Në pritjen e organizuar me rastin e Ditës së Rusisë, Ambasadori i Federatës Ruse në Shqipëri SHTZ. Alexey Zaitsev gjatë fjalës së tij përshëndetëse u ndal te zhvillimet ndërkombëtare, pozicioni i Rusisë në arenën globale dhe vizioni i Moskës për rendin botëror.
“Pa një Rusi të fortë, sovrane, krijimi i një rendi botëror të drejtë dhe të balancuar është i pamundur sot”, u shpreh ambasadori, duke e cilësuar rolin e Rusisë si të rëndësishëm në proceset aktuale ndërkombëtare.
Duke kujtuar 36-vjetorin e miratimit të Deklaratës së Sovranitetit Shtetëror të Rusisë, ambasadori tha se festa e 12 Qershorit “simbolizon jo vetëm zhvillimin modern të Rusisë, por edhe të gjithë historinë e saj shumëshekullore”, një rrugëtim që sipas tij është karakterizuar nga sprova, por edhe nga “arritje, suksese dhe fitore të mëdha”.
“Sot Rusia ndodhet në ballë të luftës për formimin e një rendi botëror shumëpolar të ri, më të drejtë dhe të ekuilibruar, duke u ofruar një alternativë tjetër ambicieve neokoloniale të Perëndimit, duke mbrojtur të vërtetën dhe drejtësinë, duke mbështetur vlerat tradicionale”, theksoi Ambasadori.
Diplomati rus foli gjithashtu për sfidat me të cilat përballet vendi i tij në kontekstin e konfliktit në Ukrainë. Ai deklaroi se “të gjitha forcat e Perëndimit janë të përqendruara në përmbajtjen e Rusisë”, ndërsa akuzoi disa vende perëndimore se synojnë t’i shkaktojnë Moskës një “humbje strategjike” dhe po punojnë për zgjatjen e luftës.
Sipas ambasadorit, sanksionet dhe presioni ekonomik ndaj Rusisë nuk kanë arritur objektivat e tyre. “Pritjet e Perëndimit për një kolaps të ekonomisë ruse dhe një destabilizim të shoqërisë nuk u justifikuan”, tha ai, duke shtuar se Rusia “mbetet një fuqi në zhvillim dinamik, me tregues makroekonomikë të qëndrueshëm”.
Në fjalën e tij, ambasadori vuri në dukje zgjerimin e bashkëpunimit të Rusisë me vendet e ashtuquajtura të Jugut Global dhe theksoi se përpjekjet për izolimin ndërkombëtar të Moskës kanë dështuar. “Rusia po forcon rolin e saj si një pjesëmarrëse aktive dhe e rëndësishme e bashkësisë ndërkombëtare”, deklaroi ai.
Një vend të veçantë në fjalim zuri edhe grupimi BRICS. Ambasadori theksoi se “rëndësia dhe pesha e BRICS, hallka kryesore në ndërtimin e një rendi të ri botëror shumëpolar po rritet çdo vit e më shumë”. Ai përmendi gjithashtu rëndësinë e bashkëpunimit në kuadër të organizatave si SCO, EAEU, CIS dhe CSTO.
Pritja e organizuar në Tiranë mblodhi përfaqësues të trupit diplomatik, institucioneve shqiptare, botës akademike, figurave të jetës kulturore, gazetarëve, anëtarëve të Shoqatës së Miqësisë “Shqipëri–Rusi”, si dhe bashkatdhetarëve që jetojnë në Shqipëri.
Fjala përshëndetëse e Ambasadorit të Rusisë në Shqipëri në pritjen me rastin e Ditës së Rusisë
Të nderuar mysafirë,
Të dashur miq dhe kolegë!
36 vjet më parë, më 12 qershor 1990 u miratua Deklarata e Sovranitetit Shtetëror të Rusisë, e cila shënoi fillimin e një epoke të re për vendin tonë.
