Editorial
Shqipëria e përmbylli javën e tretë të Janarit 2024 me një ngjarje monstruoze, që tejkalon çdo normë dhe çdo vlerë njerëzore, fetare e ligjore.
Lajmi për arrestimin e një mjeku kirurg tek spitali i Sanitariumit nën akuzen se ka shfrytëzuar për prostitucion, për dy vite me radhë një vajze të mitur, tronditi mbarë shoqërinë shqiptare, jo vetëm për këtë akt të shemtuar, por dhe për atë çfarë përfaqësonte ky person, një mjek që i besojmë jetën.
Aq me tronditës ishte fakti se ky person në emrin e fesë muslimane, për dy vite ka mashtruar një vajzë të mitur, të varfer, të pambrojtur duke e keqpërdorur seksualisht ( me justifikimin se do e merrte për grua, ndonëse kirurgu poligam kishte dhe tre gra te tjera) se kështu ia lejon feja, kurani.
Por për fat të keq, kjo nuk është asgjë tjetër përveçse një përdhosje e fesë.
Njeriu që cilësohet si qenia e gjallë më e lartë, në librin e shenjtë të Kuranit, është degraduar, shfrytëzuar, keqpërdorur nga ky pseudobesimtarë në emrin e Allahut!
Ngjarja
Sipas njoftimit zyrtar të policisë, Dervish Hasi u arrestua pasi akuzohet se shfrytëzoi një shtetase të mitur, për prostitucion, për një periudhë 2-vjeçare.
“Shërbimet e Komisariatit të Policisë Nr. 1, pas kallëzimit të depozituar në komisariat, se një e mitur shfrytëzohej nga një shtetas, për prostitucion, menjëherë kanë organizuar punën për dokumentimin ligjor të rastit në fjalë dhe vënien e autorit përpara përgjegjësisë penale.Në vijim të veprimeve hetimore të kryera për këtë rast, specialistët për Hetimin e Krimeve të Komisariatit të Policisë Nr. 1 arrestuan shtetasin D. H., 42 vjeç, banues në Tiranë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme”, thuhej në njoftimin e policisë
Kanë qenë familjarët e 16-vjeçares të cilët kanë bërë denoncimin në polici, edhe pse ishin prej kohësh për marrëdhënien e vajzës së tyre me 42-vjeçarin. Familjarët e të miturës kanë deklaruar se kishin insistuar në shkëputjen e lidhjes mes 16-vjeçares dhe Hasit, por e mitura këmbëngulte se nëse kjo ndodhte, ajo do i jepte fund jetës.
E mitura nuk bashkëjetonte me mjekun, por shkonte shpesh në banesën e tij, ku familjarët e këtij të fundit ishin në dijeni për lidhjen e pazakontë dhe poligaminë.
Fillimisht në drejtim të policisë mbërriti një denoncim për shfrytëzimin e saj për prostitucion, teksa menjëherë blutë arritën të sigurojnë prova të plota përmes përgjimeve dhe komunikimeve që vajza e mitur ka kryer me 42-vjeçarin Hasi dhe një grup chat-i në të cilin flisnin dhe ndanin video intime të gjithë, bashkë më gratë e tjera të 42-vjeçarit.
Në duart e hetuesve janë prova të rëndësishme që vërtetojnë abuzimin me të miturën, për të cilën më herët nuk ishte kryer asnjë denoncim nga familjarët.
Në celularin e kardio-kirurgut të Sanatoriumit u gjetën video në një grup chat-i me përmbajtje seksuale, ku pjesë e tyre ishte edhe e mitura, të cilat janë një provë shumë e rëndësishme për hetuesit për ta zgjeruar edhe më tej këtë rrjet monstruoz.
Në të gjithë këtë situatë, Dervish Hasi e lidh me besimin, sidomos për mbajtjen e 2 a më shumë grave, ka detyruar policinë të nis një verifikim edhe për xhaminë që frekuentonte ai çdo ditë.
Dervishi Hasi ka deklaruar se vajzën nuk e ka detyruar njeri, dhe asnjëherë nuk është marrë me dhunë sikundër dhe vetë viktima e mitur ka pranuar se gjithçka ka ndodhur me dëshirë.
Por detyrimi nuk ka të bëjë vetëm me shantazhin apo përdorimin e forcës por dhe me manipulimin në emrin e fesë, një lavazh truri që u bëhet ketyre viktimave, me pretekstin se kështu “Zoti i tyre do të ishte i kënaqur ”.
Me profesion mjek, Hasi ka qenë edhe i hetuar nga SPAK. Prokuroria e Posaçme kishte dyshime se mjeku ishte i përfshirë në grupin që furnizonte me tritol dhe armë snajper kriminelë brenda dhe jashtë vendit.
Mbetet e habitshme fakti se personi i targetuar nga policia për mbajtje të armëve, trafik armësh dhe posedim të lëndëve plasëse, punonte i qetë në një spital.
