Gjermania do të kontribuojë me rreth 10 oficerë shtabi, avionë furnizimi me karburant në ajër dhe mbështetje logjistike në stërvitjen e parë ushtarake të “Koalicionit të të Vullnetshmëve” në mbështetje të Ukrainës, njoftoi një zëdhënës i Ministrisë gjermane të Mbrojtjes për agjencinë dpa.
Stërvitja, e planifikuar për në nëntor, do të zhvillohet në Poloni, në hapësirën ajrore mbi Rumaninë dhe në pjesën perëndimore të Detit të Zi.
Sipas zëdhënësit, pjesëmarrja gjermane është një “shenjë uniteti me partnerët”. Bundeswehri, ushtria gjermane, do të vërë në dispozicion deri në dy avionë transporti A400M, të pajisur për furnizim me karburant të avionëve të tjerë gjatë fluturimit. Avionët do të operojnë nga Gjermania.
Berlini do të ndihmojë gjithashtu në transportimin e trupave përmes territorit gjerman drejt zonës së stërvitjes, duke ofruar shërbime logjistike.
Stërvitja, e quajtur “Koalicja 2026”, do të testojë për herë të parë gatishmërinë operacionale të forcës shumëkombëshe që aleatët e Ukrainës po krijojnë nën drejtimin e Francës dhe Mbretërisë së Bashkuar. Synimi është që kjo forcë të ndihmojë në garantimin e një marrëveshjeje të mundshme paqeje me Rusinë. Koalicioni përbëhet nga rreth 35 vende.
Krijimi i kësaj force u ra dakord në një samit për Ukrainën, të mbajtur në Berlin në dhjetor 2025. Në mesin e korrikut, presidenti francez Emmanuel Macron deklaroi se forca ishte bërë operative dhe njoftoi se stërvitjet e para do të zhvilloheshin më vonë gjatë vitit në vende fqinje me Ukrainën.
Në atë kohë, Macron tha se stërvitjet synonin të demonstronin se aleatët ishin “të gatshëm, të vendosur dhe të besueshëm — në tokë, në ajër dhe në det”.
Megjithatë, përfshirja e plotë e Gjermanisë në forcën shumëkombëshe ende nuk është përcaktuar. Në korrik, kancelari Friedrich Merz deklaroi se qeveria dhe parlamenti gjerman do të vendosin për natyrën dhe përmasat e kontributit të vendit.
Ende nuk dihet saktësisht se sa ushtarë do të marrin pjesë në stërvitje. Në mesin e tetorit, gjatë një vizite në Uashington, ministri britanik i Mbrojtjes, Wes Streeting, foli për “mijëra” ushtarë.
Disa ditë më parë, gazeta britanike The Times raportoi se në stërvitje do të merrnin pjesë gjithsej 1.500 ushtarë francezë, britanikë dhe gjermanë, së bashku me trupa polake. Megjithatë, kjo shifër ende nuk është konfirmuar zyrtarisht./dpa-argumentum.al
