Me rastin e 76-vjetorit të themelimit të Republikës Popullore të Kinës, Ambasada e Kinës në Shqipëri organizoi një pritje solemne, ku morën pjesë përfaqësues të qeverisë shqiptare, trupi diplomatik, personalitete nga fusha e ekonomisë, kulturës dhe medias, si dhe anëtarë të komunitetit kinez në Shqipëri.
Në fjalën e saj përshëndetëse, Ambasadorja e Kinës në Shqipëri, znj. Pang Chunxue, vlerësoi arritjet e mëdha që Kina ka realizuar gjatë këtyre 76 viteve, duke theksuar se Partia Komuniste e Kinës ka udhëhequr vendin në një transformim historik nëpërmjet reformave të thella dhe zhvillimit të qëndrueshëm
Ambasadorja vlerësoi rrugëtimin e Kinës që nga themelimi i Republikës Popullore në vitin 1949, duke theksuar se nën udhëheqjen e Partisë Komuniste, vendi ka kaluar nga një shtet i prapambetur në një fuqi të madhe ekonomike dhe teknologjike. Vetëm në vitin 2024, ekonomia kineze arriti një PBB prej 134.9 trilionë RMB, duke ruajtur statusin si ekonomia e dytë më e madhe në botë.
“Edhe përballë sfidave të rendit ekonomik global, Kina mbetet e qëndrueshme, inovative dhe e hapur ndaj botës”, theksoi ajo.
Në fokus ishte edhe suksesi i jashtëzakonshëm i Kinës në reduktimin e varfërisë. Sipas ambasadores, vendi ka eliminuar varfërinë ekstreme dhe ka përmirësuar ndjeshëm mirëqenien e qytetarëve të saj, një model që po tërheq vëmendjen ndërkombëtare.
Miqësia tradicionale me Shqipërinë, gjithnjë më e fortë
Një pjesë e rëndësishme e fjalimit iu kushtua marrëdhënieve dypalëshe. Ambasadorja vlerësoi kontributin historik të Shqipërisë në rikthimin e vendit legjitim të Kinës në Kombet e Bashkuara përmes Rezolutës 2758, duke e cilësuar këtë si një akt miqësor që nuk do të harrohet.
Sot, sipas saj, marrëdhëniet mes dy vendeve janë duke u forcuar ndjeshëm në fusha të ndryshme si tregtia, bujqësia, energjia e re, sporti dhe turizmi. Nga janari deri në korrik të vitit 2025, tregtia dypalëshe ka arritur në 69.7 miliardë lekë, me një rritje prej 18.71%. Kina është aktualisht partneri i dytë më i madh tregtar i Shqipërisë.
Gjithashtu, ajo përmendi rritjen e ndjeshme të numrit të turistëve kinezë në Shqipëri, që ka kaluar shifrën prej 26,000 për vitin 2024 – një rritje prej 107%.
Mbështetje për zhvillimin e Shqipërisë
Ambasadorja Pang shprehu mbështetjen e Kinës për synimin e Shqipërisë për integrimin në Bashkimin Evropian deri në vitin 2030, siç parashikohet në programin e qeverisë së Kryeministrit Rama. Ajo theksoi se Kina është e gatshme të bashkëpunojë në kuadër të Nismës “Një Brez, Një Rrugë” dhe iniciativave të tjera ndërkombëtare për të kontribuar në zhvillimin ekonomik e social të Shqipërisë.
Në kontekstin ndërkombëtar, Ambasadorja Pang rikujtoi se ky vit shënon 80-vjetorin e fitores së Luftës së Dytë Botërore dhe Luftës së Rezistencës së Popullit Kinez kundër agresionit japonez. Ajo përmendi iniciativat e fundit të Presidentit Xi Jinping për qeverisje globale, duke bërë thirrje për multilateralizëm, respekt për ligjin ndërkombëtar dhe bashkëpunim gjithëpërfshirës.
Kina, sipas saj, mbështet ndërtimin e një komuniteti me një të ardhme të përbashkët për njerëzimin, dhe është e gatshme të bashkëpunojë me Shqipërinë për të promovuar paqen, sigurinë dhe zhvillimin në nivel global.
Fjala e Ambasadores Pang Chunxue në Pritjen me rastin e 76-vjetorit të Themelimit të Republikës Popullore të Kinës
I nderuar Zv.Ministër Yzeiraj,
Të nderuar të ftuar, bashkatdhetarë, Zonja dhe zotërinj, të dashur miq,
Mirëmbrëma!
Jam shumë e gëzuar që jemi mbledhur së bashku për të kremtuar 76-vjetorin e themelimit të Republikës Popullore të Kinës. Në emër të Ambasadës Kineze në Shqipëri, dëshiroj t’ju përcjell mirëseardhjen më të ngrohtë. Gjithashtu, dua t’u shpreh mirënjohjen time më të sinqertë të gjithë miqve që për një të gjatë kanë ndjekur me interes dhe kanë mbështetur zhvillimin e Kinës dhe miqësinë Kino-Shqiptare. Gjithashtu, dua t’u përcjell urimet e festës bashkatdhetarëve tanë kinezë që punojnë dhe jetojnë në Shqipëri!