Edhe njëherë kjo ngjarje nxjerr në pah deshtimin e një zingjiri institucionesh, pasi Dervish Hasi nuk do duhej të ishte në spital, madje as në xhamine, ku ai e kamuflonte veprimet e tij por në burg…
Indinjimi i bluzave të bardha
Mjeku Dervish Hasi i cili u arrestua nga policia për shkak të abuzimit seksual me një të mitur punonte në Sanatorium në shërbimin e kardiokirurgjisë prej vitit 2021. Për të është marrë vendim për pezullim të menjëhershëm nga puna pas arrestimit.
Anëtarë të stafit mjekësor pranë sanatoriumit shprehen të shokuar për ngjarjen që ka ndodhur, dhe thonë se qarkullonin zëra se Hasi, kishte më shumë se një grua, por kryerja e marrëdhënieve me një të mitur është e pakonceptueshme.
Një njollosje të bluzës së bardhë e konsideruan disa të tjerë, ndërsa u shprehën se për mjekët, dhe sidomos për kirurgët do duhej t’i nënshtroheshin një testi psikologjik. Raportohet se ai ka 7 fëmijë me 3 nga gratë.
Me gruan e parë e cila është dhe e vetmja martesë ligjore prej 20 vitesh ka tri fëmijë. Dy vajza pothuajse moshatare me të miturën, që e shfrytëzonte seksualisht prej dy vitesh, si edhe një djalë më të madh në moshë. Me dy gratë e tjera ka nga 2 fëmijë.
Një tjetër element i rëndë, që del nga hetimet e deritanishme, është momenti i njohjes së mjekut me vajzën, ku në mënyrë të drejtpërdrejtë njollos e përdhos bluzën e bardhë të mjekut.
Nga detajet e hetimit, rezulton se njohja me të miturën është bërë gjatë kohës që mamaja e saj do të operohej, dhe ky ka qenë kardiokirurgu që ka kryer ndërhyrjen.
Por nuk duhet të mjaftohet me kaq. Vallë a është shantazhuar vajza me kryerjen e atij operacioni të nënës së saj nga mjeku kirurg Dervish Hasi.
Janë shumë elemente që duhen hetuar ne kete ngjarje neveritese të kryer nga një prind, profesionist, intelektual, besimtar.
Sa neveri!
KMSH: Distancohemi nga çdo individ që keqpërdor fenë për qëllime të ulëta
Me të drejtë, Komuniteti Mysliman i Shqipërisë ka reguar lidhur me arrestimin e mjekut kardiokirurg Dervish Hasi praktikant i fesë myslimane, i akuzuar se abuzonte seksualisht me një 16 vjeçarre prej dy vitesh.
“Ne distancohemi nga çdo individ apo grup që keqpërdor fenë për qëllime të ulëta”, nënvizohet në deklaratë.
Në reagimin e saj, KMSH-ja thotë se e gjen të pavend interesimin e lartë për një çështje që nuk i përket këtij institucioni, por sipas saj organeve ligjzbatuese të shtetit shqiptar.
“Në përgjigje të pyetjeve të shumta nga mediat për rastin e arrestimit të një mjeku të dyshuar për abuzim dhe vepra të tjera sqarojmë sa më poshtë vijon: Komuniteti Mysliman i Shqipërisë është një institucion fetar, i cili ushtron aktivitetin e tij në përputhje me Kushtetutën dhe ligjet në fuqi të Republikës së Shqipërisë. Është institucion që merret me jetën fetare dhe përçimin e mesazhit të qartë e të pastër islam në vendin tonë, gjë të cilën prej një shekulli e ushtron në përputhje me parimet më të larta fetare dhe konform ligjeve të Republikës së Shqipërisë. Ne e gjejmë të pavend interesimin e lartë për një çështje që nuk i përket KMSh-së, por organeve ligjzbatuese të shtetit shqiptar”.
“Ne distancohemi nga çdo individ apo grup që keqpërdor fenë për qëllime të ulëtaNe distancohemi nga çdo individ që kryen akte të ulëta e të shëmtuara, aq më tepër duke u strukur pas besimit. Islami është fe e paqes, moralit të lartë dhe drejtësisë!”, përfundon reagimin KMSh-ja.
Sigurisht përkatësia fetare e Dervish Hasit dhe as praktimi i saj nuk e bën me faj Xhaminë, apo KMSH-në por mentalitetin, mesazhet e gabuara që përçohen nga njerëzit e pakualifikuar që flasin për Zotin.
Për fat të keq, shohim se si individë të veçantë në emër të fesë po përdhosin fenë dhe po në emër të fesë, po përdhosin qenien njerëzore. Një akt që duhet dënuar, jo vetëm nga shoqëria, organet ligjzbatuese por padiskutim dhe nga institucionet fetare.
© 2024 Argumentum
