Zyra e Komisionerit të Lartë të Kombeve të Bashkuara për të Drejtat e Njeriut (OHCHR) njoftoi se pezullimi nga Greqia i aplikimeve të azilit për refugjatët nuk ka asnjë bazë ligjore sipas ligjit ndërkombëtar.
Liz Throssell, një prej zëdhënësve të OHCHR, në një konferencë për shtyp në zyrën e OKB-së në Gjenevë iu përgjigj pyetjes së gazetarit të AA-së lidhur me “hapjen e zjarrit nga Greqia kundër refugjatëve në tokë dhe në det, përmbysjen e gomoneve të tyre dhe lidhur me vrasjen e 3 refugjatëve”.
“Nuk kemi ndonjë prani as në kufirin grek dhe as në atë turk. Por sigurisht që kemi raporte që na vijnë lidhur me çfarë ka ndodhur dhe çfarë ndodh atje”, tha Throssell.
Zëdhënësja Throssell pretendoi se nuk janë në gjendje të konfirmojnë përjetimet në kufi dhe paralajmëroi se rregullat e të drejtave të njeriut janë plotësisht të vlefshme në ligjin e imigracionit.
Ndërsa lidhur me njoftimin e kryeministrit grek, Kyriakos Mitsotakis, se vendi i tij do të ndalojë për një muaj aplikimet e azilit, zëdhënësja Throssell, vlerësoi se “Sipas ligjit ndërkombëtar për refugjatët, nuk ka asnjë bazë ligjore pezullimi i procedurave për refugjatët”.
Në një deklaratë të bërë më 2 mars nga UNHCR, theksohet se as Konventa për Refugjatët e 1951 dhe as ligji i BE-së për refugjatët nuk përbën një bazë ligjore për pezullimin e pranimit të kërkesave për azil.
Greqia shkel ligjin ndërkombëtar
Sipas ligjit ndërkombëtar, konventave dhe marrëveshjeve ndërkombëtare për refugjatët, çdo person që nuk ndihet i sigurtë dhe largohen nga vendet e tyre për shkak të luftës dhe frikës së ngjashme, ka të drejtën e strehimit në një vend tjetër.
Edhe në nenin 14-të të Deklaratës të të Drejtave të Njeriut përfshihet shprehja se “Përballë përndjekjes të gjithë kanë të drejtë që të përfitojnë nga e drejta për të kërkuar strehim dhe për tu strehuar në vende të tjera”.
Ndërsa sipas “Sistemit të Përbashkët Evropian të Azilit” i cili formëson politikën e imigracionit të BE-së dhe mbi të cilin po punohet ende, thuhet se duhet t’i jepet azil “atyre personave që ndodhen përballë persekutimit serioz dhe dëmtimit në vendin e tyre dhe ndaj atyre që kanë nevojë për mbrojtje ndërkombëtare”.
