Kanadaja ka nisur një program shumë miliarda dollarësh që synon të forcojë ushtrinë, duke u mbështetur më tej te kompanitë kombëtare për të ulur varësinë nga Shtetet e Bashkuara.
“Jemi mbështetur më shumë te gjeografia jonë dhe te të tjerët për t’u mbrojtur. Kjo ka krijuar cenueshmëri që nuk mund t’i lejojmë më dhe varësi që nuk janë më të qëndrueshme”,- deklaroi kryeministri kanadez, Mark Carney, gjatë një vizite në zyrat e “CAE Inc.”, një kompani e specializuar në teknologjitë e simulimit për sektorët e mbrojtjes dhe aviacionit.
Kjo strategji industriale e mbrojtjes kanadeze është pjesë e vullnetit të vendit për të investuar 82 miliardë dollarë në mbrojtje gjatë pesë viteve të ardhshme, në mënyrë që Kanadaja të përputhet me objektivat e NATO-s për shpenzimet e mbrojtjes në nivelin 2% të PBB-së deri në fund të vitit dhe 5% deri në vitin 2035.
Carney ka përsëritur prej muajsh se bota po bëhet gjithnjë e më e rrezikshme dhe se SHBA-të nuk janë më një partner i besueshëm, tek i cili Kanadaja mund të mbështetet për mbrojtjen e saj, shkruan “Agence France-Presse”.
Plani parashikon forcimin e kapaciteteve të mbrojtjes në tokë, det dhe ajër, theksoi Carney, i cili vlerësoi se bota ka ndryshuar dhe Kanadaja duhet të ndryshojë bashkë me të.
Kryeministri kanadez shprehu veçanërisht shqetësim për sovranitetin e vendit në Arktik, pasi rritja e temperaturave për shkak të ndryshimeve klimaterike po çon në shkrirjen e akujve dhe po zgjon interesin e fuqive të mëdha për këtë rajon të pasur me minerale kritike.