Gjatë 76 viteve të fundit, Partia Komuniste e Kinës ka udhëhequr një transformim të madh shoqëror nëpërmjet vetëreformimit të brendshëm. Që nga Kongresi i 18-të i Partisë Komuniste të Kinës, Sekretari i Përgjithshëm Xi Jinping ka bashkuar dhe udhëhequr Partinë në thellimin e qeverisjes gjithëpërfshirëse dhe të rreptë të Partisë, duke filluar me hartimin dhe zbatimin e tetë rregullave të Komitetit Qendror, dhe duke vazhduar përpjekjet kundër formalizmit, burokracisë, hedonizmit dhe ekstravagancës, ka zhvilluar një luftë të pashembullt kundër korrupsionit dhe ka arritur fitore dërrmuese, duke ofruar një garanci të fuqishme për të çuar përpara arritjet historike të kauzës së Partisë dhe të shtetit. Partia Komuniste e Kinës nëpërmjet vetëreformimit të saj, ka rrezatuar në vazhdimësi një vitalitet të fuqishëm, duke bashkuar dhe udhëhequr popullin kinez në përpjekjet e tij të pandërprera për të ndërtuar një vend të fuqishëm dhe për të arritur rilindjen kombëtare.
Gjatë 76 viteve të fundit, Kina ka promovuar modernizimin kinez përmes zhvillimit me cilësi të lartë. Në vitin 2024, PBB-ja e Kinës arriti në 134.9 trilionë RMB (afërsisht 18.7 trilionë dollarë amerikanë), një rritje prej 5% nga viti në vit, duke ruajtur fort pozicionin e saj si ekonomia e dytë më e madhe në botë. Në gjysmën e parë të këtij viti, pavarësisht goditjeve të rënda në rendin ekonomik dhe tregtar ndërkombëtar, ekonomia e Kinës iu përball sfidës, duke arritur një rritje prej 5.3%. Kjo rritje u nxit nga zhvillimi i përshpejtuar i produktivitetit me cilësi të re, me vlerën e shtuar të prodhimit të teknologjisë së lartë mbi madhësinë e caktuar që u rrit me 9.5% nga viti në vit, prodhimin e automjeteve të energjisë së re që u rrit me 36.2% nga viti në vit, dhe shkallën e industrisë së inteligjencës artificiale që tejkaloi 700 miliardë RMB. Hapja në nivel të lartë vazhdoi të përparonte, importet dhe eksportet me 190 vende dhe rajone u rritën , dhe tregtia e mallrave tejkaloi 20 trilionë RMB, gjëja e cila shënon një rekord të ri. Faktet kanë vërtetuar se ekonomia kineze është e qëndrushme dhe ka potencial të madh, dhe trendi i saj themelor pozitiv afatgjatë mbetet i pandryshuar. Investimi në Kinë është investim në të ardhmen, dhe ecja me Kinën është ecja me mundësi.
Gjatë këtyre 76 viteve , arritjet e Kinës në luftën për zbutjen e varfërisë, kanë krijuar mirëqenie për qindra milionë njerëz. Që nga Kongresi i 18-të i Partisë Komuniste të Kinës, Kina ka hyrë në rrugën e reduktimit të varfërisë me karakteristika kineze, duke arritur një fitore të plotë në luftën për zbutjen e varfërisë, duke zhdukur historikisht varfërinë absolute si dhe duke realizuar 10 vjet para afatit objektivin e reduktimit të varfërisë të Axhendës të Kombeve të Bashkuara për Zhvillim të Qëndrueshëm 2030. Jeta e popullit kinez është përmirësuar në të gjitha aspektet, jetëgjatësia mesatare ka arritur në 79 vjeç dhe të ardhurat e disponueshme për frymë që janë rritur në 41,314 juanë. Kina ka ndërtuar sistemet, sigurimet shoqërore dhe shëndetësi, ndërsa ndjenja e përfitimit, lumturisë dhe sigurisë së popullsisë po rritet vazhdimisht.
Zonja dhe zotërinj, të nderuar miq,
Miqësia tradicionale midis Kinës dhe Shqipërisë është rrënjosur thellë në zemrat e popujve tanë. Më shumë se gjysmë shekulli më parë, në bazë të projekt-rezolutës së paraqitur nga Shqipëria dhe Algjeria, Asambleja e Përgjithshme e OKB-së miratoi Rezolutën 2758 me shumicë dërrmuese votash, duke i rikthyer me sukses vendin legjitim të Kinës në Kombet e Bashkuara. Parimi i një Kine është bërë një konsensus i gjerë në komunitetin ndërkombëtar dhe një normë themelore e respektuar universalisht në marrëdhëniet ndërkombëtare. Kina gjithmonë e ka mbajtur në mendje aktin e drejtë të Shqipërisë në atë kohë.
