Presidenti Ilir Meta do të ketë mbështetjen e një pjese të opozitës më 2 mars, kur ka thirrur qytetarët në Bulevardin “Dëshmorët e Kombit” për të kundërshtuar atë që e cilëson si ‘grush shteti’ të organizuar nga mazhoranca socialiste.
Kryetarja e Lëvizjes Socialiste për Integrim, Monika Kryemadhi u bëri thirrje qytetarëve që më 2 mars të dalin në bulevard për fëmijët e tyre dhe për Shqipërinë.
“Unë them që ne si LSI, unë Monika Kryemadhi angazhohem që jo vetëm të shërbej e përulur ndaj të rinjve të LRI-së, por ndaj të gjithë të rinjve shqiptar si një nënë që ushqen dhe jep jetën për fëmijët e saj. Unë nuk kam ndërmend të jap jetën as për Lulzim Bashën që të bëhet kryeministër, as për Ilir Metën që të jetë President. Unë e jap jetën time për fëmijët e mi që nëse dikush kërkon t’ju marri të ardhmen e tyre, prandaj 2 marsi ka nevojë për burrat dhe gratë shqiptare që duan fëmijët e tyre të jetojnë në Shqipëri, të jetojnë të lumtur si qytetarë europian, sepse Zoti na ka bekuar me këtë vend të mrekullueshëm, me ujë, diell, malet, liqenet, detin, çdo gjë”, deklaroi ajo gjatë takimit me të rinjtë e bazës në Shkodër këtë të shtunë.
Kryetarja e LSI-së mbështet qëndrimin e Ilir Metës së Edi Rama me kapjen e Gjykatës Kushtetuese kërkon që të bëjë të ligjshme të gjitha vendimet që sipas saj, ja ka kundërshtuar Bashkimit Europian dhe Komisioni i Venecias. Por, më 2 mars, Kryemadhi thotë se nuk do të dalë në bulevard përkrah bashkëshortit të saj si kryetare partie, por me një tjetër status, ndërsa Metës i faturon përgjegjësi për kapjen e institucioneve nga socialistët.
“Unë do të marr pjesë si qytetare, jo se jam me Ilir Metën, se Ilir Meta me tolerancën e tij dhe me besimin që pati në Partinë Socialiste nuk u tregua i vëmendshëm për të mos lejuar këtë kapje të të gjithë sistemit, nga Parlamenti, Qeveria, ekonomia e çdo gjë tjetër me radhë. Por unë do të jem në Bulevardin “Dëshmorët e Kombit” në 2 mars si një nënë që fëmijët e saj do t’i shikojë në shtëpi. Do të jem si një bashkëshorte që do të jetojë e qetë vitet që i kanë mbetur në familjen e saj. Do të jem si një bijë që do të garantojë shërbim ndaj prindërve të saj që janë pensionistë dhe që pensioni nuk u del as për ilaçe, dhe jo më të paguajnë drita, ujë, të vishen, të mbathen dhe të ushqehen”, vijoi ajo.
Kryetarja e LSI-së u ndal edhe tek konferenca e donatorëve, e zhvilluar më 17 shkurt në Bruksel, ku Shqipërisë iu premtuan 1.15 mld euro donacione dhe kredi të buta.
“Edi Rama na premtoi konferencë donatorësh, por në fakt na solli konferencë kreditorësh. Ajo që është më e bukura është që thotë se kreditë i kam me interesa të ulëta. Po mirë këto janë borxh. A keni parë ju që në raste fatkeqësish i jepet borxh njeriu? Jo unë s’kam parë. Unë besoj në Zot dhe di që edhe në Kuran edhe në Bibël, borxhi me interesa dënohet. Kështu që si me 1% dhe me 2% në raste fatkeqësish, njeri ka shumë hall, ka litarin në fyt. Si mund të marrësh mbi 850 milionë euro borxh pa treguar se çfarë do të bësh?”, u shpreh ajo.
Kryemadhi thotë se dy janë rrugët sesi Rama mund të tërheqë këtë shumë, ose të rrisë borxhin ose ta përdorë këtë kredimarrje për të pastruar paratë e drogës.
Për të gjitha këto arsye, Kryemadhi mendon se 2 marsi nuk është i rëndësishëm vetëm për shqiptarët, por edhe për vetë ndërkombëtarët. “Për të gjithë ata ambasadorë që kërkuan Komisionin e Venecias. Të gjithë ambasadorët dolën dhe thanë mos u zini, se kemi Komisionin e Venecias”, u shpreh kryetarja e LSI-së.
Kryeministri Edi Rama u ka kthyer përgjigje në rrjetet sociale këtyre deklaratave të Monika Kryemadhit, duke shënjestruar gjithashtu edhe Ilir Metën dhe Lulzim Bashën.
Në mesazhin e tij, Kryeministri Edi Rama e lidh këtë lëvizje të Ilir Metës si lëvizje kundër Shqipërisë dhe aleatëve ndërkombëtarë.
“Sa më shumë Shqipëria forcon trupin e saj të brishtë,aq më shumë ata që e penguan, shfrytëzuan, dërrmuan për vite të tëra, dëshpërohen e lëshojnë gjuhën jashtë kontrollit! Tamam kur Shqipërisë i’u bë një deklaratë publike dashurie nga BE dhe bota mbarë në 17 shkurt, ata u marrosën…”, shkruan Rama.
Pjesa e dytë e mesazhit të Kryeministrit u drejtohet qytetarëve. “Mos humbim kohë me ta! Janë të dënuar të përpëliten në zjarrin e urrejtjes së tyre e të çirren gjithnjë e më fort kundër nesh! Shqipëria i ka lënë pas dhe kërkon nga ne ta çojmë përpara; duke e forcuar çdo ditë, përmes reformave e punëve që s’u bënë kurrë në kohën e tyre të shkuar”, mbyllet reagimi i kreut të Qeverisë./h.e
