Qytetarët e Bosnjë-Hercegovinës votojnë sot, 4 tetor, në zgjedhjet e përgjithshme që do të përcaktojnë përbërjen e Presidencës treanëtarëshe, Parlamentit dhe institucioneve të dy entiteteve të vendit.
Rreth 3.4 milionë votues janë të regjistruar për të marrë pjesë në zgjedhje, të cilat zhvillohen në një sistem politik të ndërtuar mbi marrëveshjen e Dejtonit të vitit 1995. Votuesit zgjedhin përfaqësuesin boshnjak, serb dhe kroat në Presidencën kolektive, deputetët e Parlamentit shtetëror, si dhe përfaqësuesit në institucionet e Federatës së Bosnjë-Hercegovinës dhe Republika Srpska.
Në total, janë në garë 7,028 kandidatë për 518 poste të zgjedhshme në nivele të ndryshme të qeverisjes. Qendrat e votimit janë hapur në orën 07:00 dhe mbyllen në 19:00.
Zgjedhjet zhvillohen në një klimë të tensionuar politike, me ndarje të thella mes tre komuniteteve kryesore, boshnjakëve, serbëve dhe kroatëve. Në qendër të garës janë edhe e ardhmja e marrëdhënieve me Bashkimin Evropian, funksionimi i institucioneve shtetërore dhe ndikimi i fuqive të jashtme, veçanërisht SHBA-së dhe Rusisë.
Një risi e këtyre zgjedhjeve është përdorimi për herë të parë në shkallë kombëtare i identifikimit biometrik të votuesve dhe skanerëve elektronikë të fletëve të votimit, të vendosur për të rritur sigurinë dhe besueshmërinë e procesit.
Votimi i sotëm shihet si një test i rëndësishëm për stabilitetin politik të Bosnjë-Hercegovinës dhe për orientimin e saj të ardhshëm evropian.
© 2026 Argumentum
