Protesta me sloganin “Opozita në aksion” është organizuar para selisë së sallës së seancave plenare të Kuvendit të Shqipërisë, gjatë seancës parlamentare dhe pas përfundimit të saj, seancë e cila u përfshi përsëri nga tensionet.
Gjatë protestës së opozitës u shënuan edhe përplasje dhe incidente, pasi disa nga protestuesit kanë hedhur tymuese, si dhe u përplasën me punonjësit e policisë.
Kreu i grupit parlamentar të Partisë Demokratike, Gazment Bardhi në një prononcim për mediet, pas seancës plenare të Kuvendit, tha se, “as Garda dhe as policia nuk e ndal opozitën nga përballja dhe aksioni përballë regjimit të Ramës”.
“Me një urdhër të paligjshëm deputetët u penguan të futen në seancë. Edhe ndaj deputetëve që nuk kishte masë”, u shpreh Bardhi.
Sipas tij, vetëm me regjime autoritare ndodh që deputetët nuk lejohen të futen për të ushtruar mandatin.
“E paimagjinueshëm që deputetet të shqyhen nga xhaketa për t’u futur në seancë, por e shpjegueshme kur bëhet fjalë për një regjim të tillë. Por as Garda dhe as policia nuk e ndal opozitën nga përballja dhe aksioni përballë regjimit të Ramës. Do t’i bashkohem çdo proteste qytetare kundër regjimit të Edi Ramës”, tha Bardhi.
Në fund, protestuesit kanë marshuar drejt ndërtesës ku ndodhet banesa e ish-kryeministrit të Shqipërisë, Sali Berisha, ndaj të cilit është në fuqi masa “arrest në shtëpi”, i dyshuar sipas autoriteteve për korrupsion.
Ndërkohë, gjatë kohës së protestës dhe para nisjes së seancës parlamentare u shënuan tensione dhe përplasje mes deputetëve të opozitës dhe punonjësve të Gardës së Shqipërisë, në hyrje të sallës së seancave plenare.
Punonjësit e Gardës nuk kanë lejuar të hyjnë në sallë disa deputetë të opozitës të përjashtuar nga punimet e parlamentit për shkak të tensioneve në seancat e kaluara, ndërkohë disa deputetë kanë hyrë me forcë në sallën e seancave plenare.
Deputetët e opozitës nuk kanë lejuar vazhdimin e diskutimeve në seancë, pasi janë përplasur me punonjësit e Gardës, ndërkohë seanca kishte në rendin e ditës diskutimet për çështjet e evidentuara në zonat zgjedhore të deputetëve.
Në mes të tensioneve, disa deputetë të partisë në pushtet, Partisë Socialiste të Shqipërisë, diskutuan për disa çështje të evidentuara nga zgjedhësit dhe çështje të tjera, ndërsa për shkak të tensioneve seanca zgjati rreth 16 minuta dhe u mbyll nga kryeparlamentarja Lindita Nikolla.
Deputetët e opozitës nga Partia Demokratike (PD) dhe jashtë grupeve parlamentare vazhdojnë bllokimin e diskutimeve në seancat parlamentare dhe komisionet parlamentare, sipas tyre për të kërkuar “respektimin e të drejtave të tyre”.
Qëndrimet e deputetëve të opozitës në seancat e fundit parlamentare janë në vazhdën e tensioneve në Kuvend që në fund të vitit 2023. Seancat e Kuvendit të Shqipërisë në muajit e fundit të vitit të kaluar dhe në fillim të këtij viti u përfshinë nga tensionet, pasi sipas deputetëve të opozitës nuk respektohen të drejtat e tyre dhe nuk miratohen në Kuvend nismat dhe kërkesat e tyre.
Ish-kryeministri Sali Berisha ka paralajmëruar mbajtjen e një proteste të madhe në datën 20 shkurt.
Lajmin Berisha e bëri të ditur në fjalën e tij para mbështetësve të mbledhur poshtë banesës së tij, pasi protestuan për disa minuta para Parlamentit.
“Më 20 shkurt, Shqipëria në Tiranë në ditën anti-tirani, në ditën anti-Edvin, në ditën kundër krimit, kundër dhunimit të votës, për dinjitetin e Shqipërisë, për dinjitetin e shqiptarëve.
20 shkurti është dita e triumfit tonë, është dita e dridhjes në themele të pushtetit të krimit, të pushtetit të drogës, të monizmit të Edi Ramës.
Demokrate e demokratë, simbolet e krimit, simbolet e monizmit, simbolet e poshtërimit të shqiptarëve janë Parlamenti Rama-Linda, Kryeministria e Edvin Kristaq Xhelati, SKAP-i i Altin Dumanit, Surreli i Edvin Kristaq Xhelatit”, tha Berisha gjatë fjalës së tij në dritare.
Protestat e opozitës po vijojnë me pretendimin se deputetëve demokratë po u shkelen të drejtat parlamentare në Kuvend, ndërkohë që Berisha ndodhet në “arrest shtëpie” me akuzat për korrupsion në çështjen e privatizimit të ish-kompleksit Partizani.
