EKSKLUZIVISHT PER ARGUMENTUM
Nga DR. Jorgji KOTE
Forumi Ekonomik Botëror me seli në Davos, në Alpet e Zvicrës njihet botërisht. Është organizata informale më e madhe planetare për aspektet më madhore dhe më të nxehta politike, eonomike, sociale dhe diplomatike. Ai zhvillohet vetëm disa ditë përpara «binjakut » të tij, Konferencës Ndërkobëtare të Sigurisë së Munihut, e krijuar në vitin 1963. Të gjitha përpjekjet e deritanishme për të konkuruar apo dubluar dy këto forume kanë dështuar. Në vitin 1991 një jurist zviceran krijoi Forimin e Krans Montanës, duke ëprfituar nga shembja e Murit të Berlinit dhe ribashkimi europian; dhe ai me të njëjtën natyrë dhe në një pikë tjetër turistike alpesh, por pas shumë vitesh « u dorëzua » përpara Davosit. Ndonëse aty nuk merret asnjë lloj vendimi, Davosi shërben si pika informale më e madhe e takimit të elitës politike dhe ekonomike botërore për trajtimin, « matjen e pulsit » dhe « kolaudimin » e dosjeve delikate të politikës botërore. Rrjedhimisht, shumë vendime jetike gjeopolitike që merren më vonë e kanë zanafillën dhe janë « kopsitur » pikërisht në Davos.
Ky Forum ofron shumë përparësi dhe lehtësi atje në lartësitë e Alpeve zvicerane, në qetësi dhe mjedise të lirshme, pa protokoll dhe larg zhurmës mediatike. Vitet e fundit aty ka patur dhe një panel të posaçëm kushtuar zgjerimit të BE-së dhe Ballkanit Perendimor. Mirëpo, meqenëse liderët e rajonit tonë takohen pothuajse çdo javëndërmjet tyre në lloj lloj samitesh dhe takimesh rajonale dhe ndërkombëtare, Davosi është më tepër një largim nga zhurma rajonale dhe një shetitje e bukur alpinistike.
Në Forumin e vitit 2025 morën pjesë mbi 3000 delegatë nga 130 vende të botës, ndërmjet të cilave 50 kryetarë shtetesh dhe qeverish, dhjetra ministra dhe qindra ekspertë të fushave përkatëse. Vendi ynë u përfaqësua për herë të parë në atë Forum në shkurt 1991 me Kryeministrin e sapozgjedhur të asaj kohe, Fatos Nano.
Themeluesi i Forumit të Davosit është gjermani Claus Schëabe. Në vitin 1971, ekonomisti i atëhershëm 33 vjeçar themeloi atë që njihej si « European Managament Forum ( Forumi Europian i Menaxhimit) me qëllim organizimin e seminareve dhe trajnimeve në rrethe të ngushta e të vogla ekspertësh. Gjithsesi, fama e tij filloi të përhapej nga viti 1987, kur Schwabe e emërtoi « Forumi Ekonomik Botëror » i njohur shkurt si Forumi i Davosit.
Në fakt, takimet vjetore që zhvillohen në dhjetëditëshin e tretë të muajit Janar shënojnë kulmin e aktivitetit të tij. Ndërkohë, Davosi boton njoftime, studime dhe raporte të shumta, të cilat shërbejnë si pika referimi për të gjitha ekonomitë e botës, sidomos në drejtim të promovimit të investimeve të huaja.
Mirëpo, javët e fundit, Davosi është tronditur nga disa afera dhe skandale në qendër të të cilave është vetë themeluesi dhe shefi i tij historik, 87 vjeçari Claus Schwabe. Disa muaj më parë, një « bilbilfryrës » brenda Forumit njoftoi për disa abuzime të Schwabe me fondet e Forumit, duke filluar nga udhëtime të shtrenjta dhe deri te masazhet e shtrenjta në hotele luksoze, shfrytëzimin vetëm prej familjes së tij të një vile luksoze buzë Liqenit të Gjenevës, etj.
Mbi këtë bazë, dy nga tre anëtarë që ka Komisioni i Vigjilencës i këtij forumi, konfirmuan akuzat për përzierjen e funksioneve të tij profesionale me interesat private dhe familjare. Schëabe i mohoi akuzat, duke kërcënuar me maile të dy këta anëtarë. Por maili u shpërnda te të 27 anëtarët e Këshillit Mbikqyrës, të cilët u hodhën të gjithë kundër shefit të tyre, duke kërkuar hetimin e tyre të brendshëm dhe akuzave të tjera të rënda ndaj tij dhe pjestarëve të familjes.
Më konkretisht, gruaja e tij, Hilda Schwabe kishte krijuar dhe kryesonte seksionin e programeve kulturore, por dha dorëheqjen dhjetorin e kaluar. Edhe bija e tyre, Nicol e cila drejtonte « Rrjetin e liderëve të Rinj Globalë ( Young Global Leaders) dha dorëheqjen dhjetorin e kaluar. Ashtu si djali i tyre, Olivieri , dhe ai i punësuar aty që u largua pas akuzave për ngacmime seksuale të një bashkëpunëtoreje.
Këto akuza janë bërë publike nga media zvicerane, amerikane, britanike, franceze, etj. Ditët e fundit, prestigjiozja « Financial Times » ka njoftuar dhe për manipulime të ndryshme të bëra nga Schwabe dhe të tjerë me Raportin vjetor të Forumit “Global Competitiveness Report( Raporti Vjetor mbi konkurueshmërinë) Ky është ndër të paktët raporte prestigjioze dhe të pavarura nga ky Forum, që shërben si pikë e domosdoshme reference dhe imazhi për qeveritë dhe aktorët e tjerë ekonomikë dhe financiarë në të gjithë botën.
Dhe si të mos mjaftonin këto, Schwabe ka kërkuar, veç të tjerash, dëmshpërblim në miliona Euro për të kompensuar pagat, sipas tij, më të ulta në vitet e para të funksionimit të këtij Forumi.
I ndodhur në këtë trysni dhe rrebesh akuzash, përfshirë dhe vokacionin e tij majtist dhe sorosian ( Soros ka qenë zëvendës i tij deri vonë) Claus Schwab në fund të muajit prill u detyrua të jepte dorëheqjen. Megjithatë, ndaj tij kanë nisur hetimet, të cilat po hedhin hije të mëdha dyshimi dhe mbi vetë Forumin Botëror të Davosit, imazhin dhe prestigjin e tij në botë.
Së fundi, këto akuza dhe hetime vijnë pas kritikave dhe protestave të shumta ndaj Davosit për shpenzimet e larta, luksin e shfrenuar dhe deri në akuza për orgji në mjesdiset e tij, ndotja e mjedisit për shkak të fluturimeve të panumurta me çarter të liderëve botërorë dhe në përgjithësi shkëputjes së tij nga realitetet e hidhura poshtë Alpeve.
Urojmë që këto afera dhe akuza të mos shtohen sepse ndryshe emri, fama, autoriteti dhe prestigji i këtij Forumi do të bintë përtokë.
© 2025 Argumentum
