Kryeministri Edi Rama ka uruar të gjithë shqiptarët për vitin e ri 2020, në një video-mesazh shpërndarë në rrjetet sociale, ku nuk mund të ndodhte ndryshe: Kryefjalë e urimit të tij ishte tërmeti shkatërrues i 26 nëntorit me 51 viktima e qindra të plagosur dhe ringritja pas tij përmes rindërtimit. Mrekulli nga dora e Zotit ishte për kryeministrin Edi Rama fakti që tërmeti tragjik nuk shkaktoi një bilanc edhë më të përgjakshëm, e po ashtu ishte edhe mrekulli e miqve që iu gjendën Shqipërisë në ditë të vështira.
Rama tha se ky tërmet, mes dhimbjes që la pas, shënon edhe një mundësi të artë për një fillim të ri.
Energjia pozitive që gjeneroi pas tërmetit, u bë vetë momenti i fillimit të ri për Shqipërinë që duam, tha Rama. “Nuk duhet ta humbim këtë momentum të ri për të kapitalizuar rilindjen ekonomike e sociale që ka prodhuar ky fundvit dramatik, nuk kemi kohë për të humbur, duhet të shtyjmë me forcë përpara dhe të bëjmë pa humbur kohë çdo punë që nuk dihet lënë më për nesër”, u shpreh shefi i mazhorancës.
Rama: Por përtej debatit për besimin ose mos besimin në zot dhe falë energjisë së madhe pozitive që u gjenerua si reagim kombëtar ndaj goditjes së tërmetit, ky është në sytë e mi momenti i një fillimi të ri, për të prodhuar më shumë energji pozitive dhe arritur më shumë për vendin dhe fëmijët tanë.
Më duhet t’ju rrëfehemi se ideja e këtij momenti si një mundësi për një fillim të ri më ka kapur e pushtuar pak e nga pak qysh sa plasi konflikti absurd politik i gjysmës së parë të vitit, më tej kur refuzimi i KiE për çeljen e negociatave me Shqipërinë shkaktoi një tërmet psikologjik mbi këtë shoqëri të lidhur me ëndrrën evropiane, ky mendim mu përforcua si nevojë për në fillim të ri.
Por tërmeti i 26 nëntorit me forcën reaguese u bë vetë momenti i fillimit të ri për Shqipërinë që duam.
Nuk duhet ta humbim këtë moment të ri për të kapitalizuar mundësinë e thellimit të procesit të rilindjes ekonomike e sociale që ka prodhuar ky fund vit dramatik.
Nuk kemi kohë për të humbur. Duhet të shtyjmë me forcë përpara dhe të bëjmë tani, për ditë, çdo punë që nuk duhet lënë për nesër.
Shengeni rajonal domosdoshmëri historike, nuk e dëmton Kosovën
Rama: Shengeni rajonal është një domosdoshmëri historike sot, kur beteja jonë, por jo vetëm e jona, shqiptarëve, por edhe e krejt vendeve të këtij rajoni është zgjerimi i hapësirës së lirisë së lëvizjes për njerëzit, mallrat, shërbimet, kapitalet veç ata që nuk duan të shohin apo s’dinë ta lexojnë nuk e kuptojnë që shengeni rajonal është rruga e vetme për Shqipërinë dhe Kosovën që të thyejnë barrierën kufitare mes vetit dhe të garantojnë liri të plotë lëvizje mes të dyja shteteve për njerëzit, mallrat, shërbimet dhe kapitale. Shengeni rajonal nuk sjell asgjë të re në aspektin e marrëdhënieve politike mes Serbisë e Kosovës dhe as në aspektin e marrëdhënieve politike mes Shqipërisë dhe Serbisë në raport me Kosovën. Qëndrimi ynë në këtë drejtim as ka lëvizur dhe as nuk lëviz. Ne jemi një dhe kemi të njëjtin qëndrim. Pikë!
Shengeni rajonal jo vetëm që nuk e dëmton Kosovën dhe betejën politike me Serbinë, për arritjen e një marrëveshje përfundimtare të drejtë dhe të plotë për njohjen e saj nga Serbia, por përkundrazi e ndihmon. Kush nga zotërinjtë që i fryn këtij zjarri kundërshtie është kundër shengenit sepse parasheh pasoja ekonomike negative për Shqipërinë e Kosovën, thjesht nuk di çfarë flet. Ndërsa kush është shengenit rajonal për shkak të së shkuarës duhet pyetur si e ndihmoka Kosovën vetëpërjashtimi nga një nismë që ka 5 vjet që diskutohet dhe dakordësohet përgjatë procesit të Berlinit ku Kosova ka qenë e pranishme dhe ka qenë gjithmonë dakord në tryezë.
