Të enjten u mbyll në Shangai Forumi “Lujiazui” për vitin 2026, ku politikëbërësit, bankierët dhe investitorët globalë shprehën gjerësisht besim te rritja e drejtuar nga teknologjia e Kinës, si edhe te mundësitë për zgjerimin e investimeve në sektorët e drejtuar nga risitë.
Nga reformat e tregut të kapitalit dhe përmirësimet në shërbimet për firmat shkencore dhe teknologjike deri te vlerësimet e prirjeve afatgjata të investimeve të huaja, folësit në forum theksuan një pikëpamje të përbashkët: sektorët e Kinës të drejtuar nga risitë kanë një potencial të ndjeshëm rritjeje.
Komisioni Rregullator i Letrave me Vlerë i Kinës (CSRC) do të zgjerojë më tej hyrjen në Tregun STAR për firmat e teknologjisë së fortë, tha kryetari i CSRC-së Wu Qing, duke shtuar që tashmë po shfaqet një valë e re e revolucionit teknologjik, e drejtuar nga inteligjenca artificiale.
Institucionet financiare po i përshtatin qasjet e tyre për të nxitur këtë inovacion. Liu Jun, president i Bankës Industriale dhe Tregtare të Kinës (ICBC), tha se shumë kompani të mëdha teknologjike tani po krijojnë tregjet e tyre të brendshme të kapitalit, duke e quajtur këtë një prirje të rëndësishme në financën korporative dhe financimin e inovacionit.
Veç institucioneve financiare vendase, edhe emra të rëndësishëm të financave globale e vlerësuan lart industrinë teknologjike të Kinës. Presidenti i “Goldman Sachs” për Azi-Paqësorin Kevin Sneader tha që inovacioni teknologjik i Kinës ka arritur pikë kthese, duke shtuar se AI-ja mund të kontribuojë deri në 8 % të rritjes së produktivitetit të punës në Kinë gjatë dekadës së ardhshme.
Gokul Laroia, CEO për Azinë dhe bashkëkryetar i aksioneve globale në “Morgan Stanley”, theksoi që interesi i investitorëve globalë për Kinën po rritet, i nxitur pjesërisht nga inteligjenca artificiale.
