Ambasada e Shtetit të Palestinës në Shqipëri përkujtoi 77-vjetorin e Nakbës – një moment historik i rëndësishëm për popullin palestinez që përkujton shpërnguljen masive dhe dhunën që pasoi krijimin e shtetit të Izraelit në vitin 1948, përmes organizimit të një shfaqjeje të filmit dokumentar “Tantura”.
Ky fim-dokumentar trajton masakrat dhe aktet e gjenocidit të kryera nga forcat pushtuese ndaj popullit palestinez. Në këtë aktivitet morën pjesë një numër i konsiderueshëm diplomatësh arabë dhe ndërkombëtarë, përfaqësues të komunitetit palestinez, si dhe mbështetës të kauzës palestineze, të cilët shprehën solidaritetin dhe mbështetjen e tyre për të drejtat dhe aspiratat legjitime të popullit palestinez.
Në fjalën e tij përshëndetëse, Ambasadori i Shtetit të Palestinës në Shqipëri, z. Sami Mhanna, falënderoi të gjithë pjesëmarrësit për solidaritetin e tyre të sinqertë dhe të vazhdueshëm. Ai theksoi se populli palestinez ka përjetuar jo vetëm një Nakbë, por dy Nakba: e para në vitin 1948, me dëbimin me forcë të qindra mijëra palestinezëve dhe çrrënjosjen e tyre nga atdheu, dhe e dyta që vijon ende sot, përmes gjenocidit në Rripin e Gazës, kolonizimit të vazhdueshëm dhe shkeljeve të rënda të të drejtave të njeriut dhe të drejtës ndërkombëtare.
Rreth filmit “Tantura”
Filmi dokumentar “Tantura” (2022), me regji nga Alon Schwarz, trajton një nga episodet më të errëta dhe të kontestuara të historisë moderne izraelito-palestineze – masakrën në fshatin palestinez Tantura gjatë luftës së vitit 1948. Filmi ndjek dëshminë tronditëse të ish-ushtarit izraelit Teddy Katz, i cili në vitet ‘90 zbuloi përmes intervistave me veteranë të brigadës Alexandroni se në Tantura ishin vrarë dhjetëra civilë palestinezë pasi forcat izraelite morën kontrollin e zonës.
Filmi nxit reflektim të thellë mbi mekanizmat e mohimit historik, përgjegjësinë morale dhe domosdoshmërinë e njohjes së së kaluarës për të ndërtuar një të ardhme të drejtë dhe paqësore.
Përmes kësaj shfaqjeje, Ambasada synoi jo vetëm të nderojë kujtimin e viktimave të Nakbës, por edhe të forcojë ndërgjegjësimin publik ndërkombëtar për padrejtësitë që vazhdojnë të rëndojnë mbi popullin palestinez.
Kujtojmë se që nga 7 tetori 2023, Gaza ndodhet në një krizë ekstreme pas fillimit të ofensivës izraelite ndaj Hamasit, me pasoja katastrofike për popullsinë civile. Mbi 54,000 palestinezë janë vrarë dhe më shumë se 1.8 milionë janë zhvendosur nga shtëpitë e tyre, ndërsa qytete si Gaza City, Khan Yunis dhe Rafah janë shkatërruar pothuajse plotësisht. Bllokada ka paralizuar shërbimet bazë si energjia, uji dhe sistemi shëndetësor, ndërkohë që mungesa e ushqimit ka çuar në rritje dramatike të çmimeve dhe përhapje të urisë.
Ndërkohë, komuniteti ndërkombëtar është përballur me kritika për mungesë veprimi të vendosur, edhe pse janë bërë thirrje për armëpushim dhe ndihmë humanitare, fuqitë kryesore si SHBA, BE dhe vendet arabe kanë pasur ndikim të kufizuar në ndalimin e përshkallëzimit të dhunës. Mbështetja e pakushtëzuar për Izraelin nga disa shtete perëndimore ka dobësuar besimin e palestinezëve në rolin ndërmjetësues të këtyre vendeve, ndërsa propozimet për zgjidhje të qëndrueshme duken gjithnjë e më shumë simbolike sesa praktike. Ndikimi ndërkombëtar, ndonëse i pranishëm në deklarata dhe ndihma emergjente, nuk ka arritur ende të ndryshojë rrjedhën e konfliktit apo të rivendosë një horizont politik për zgjidhje afatgjatë.
/Argumentum.al