Ne Shqipëria, kemi arritur të bindim Serbinë. Po po, unë kam arritur të bind Presidentin e Serbisë që as mos e kushtëzojë tryezën me asgjë që na ndan ne me Serbinë për Kosovën dhe që e ndan Kosovën me Serbinë dhe as mos pretendojë që Shqipëria e Kosova të mos e bëjnë marrëveshjen e lëvizjes së lirë në rast se Kosova nuk pranon të bëjë të njëjtën gjë me Serbinë në të njëjtën kohë.
Kryeministri Edi Rama u ka kërkuar shqiptarëve të reflektojnë për Vitin e Ri dhe të mendojnë bashkë me të se çfarë mund të bëjnë më shumë për Shqipërinë sesa në dekadën që po lëmë pas.
Rama tha se është detyrë e përbashkët e tij dhe e shqiptarëve për të mos ju trembur të përpjetave sfiduese të së ardhmes dhe të mos rrëshqasim në tatëpjetat e përbaltura të së shkuarës.
Kryeministri shtoi se Shqipëria i ka të gjitha mundësitë për t’ia dalë në krye të përpjetës ku po ngjitemi me vështirësi për ta bërë Shqipërinë shtet normal e funksional.
Edi Rama:“Ndërkohë që një vit i ri po vjen, me një dekadë të re përpara nesh mendojeni edhe ju bashkë me mua se sa dhe si mund të bëjmë ne shqiptarët për Shqipërinë 4-5 herë më shumë se në dekadën që lamë pas. Është jo vetëm e mundur por ajo që duhet të bëjmë. Zoti çon dritë por edhe tërmete por nuk çon dhurata mbi këtë tokë për të cilën e kemi ne për detyre ta bëjmë më të mirë më të sigurt dhe më të begatë për fëmijët tanë, është detyra jona të mos i trembemi të përpjetave sfiduese të së ardhmes dhe të mos rrëshqasim në tatëpjetat e përbaltura të së shkuarës.
Është sfida jonë të mos dorëzohemi përpara vështirësive në arritjen e rezultateve dhe të mos e gënjejmë veten me rezultatet sa hap e mbyll sytë që arrihen vetëm me muhabetet e kafeneve dhe çadrave mediatike është e jona dhe vetëm e jona, e njerëzve përtej kufirit të adoleshencës që të mos e humbasin durimin në përballjen me realitetin dhe të mos e lëshojmë gojën e veten në mexhlisin e komunikimit të ulët, sharjeve e shpifjeve që rrezikojnë të infektojnë pa kthim si një sëmundje kronike edhe fëmijët tanë.
Ky vend i ka të gjithë për të dalë në krye të përpjetës ku po ngjitemi me vështirësi për ta bërë Shqipërinë shtet normal, funksional, social dhe ne duhet të kemi vullnetin, vendosmërinë, përkushtimin dhe mbi të gjitha vetëdijen se kjo kërkon kohë, durim, punë dhe bashkim. Bashkim në qëllim jo në bindje politike, bashkim qëllimesh pozitive dhe jo forcash politike, bashkim për të jetuar në një vend ku askush nuk duhet të jetë kurrë veten.”
Kreu i qeverisë e mbylli mesazhin duke u uruar shqiptarëve Vitin e Ri.
Edi Rama: “Ju falënderoj nga zemra të gjithëve, ju që më keni besuar, mbështetur, inkurajuar po dhe juve që nuk më keni besuar, apo gjykuar keq por sidoqoftë por keni marrë mundimin dhe më keni ndjekur në punën time.
Në fund të ditës koha ikë, ditët ikin, kryeministrat vijnë e shkojnë, të gjithë jemi kalimtarë në këtë botë çka mbetet është Shqipëria dhe kombi ynë mbi këtë tokë. Letë vazhdojmë të bëjmë së bashku më të mirën për Shqipërinë e për kombin shqiptar dhe më e mira u bëftë për ju dhe gjithkënd juve ju do zemra. Gëzuar e Ri 2020 dhe ardhtë i lehtë e me shëndet dhe mbarësi në familjet tuaja. Zoti e bekoftë Shqipërinë.”