe Koreja e Jugut synojnë të arrijnë një marrëveshje zyrtare për paqen në Kore. Trumpi nuk bëri të ditur se për çfarë hollësish duhet të flasë fillimisht grupi i punës. Ai bëri të qartë se sanksionet e gjera kundër Koresë së Veriut mbeten në fuqi. Veç kësaj, në takimin në Panmunjom ai e ftoi në Uashington pushtetmbajtësin e shtetit komunist.
Kim: Inisiativa e Trumpit një “akt shumë i guximshëm”
![Tani të tre: Donald Trump dhe Kim Jong Un takojnë Presidentin e Koresë së Jugut, Moon Jae In](https://www.dw.com/image/49417670_401.jpg)
Tani të tre: Donald Trump dhe Kim Jong Un takojnë Presidentin e Koresë së Jugut, Moon Jae In
Trumpi theksoi në mënyrë të përsëritur marrëdhënien e tij personale të mirë me Kim. “E pëlqyem njëri-tjetrin që ditën e parë”, tha presidenti amerikan. Kimi gjithashtu e përshkroi si “të shkëlqyer” marrëdhënien e tij personale me Trumpin. Në përshëndetje, ai i tha presidentit amerikan se gëzohet që e takon përsëri. Ai nuk e kishte pritur që ta takonte ndonjëherë në këtë vend. Shtrëngimi i duarve ka “rëndësi të madhe për paqen”, tha Kimi më tej. “Ne do ta lëmë pas të kaluarën dhe do të shkojmë drejt së ardhmes,” theksoi ai. Ai e përshkroi inisiativën e Trump-it për takimin si një “veprim shumë të guximshëm”.
Ky ishte takimi i tretë i dy politikanëve. Në samitin e parë të Trumpit dhe Kimit në Singapor në qershor 2018, Koreja e Veriut në parim ra dakord për çarmatimin bërthamor. Por atëherë nuk u ra dakord për hapa konkrete. Një takim i dytë në Hanoi në shkurt dështoi sepse nuk kishte asnjë lloj afrimi; që atëherë, bisedimet bërthamore midis Uashingtonit dhe Phenianit kanë ngecur. SHBA kërkon nga Koreja e Veriut të heqë dorë nga armët bërthamore, Koreja e Veriut dëshiron heqjen e sanksioneve. Vetëm pak ditë më parë, udhëheqja e Phenianit kishte kërkuar më shumë vullnet të mirë nga Shtetet e Bashkuara. Hapësira kohore për bisedime të reja zvogëlohej, u tha.