Për të dymbëdhjetën ditë radhazi, qindra të rinj dhe qytetarë janë mbledhur këtë mbrëmje në qendër të Tiranës, duke vijuar protestën që nisi kundër projektit të planifikuar në Zvërnec dhe që tashmë është shndërruar në një lëvizje më të gjerë me kërkesa politike dhe qytetare.
Ashtu si në mbrëmjet e kaluara, grumbullimi nisi në sheshin “Skënderbej”, ndërsa më pas protestuesit u nisën në marshim përgjatë rrugëve kryesore të kryeqytetit. Me flamuj kombëtarë, pankarta dhe thirrje që jehonin në bulevard, pjesëmarrësit po përcjellin mesazhe kundër korrupsionit, kërkojnë hetimin e pasurive të politikanëve dhe kundërshtojnë atë që e cilësojnë si tjetërsim të pasurive publike dhe kombëtare.
“Nesër më shumë”, “Pa rini nuk ka Shqipëri”, “Shqipëria e shqiptarëve” dhe “Shqipëri e re” janë ndër sloganet që po shoqërojnë marshimin e kësaj mbrëmjeje, ndërsa kolona e protestuesve lëviz në disa prej akseve kryesore të Tiranës.
Ndryshe nga ditët e para, kur fokusi ishte kryesisht te projekti në Zvërnec, protesta ka marrë gradualisht një karakter më të gjerë, duke përfshirë pakënaqësi të ndryshme sociale dhe politike. Organizatorët dhe pjesëmarrësit thonë se synimi është të mbahet gjallë presioni publik dhe të dëgjohet zëri i të rinjve.
Marshimi po vijon ende në rrugët e kryeqytetit dhe pritet të përfundojë pas mesnate. Protestuesit kanë paralajmëruar se do të rikthehen sërish edhe nesër, duke e bërë këtë një nga mobilizimet qytetare më të gjata të muajve të fundit në Tiranë.
© 2026 Argumentum
