33 vjet më parë, në takimin e ministrave të Jashtëm në Berlin, Shqipëria u pranua anëtare në Konferencën për Sigurinë dhe Bashkëpunimin në Evropë (CSBE), tashmë OSBE.
Ministri për Evropën dhe Punët e Jashtme, Igli Hasani deklaroi se mes sfidave të vjetra dhe të reja, roli i Shqipërisë mbetet thelbësor dhe përkushtimi i palëkundur.
“Sot, 33 vjet nga anëtarësimi i Shqipërisë në Konferencën për Sigurinë dhe Bashkëpunimin në Evropë (CSBE), tashmë OSBE. Mes sfidave të vjetra dhe të reja, roli i Shqipërisë mbetet thelbësor dhe përkushtimi ynë i palëkundur”, shkruan ministri Hasani në një postim në rrjetet sociale, teksa ka ndarë dhe foto të korrespondencës së kohës me autoritetet drejtuese të CSBE, sot OSBE me qeverinë shqiptare.
Shqipëria u bë pjesë e Organizatës për Siguri dhe Bashkëpunim në Evropë (OSBE- në atë kohë CSCE) gjatë procesit të Këshillit Ministror të Berlinit (19-20 qershor 1991).
Akti Përfundimtar i Helsinkit u nënshkrua nga autoritetet shqiptare më 16 shtator 1991, pasuar nga nënshkrimi i Kartës së Parisit për një Evropë të Re, më 17 shtator 1991. Ky moment shënoi një ndryshim thelbësor në rrjedhën e politikës së jashtme shqiptare, që do të çlironte Shqipërinë nga izolimi ndërkombëtar dhe do ta sillte më pranë bashkësisë Euro-Atlantike, duke ndarë parimet dhe vlerat e lirisë, demokracisë dhe sundimit të ligjit.
Aderimi i Shqipërisë në OSBE u shoqërua me reforma të thella ligjore në lidhje me të drejtat e njeriut.
Rrethanat që i mundësuan Shqipërisë hyrjen në OSBE, përfshinin lëvizjen demokratike të dhjetorit 1990, zgjedhjet e para pluraliste dhe miratimin e Paketës së Përkohshme Kushtetuese, më 29 prill 1991. Kjo Paketë përfshinte dispozita që pranonin pluralizmin politik dhe respektimin e të drejtave të njeriut.
Sot, Prania e OSBE-së në Shqipëri mbështet reformat ligjore, gjyqësore, administrative dhe ndihmon autoritetet shqiptare në ndërtimin e kapaciteteve parlamentare, luftën kundër korrupsionit dhe promovimin e qeverisjes së mire, fuqizimin e shoqërisë civile, forcimin e lirisë se medias etj.
Shqipëria ka hyrë në një fazë të re bashkëpunimi me OSBE-në, në atë të partneritetit për arritjen e përparësive kombëtare të vendit, në përputhje me aspiratat për integrimin e Shqipërisë në Bashkimin Evropian.
Angazhimi më i rëndësishëm i Shqipërisë në kuadër të OSBE-së është Kryesia e Radhës e Organizatës, gjatë 2020. Ndonëse Kryesia shqiptare e OSBE-së u përball me sfida të paparashikueshme, mes tyre dhe pandeminë e Covid-19, ajo rezultoi si një nga Kryesitë më të suksesshme, sa i përket vendimmarrjes dhe ruajtjes së funksionalitetit të organizatës.
