Prof. Dr. Enver Bytyçi
Në Tiranë, në Shkodër dhe qytete të tjera të Shqipërisë, si dhe në diasporë, kanë shpërthyer protestat anti-qeveritare me logon “Shqipëria nuk është në shitje”! Kjo logo dhe disa parulla të tjera si “Shqipëria e shqiptarëve, jo e tradhtarëve” janë bërë motivi i këtyre protestave të rinisë dhe qytetarëve shqiptarë. Eshtë logoja që i bashkon të gjithë në protestë, pavarësisht bindjeve politike, dallimeve krahinore dhe besimeve fetare. Të gjithë ndjehen të obliguar dhe të nderuar të japin një kontribut modest për të realizuar qëllimin e protestës, për ta ndaluar shitjen copa-copa të atdheut tonë të përbashkët, Shqipërisë sonë të dashur. Pra për ta larguar këtë qeveri, këtë qeverisje dekadash dhe këtë kryeministër.
E përkthyer në shqip logoja e protestës i kundërvihet politikave autokratike, me të cilat operon qeveria e Shqipërisë për shitjen e vendit. U nis me marrëveshjen Rama-Meloni për refugjatët që i drejtohen Italisë dhe me të cilën Rama doli garant që këta refugjatë në vend të shkojnë për aty ku janë nisur (Itali), të zhvendosen në Shqipëri (Shëngjin dhe Gjadër-Lezhë). Me marrëveshjen në fjalë iu dha Italisë një territor i caktuar, i konsideruar si ekstra-territor, i cili administrohet nga autoritetet iraliane të sigurisë. Kjo marrëveshje u miratua me urdhër kryeministror në parlamentin e Shqipërisë dhe po ashtu nuk u revokua nga ana e Gjykatës Kushtetuese. Këtu nisi mekanizmi autoritar për të realizuar serinë e marrëveshjeve që venë në shitje territoret e Shqipërisë, duke ardhur te Sazani dhe Zvërneci. Ana më e rrezikshme e këtyre marrëveshjeve lidhet se Shqipëria shitet për interesat e pushtetit të kryeministrit të saj. Pra Edi Rama jep një copë Shqipërie për të zgjat jetën e vet në krye të ekzekutivit shqiptar.
Nisur nga këto veprime anti-shqiptare rinia shpërtheu. Nuk mundi ta durojë më arrogancën e pushtetit në administrimin e territorit dhe të popullsisë së Shqipërisë. Protestat po hyjnë në dhjetëditëshin e tretë. Mekanizmi i vetëm që ta ndalojë pushtetin e plotfuqishëm të sillet me shqiptarët dhe me Shqipërinë siç sillen pushtuesit, ose më keq se ata. Në këto protesta kemi vënë re një ringjallje të patriotizmit shqiptar. Një ripërtëritje të ndërgjegjes kombëtare. Dhe një solidarizim të jashtëzakonshëm për ta penguar “shitjen e Shqipërisë”! Atdhetarizmi është në shkallën më të lartë. Ndërkohë që globalistët e kanë krahasuar qëndresën e rinisë së sotme si “rikthim në kohën e izolimit hoxhist”, duke iu referuar parullës “Shqipëria e shqiptarëve, jo e tradhtarëve”! Kjo parullë është lexuar dhe interpretuar edhe nga kryeministri Rama si qëndrim kundër investimeve të huaja!
Në këtë duel ka njerëz, edhe intelektualë, që bërtasin me të madhe dhe hakërrehen në mesin e protestuesve, duke akuzuar për provokim, spiunazh, armiq të fshehur, tradhtarë dhe ku e di se çfarë tjetër. E bëjnë këtë në emër të “dashurisë për atdheun”, madje duke numëruar dekoratat patriotike që njëri ose tjetri ka për atdhetarizëm. Gjithçka do ta marrim të mirëqenë. Pra, se njerëz të tillë janë patriotë dhe e duan Shqipërinë. Por a dinë ata ta duan atdheun? Mendoj se jo. Fuqia e atdheut, pra e Shqipërisë sonë qëndron te bashkimi i të gjithëve në qëllimin kryesor, ndalimin e shitjes së saj. Bashkimi i të gjithëve kërkon vëmendje, por para së gjithash tolerancë dhe bashkëjetesë. Nëse dikush pret që shqiptarët që bashkohen të jenë të të njëjtës bindjeje politike, përkatësie krahinore ose besimi fetar, atëherë kjo është përçarje.
Përçarja dhe dasitë janë shkaku kryesor pse ne shqiptarët kemi dështuar në shumë epoka historike. Shembujt janë të shumtë, por po jap vetëm një fakt. Kur Shqipëria u shkëput nga perandoria osmane dhe krijoi shtetin e saj, kryengritjet që u bënë ishin të copëzuara. Në asnjë rast nuk pati solidarizim mbarëkombëtar për t’u çliruar nga perandoria në fjalë. Ndaj u vonuam në histori, derisa katër shtetet ballkanike fqinje krijuan Aleancën anti-shqiptare Ballkanike. Ka edhe shumë shembuj të tjerë të kësaj natyre. Prandaj dhe duhet të dimë ta duam atdheun. Duhet të tolerojmë mendimin ndryshe, të respektojmë secilin që vjen dhe kontribuon në protestë, të përdorim të gjitha potencialet intelektuale që t’i afrojmë dhe jo t’i largojmë njerëzit. Krijimi i frymës përçarëse shkon në favor të atyre që duan ta copëtojnë vendin tonë. Bashkimi na bën të fuqishëm dhe vetëm të bashkuar mund ta mundim shkaktarin e shitjes së Shqipërisë, Edi Ramën!
© 2026 Argumentum
