Irani ka vendosur të ndërpresë shkëmbimin e mesazheve me Shtetet e Bashkuara të Amerikës përmes ndërmjetësve, si reagim ndaj sulmeve izraelite në Liban, njoftoi sot agjencia iraniane e lajmeve “Tasnim”, sipas Reuters.
Vendimi vjen ndërsa përpjekjet diplomatike për t’i dhënë fund luftës tre-mujore në rajon vazhdojnë të përballen me vështirësi.
Sipas “Tasnim”, Teherani dhe i ashtuquajturi “Front i Rezistencës”, ku përfshihen aleatët shiitë të Iranit në Jemen, Liban dhe Irak, kanë rënë dakord për një strategji që synon bllokimin e plotë të Ngushticës së Hormuzit dhe aktivizimin e fronteve të tjera rajonale. Qëllimi, sipas agjencisë, është “ndëshkimi” i Izraelit dhe mbështetësve të tij.
Një nga pikat më të ndjeshme që mund të preket nga përshkallëzimi është Ngushtica Bab el-Mandeb pranë brigjeve të Jemenit. Nëse rebelët Huthi, aleatë të Iranit, hapin një front të ri, kjo rrugë detare strategjike, e cila kontrollon trafikun drejt Kanalit të Suezit, mund të bëhet objektiv i sulmeve.
Ministri i Jashtëm iranian, Abbas Araqchi, deklaroi në rrjetin social X se “shkelja në një front është shkelje e armëpushimit në të gjitha frontet”, duke fajësuar SHBA-në dhe Izraelin për pasojat e çdo përshkallëzimi të mëtejshëm. Ai iu referua veçanërisht operacioneve ushtarake izraelite në Liban.
Lufta, e cila sipas raportit nisi më 28 shkurt me operacionet e SHBA-së dhe Izraelit kundër Iranit, ka shkaktuar mijëra viktima, kryesisht në Iran dhe Liban, si dhe pasoja të rënda ekonomike globale. Tensionet në Ngushticën e Hormuzit, një nga korridoret më të rëndësishme të transportit të naftës dhe gazit natyror të lëngshëm në botë, kanë shtyrë çmimet e energjisë në rritje.
“Tasnim” theksoi se zyrtarët iranianë kanë kërkuar ndërprerjen e menjëhershme të operacioneve ushtarake izraelite në Gaza dhe Liban, si dhe tërheqjen e plotë të forcave izraelite nga zonat e pushtuara në Liban. Sipas agjencisë, nuk do të ketë bisedime me SHBA-në derisa këto kërkesa të plotësohen.
