Shtatë Kongresmenë në SHBA i kanë dërguar një letër Presidentit Joe Biden ku i bëjnë thirrje të ndërhyjë për situatën politike dhe korrupsionin e lartë në Serbi.
Sipas tyre kjo mund të ketë ndikim në Ballkanin Perëndimor dhe gjithë Evropën ndaj kërkojnë që të veprohet me ligjin për shpalljen “non grata” të personave që rrezikojnë stabilitetin e rajonit.
“Raportet tregojnë se Presidenti Vuçiç e ka thelluar korrupsionin në Serbi, duke përdorur krizën e COVID-19 si justifikim për shpenzimet e qeverisë”, thuhet në letrën e dërguar Presidentit të SHBA më 5 nëntor.
Kongresmenët nënvizojnë se mediat pranë qeverisë kanë marrëdhënie të ndërsjellë duke i shërbyer pushtetit dhe përfituar financiarisht nga ana tjetër.
“Ne besojmë që SHBA duhet të ndërmarrë veprime për të mbrapsur korrupsionin dhe sulmet ndaj lirisë së medias në Serbi”, thuhet nga kongresmenët.
Në letër përmendet fakti se televizioni i madh privat në Serbi, Pink TV gjatë viteve 2014-2016 ka marrë të paktën 7 milionë euro hua nga qeveria dhe ky televizion e ka favorizuar dukshëm Vuçiç gjatë fushatës zgjedhore.
Kjo situatë, thonë kongresmenët, dëmton normat e demokracisë, u mbyll gojën kritikëve dhe fuqizon personat e korruptuar.
Për zgjedhjet presidenciale dhe parlamentare që Serbia pritet të mbajë në pranverë, ligjvënësit amerikanë i kërkojnë Biden që të sigurohet që procesi të jetë i lirë dhe i ndershme përfshirë fushatën dhe procesin e votimit.
“Për të pasur një të ardhme më optimiste, ne besojmë se veprime të mëtejshme diplomatike nga SHBA dhe aleatët Evropian, është vendimtare për të garantuar se Serbia mund të jetë efektive në zbatimin e reformave demokratike. Kjo do të sjellë përmirësim të marrëdhënieve mes shteteve në Ballkanin Perëndimor përfshirë Kosovën”, shprehen kongresmenët.
Ndërkohë Presidenti i Serbisë Aleksandar Vuçiç ka reaguar pas letrës së kongresmenëve amerikanë drejtuar presidentit Joe Biden. Në këtë letër, shtatë kongresmenë në SHBA i kanë kërkuar Joe Biden të ndërhyjë për situatën politike dhe korrupsionin e lartë në Serbi.
Presidenti serb është shprehur për këtë se vendimin përfundimtar do ta marrin qytetarët e Serbisë.
“I lus që të më ngrijnë pronën jashtë vendit. Nuk mund të gjeni as një, sepse nuk e kam jashtë vendit”, tha Vuçiq, duke iu përgjigjur pyetjeve të gazetarëve.
Vuçiq tha se kërkesa është nënshkruar nga disa kongresistë të Partisë Demokratike dhe se (letra) është “njëpartiake”, dhe se do të shihet se sa kongresistë do ta nënshkruajnë “rezolutën” serbe në muajin e ardhshëm.
“Të shohim sa miq ka Serbia në Kongresin amerikan”, tha Vuçiq.
Lidhur me faktin se Serbia nuk është në mesin e vendeve të ftuara në Samitin online për Demokraci, të organizuar nga presidenti Biden, Vuçiq tha se “secili ka të drejtë të vlerësojë demokracinë e dikujt tjetër ashtu siç dëshiron. ”
