Ai erdhi në Prishtinë, sërishmi për të intriguar dhe mashtruar kosovarët. Por Kosova nuk reagon. Ka principet e veta ajo. “Miku në shtëpi nuk shahet”, thonë jo vetëm qytetarët, por edhe politikanët dhe shtetarët. Kjo ka të mirën e vet. Respekton një traditë të vyer të kombit tonë. Eshtë virtyt ta tolerosh dhe të mos e kritikosh “mikun” në shtëpinë tënde. Aq më tepër kur ky “mik” shpesh herë quhet vëlla! E priti presidentja e Republikës. Po ashtu kryeministri i vendit ia shtroi qilimin e kuq ndër këmbë. E nderuan dhe e respektuan aq shumë.
Po ky? Çfarë bëri? Rrejti, mashtroi, provokoi, ustalloi, qëndroi dhe foli si hilanjoz, pastaj iku, duke lënë pas hijet e hileve të veta. P.sh tha se “Milosheviçit dhe Dick Marty-t mos iu prehshin eshtrat në varr”! Ata e duartrokitën, e panë ndoshta edhe me mirësi. Sepse ngacmoi emocionet e njerëzve. Kur “trazon” eshtrat e armikut tënd në varre, gjithmonë trazon edhe shpirtin e viktimave të tyre. Por nuk qe fjala për viktimat e vërteta të Kosovës. Nuk u përmendën eshtrat e Miloshëviçit në kontekstin e 13-14 mijë viktimave që ai shkaktoi në Kosovë në tre muaj. As për 20 mijë viktimat e përdhunimit. As për eshtrat e shqiptarëve të pagjetur ende sot pas gati tri dekadave. Nuk bëhej fjalë gjithashtu për 80 mijë objekte, banesa e shtëpi banimi të djegura dhe të shkatërruara nga ushtria e policia e Milosheviçit. As për një million refugjatët shqiptarë të dëbuar dhunshëm! Këto nuk i ka dënuar akoma sot e kësaj ditë Edi Rama. Ai ka bllokuar një rezolutë në Kuvendin e Shqipërisë për dënimin e këtyre krimeve. Sepse zemrohet sivëllau i tij, Aleksandër Vuçiq!
Pse e mallkoi për së vdekuri Milosheviçin? Ç’lidhje ka ish krimineli serb me ngritjen e Gjykatës Speciale të Kosovës në Hagë?! Asnjë lidhje. Kjo gjykatë u ngrit në kohën e qeverisjes së Edi Ramës në Shqipëri dhe Hashim Thaçit në Kosovë. Madje me insistimin dhe presionin e të dyve. Marrëveshja për ngritjen e saj ishte bërë midis presidentit të Serbisë, Aleksandër Vuçiq me presidentin e Francës dhe me kryeministrin e Shqipërisë. Hashim Thaçi u shërbeu këtyre. Ngriti gjykatën, ku vetë është sot si akuzuar dhe mori në qafë edhe pak ish-komandantë të luftës. Ndërsa Edi Rama nuk guxon t’i thotë vëllaut të tij, Aleksandër Vuçiq, që mos gjettë paqe as në këtë jetë, aq në atë jetë. Nuk guxon as të aludojë për rolin e tij për ngritjen e gjykatës dhe sidomos të akuzës kundër Thaçit. Sepse po ta bëjë diçka të tillë, shefi i shtetit serb ia tregon vendin, ia publikon bisedat dhe marrëveshjet që kanë së bashku. Kjo ishte hipokrizia më e ndyer që ndodhi më 16 shkurt në Prishtinë.