Festa e sotme simbolizon jo vetëm zhvillimin modern të Rusisë, por edhe të gjithë historinë e saj shumëshekullore, rrugën e pandërprerë të shtetësisë, gjatë së cilës periudha sprovash dhe tronditjesh janë ndërthurur me arritje, suksese dhe fitore të mëdha.
Sot Rusia ndodhet në ballë të luftës për formimin e një rendi botëror shumëpolar të ri, më të drejtë dhe të ekuilibruar, duke u ofruar një alternativë tjetër ambicieve neokoloniale të Perëndimit, duke mbrojtur të vërtetën dhe drejtësinë, duke mbështetur vlerat tradicionale.
Konfrontimi, me të cilin përballet vendi ynë është kolosal. Të gjitha forcat e Perëndimit janë të përqendruara në përmbajtjen e Rusisë. Një sërë vendesh kanë shpallur si qëllim të tyre shkaktimin e një “humbjeje strategjike” Rusisë në fushën e betejës dhe po bëjnë gjithçka të mundur për të zgjatur konfliktin në Ukrainë. Për hir të këtij qëllimi po minohen përpjekjet për paqe, pavarësisht faktit, nëse këto nisma vijnë nga Moska, Uashingtoni apo kryeqytete të tjera. Një program në shkallë të gjerë i militarizimit të ekonomisë evropiane ka nisur dhe po hartohen plane për rrëmbimin e aseteve financiare të ngrira ruse. Numri i kufizimeve antiruse ka tejkaluar shifrën 30 mijë.
Pritjet e Perëndimit për një veprim të menjëhershëm të kufizimeve, për një kolaps të ekonomisë ruse dhe një destabilizim të shoqërisë nuk u justifikuan. Pavarësisht presionit të paprecedentë nga jashtë, Rusia mbetet një fuqi në zhvillim dinamik, me tregues makroekonomikë të qëndrueshëm. Përpjekjet për një izolim ndërkombëtar të vendit tonë dështuan: Rusia po forcon rolin e saj si një pjesëmarrëse aktive dhe e rëndësishme e bashkësisë ndërkombëtare, po thellon bashkëpunimin me partnerë me një qasje konstruktive, po zhvillon në mënyrë intensive ndërveprimin me vendet e Jugut Global, duke u ofruar një dialog ndërqytetërues në vend të qasjes neokolonialiste të Perëndimit.
Moska zë pozita kyçe në organizatat ndërkombëtare, bashkimet integruese rajonale dhe globale. Rëndësia dhe pesha e BRICS – hallka kryesore në ndërtimin e një rendi të ri botëror shumëpolar po rritet çdo vit e më shumë. Një vëmendje e konsiderueshme po i kushtohet zhvillimit të bashkëpunimit brenda SCO-së, EAEU-së, CIS-it dhe CSTO-së, në të cilën Rusia kryeson këtë vit. Në të gjitha forumet e disponueshme mbështesim zhvillimin e bashkëpunimit të barabartë me dobi të ndërsjellë dhe krijimin e një arkitekture të sigurisë së barabartë dhe të pandashme.
Pa një Rusi të fortë, sovrane, krijimi i një rendi botëror të drejtë dhe të balancuar është i pamundur sot.
Fuqia e shtetit tonë qëndron në kohezionin dhe unitetin e popullit të tij, çelësi i prosperitetit të Atdheut – në harmoninë qytetare, punën krijuese, respektin për traditat dhe nderimin e kujtimit të të parëve tanë. Festa e sotme na lejon të ndihemi të lidhur me të kaluarën dhe të shikojmë drejt së ardhmes me frymëzim.
Dua të uroj me rastin e Ditës së Rusisë miqtë e vendit tonë – ata që ushqejnë ndjenja të mira njerëzore për vendin tonë, e duan dhe e vlerësojnë kulturën ruse, që kanë lidhje familjare me qytetarë rusë dhe që, pavarësisht gjithçkaje, dëshirojnë me sinqeritet një bashkëpunim të frytshëm me Rusinë!
Gëzuar festën, të dashur miq!
© 2026 Argumentum