Vitet e fundit, marrëdhëniet Kinë-Shqipëri kanë ruajtur një zhvillim të shëndetshëm dhe të qëndrueshëm. Liderët e të dyja vendeve mbajnë komunikime dhe shkëmbime të shpeshta. Procedurat për hyrjen e produkteve bujqësore shqiptare në Kinë po përparojnë vazhdimisht, ndërsa bashkëpunimi në fushën e energjisë së re, siç janë automjetet elektrike, po shfaq perspektiva të gjera. Nga janari deri në korrik të këtij viti, tregtia dypalëshe arriti në 69.7 miliardë lekë (rreth 830 milionë dollarë amerikanë), me një rritje prej 18.71% krahasur me vitin e kaluar. Kina vazhdon të jetë partneri i dytë tregtar i Shqipërisë. Këtë vit, Administrata e Përgjithshme e Sportit e Kinës nënshkroi një memorandum mirëkuptimi mbi bashkëpunimin sportiv me Komitetin Olimpik Shqiptar. Pas nënshkrimit të marrëveshjes për heqjen reciproke të vizave dhe memorandumit të mirëkuptimit mbi bashkëpunimin e turizmit, shkëmbimet mes qytetarëve kinezë dhe shqiptarë janë bërë më të shpeshta. Në vitin 2024, numri i turistëve kinezë në Shqipëri kaloi 26,000, me një rritje prej 107% nga viti i kaluar.
Aktualisht, Shqipëria ndodhet në një fazë kyçe të zhvillimit kombëtar. Kryeministri Rama i paraqiti Parlamentit programin e qeverisë së tij, i cili duke pasur si objektiv bazë “integrimin e Shqipërisë në Bashkimin Evropian brenda vitit 2030”, fokusohet në tre fusha kryesore: Shqipëria evropiane, rritje e qëndrueshme ekonomike dhe mirëqenie e popullit. Programi identifikoi rreth 300 prioritete kryesore për qeverinë e re, duke paraqitur një vizion të bukur për Shqipërinë. Ambasada kineze dëshiron të shfrytëzojë këtë mundësi për të mbajtur kontakte të ngushta me të gjitha palët, për të forcuar shkëmbimet në të gjitha nivelet midis dy vendeve, për të thelluar bashkëpunimin pragmatik midis Kinës dhe Shqipërisë në kuadër të Nismës “Një Brez, një Rrugë” dhe bashkëpunimit Kinë-Evropë Qendrore e Lindore, si dhe për të vazhduar zgjerimin e shkëmbimeve njerëzore e kulturore, për të kontribuar në zhvillimin ekonomik social të Shqipërisë, në mënyrë që miqësia Kinë-Shqipëri të zhvillohet brez pas brezi në epokën e re.
Zonja dhe Zotërinj, të nderuar Miq,
Ky vit shënon 80-vjetorin e Fitores së Luftës së Rezistencës së Popullit Kinez Kundër Agresionit Japonez dhe Luftës Botërore Antifashiste. Kina ka mbajtur një ceremoni solemne përkujtimore dhe një paradë të madhe ushtarake për të kujtuar historinë, për të nderuar dëshmorët, për të çmuar paqen dhe për të ecur përpara drejt së ardhmes. Aktualisht, bota po përballet me ndryshime shekullore të përshpejtuara, trazirat rajonale janë shpeshtuar, zhvillimi ekonomik po has në pengesa, dhe deficiti i qeverisjes është duke u përkeqësuar. Duke pasur parasysh të ardhmen dhe fatin e njerëzimit, Presidenti Xi Jinping paraqiti Nismën e Qeversjes Globale, duke i bërë thirrje komunitetit ndërkombëtar të mbështesë barazinë sovrane, të respektojë ligjin ndërkombëtar, të praktikojë multilateralizmin, të promovëjë parimin “njeriu në qendër” dhe të fokusohet tek veprimi. Ai gjithashtu artikuloi parimet, metodat dhe qasjet e nevojshme për të reformuar dhe përmirësuar qeverisjen globale. Konceptet kryesore të Nismës së Qeverisje Globale janë në harmoni të plotë me qëllimet dhe parimet e Kartës së OKB-së, duke kontribuar edhe më tej me mençurinë kineze dhe duke propozuar zgjidhje kineze për forcimin dhe përmirësimin e qeverisjes globale. Kina do të mbështesë parimin e konsultimit të gjerë, kontributit të përbashkët dhe përfitimeve të përbashkëta në qeverisjen globale, dhe do të forcojë koordinimin dhe komunikimin me vendet në të gjithë botën, duke përfshirë Shqipërinë, për të zbatuar së bashku Nismën e Zhvillimit Global, Nismën e Sigurisë Globale, Nismën e Qytetërimi Global dhe Nismën e Qeverisjes Globale, duke promovuar një sistem qeverisjeje globale më të drejtë dhe të barabartë dhe për tu ecur së bashku drejt ndërtimit të Komunitetit me një të ardhme të përbashkët për njerëzimin.
Zonja dhe zotërinj, miq,
Së fundmi, dua t’ju ftoj të ngremë një dolli së bashku,
Për 76-vjetorin e themelimit të Republikës Popullore të Kinës,
për miqësinë e qëndrueshme Kino-Shqiptare,
dhe për shëndetin dhe lumturinë e të gjithë mysafirëve tanë.
Gëzuar!
© 2025 Argumentum