Lidhur me atë që ndodh në Hagë ka edhe një hipokrizi tjetër të shëmtuar, shumë të shëmtuar që njollos edhe nderin e dinjitetin e shqiptarëve patriotë. Të gjithë e dimë se akuza ndaj Hashim Thaçit u publikua në fillim të qershorit 2020, ditën që ish-presidenti i Kosovës ndodhej në tranzitin e aerportit të Vjenës, në udhëtim për në SHBA. Publikimi i akuzës u shpall atë ditë me ndërhyrje politike të kancelares Merkel, sepse dihej që në SHBA nuk mund të udhëtonte dhe të formoste marrëveshje për ndryshim kufijsh një autoritet shtetëror me akuzë për “krime kundër njerëzimit”! Nisur edhe nga ky fakt akuza e tillë, për krime kundër njerëzimit, nuk qëndron. Është thjesht një akuzë politike. Po kush e detyroi Thaçin të lobojë, investohet dhe përpiqet për ndryshimin e kufijve dhe ndarjen e Kosovës? Ai ishte Edi Rama. Nuk ishte Aleksandër Vuçiq. Ky i fundit e kishte përgatit skenarin me kryeministrin e Shqipërisë dhe kryeministri i Shqipërisë kishte marrë përsipër rekrutimin e presidentit të Kosovës për ndarjen e Kosovës. Ju kujtohet besoj kur asokohe shkoi në parlamentin e Kosovës dhe propozoi zgjedhjen e një presidenti për të dy vendet. Ia kishte ofruar si kulaç Hashimit këtë post, vetëm që ai të ishte i gatshëm të lobonte dhe pranonte ndarjen e territorit të vendit të tij. I kishte thënë se “Kosova që mbetej pas ndarjes do të bashkohej me Shqipërinë dhe se Hashimi do të bëhej president I “Shqipërisë së bashkuar”! Por edhe e kishte frikësuar. Asokohe patëm mësuar se kryeministër i Shqipërisë kishte dërguar këshilltarin e tij, Baton Haxhiu, që t’i thoshte Thaçit se “Nëse ti nuk pranon projektin e ndarjes së Kosovës, amerikanët do të të dërgojnë në qelitë e Hagës”! Ishte heq si njeri që kishte marrëdhënie me amerikanët dhe që dinte se çfarë thonë ata. Në fakt këtë e kishte sajuar si hile të tij. Nuk kishte asgjë të vërtetë nga kjo!
Pas shkuarjes së Hashimit në Hagë angazhoi sërishmi Baton Haxhiun për të lansuar tezën serbe se “Nëse dënohet Thaçi dhe të tjerët, dënohet edhe UÇK! Madje këta formuluan logon “Liria ka emër”, duke e transferuar të vërtetën e luftës për liri nga Adem Jashari te Hashim Thaçi. “Liria ka emër” më parë shoqërohej me foton e legjendarit Adem Jashari, tani me foton e Hashimit. Një hile tjetër me regjisor kryeministrin e Shqipërisë dhe skenarist këshilltarin e tij, Batonin! Dhe hilet vazhdojnë. Ato kanë shënuar rekorde të papara në historinë e njerëzimit. E kanë kaluar shifrën e 99 hileve. Nuk pasohen as edhe nga ndonjë trimëri e vetme.
Tani “qan, përlotet, mallkon, betohet” në mbrojtje të viktimës së vet, Hashim Thaçit. Tani hiqet sikur i dhemb shpirti për ish-presidentin e Kosovës e madje edhe për Ushtrinë Çlirimtare të Kosovës dhe vetë Kosovën. Politika në Kosovë e duartroket! Ndoshta formalisht. Por ama e duartroket. Qytetarët janë në dilemë: – Kë të besojnë? Kryeministrin anti-shqiptar, që udhëhoqi projektin e ndarjes së Kosovës e të Open Balkan?! Që tha se veriu i Kosovës është tokë e askujt (shtator 2023)?! Që i bëri thirrje Europës t’i vendosë sanksione Kosovës (qershor 2023) dhe anuloi mbledhjen e përbashkët të dy qeverive me qëllim thyerjen e Albin Kurtit?! Kryeministrit që mbolli përçarje në klasën politike të Kosovës dhe vazhdon ta bëjë këtë edhe sot?! Apo fjalëve dhe lotëve të krokodilit që ai lëshon gjoja në mbrojtje të krerëve të UÇK-së në Hagë? Hashim Thaçi besoj e ka kuptuar hilenë dhe intrigën. Ka kuptuar se sa e rrezikshme është të bashkëpunosh me Edi Ramën.
Nëntëdhjetë e nëntë hilet e Edi Ramës nuk shoqërohen me asnjë trimëri. Të gjitha janë hile, janë hipokrizi, janë thika pas shpine për Kosovën. Ndaj dhe të gjithë ata liderë e politikanë që kanë ndonjë dilemë, do të duhet që të mos i besojnë hiles dhe intrigës, por të kthjellohen e së paku të dinë se çfarë përfaqëson kryeministri i Shqipërisë, Edi Rama! Cilido në Kosovë, pavarësisht nga posti, duhet të kuptojë se sa herë flet Edi Rama, aq herë thellon gropën në të cilën bien ata. Edhe presidentes do t’i duhet tani ta mbushë këtë gropë për shkak të hilesë tjetër të Edi Ramës për presionin dy vjeçar ndaj presidentes së vendit për kontrollin e zyrës së saj. Deklarata e Ramës e ve në siklet presidenten e Kosovës për të sqaruar publikun! Mjafton kjo hile dhe kjo intrigë, për të kuptuar se çdo fjalë e këtij të paudhi shkakton vetëm probleme. Jo për atë, por për të tjerët. Ndaj është e rrezikshme që Edi Ramën ta kesh “mik”!
/Argumentum.al
