Ministria kineze e Tregtisë shprehu të hënën shqetësim të thellë në lidhje me rishikimin e projektit të Aktit të Sigurisë Kibernetike të Bashkimit Evropian (BE), duke deklaruar se ai i politizon çështjet ekonomike e tregtare dhe e tepron me konceptin e sigurisë.
Pala kineze ia paraqiti zyrtarisht komentet e saj Komisionit Evropian më 17 prill, duke shprehur shqetësimin serioz dhe qëndrimin zyrtar të saj, tha një zëdhënës i ministrisë.
Sipas tij, projekti paraqet “rreziqe joteknike” shumë subjektive dhe arbitrare në emër të sigurisë kibernetike dhe të sigurisë së zinxhirit të furnizimit.
Në veçanti, projekti identifikon “vendet që paraqesin shqetësime për sigurinë kibernetike” dhe “furnizuesit me rrezik të lartë”, duke përjashtuar vendet dhe furnizuesit e listuar nga zinxhirët përkatës të furnizimit të BE-së në 18 sektorë, përfshirë energjetikën, transportin dhe teknologjinë e informacionit dhe komunikimit, u shpreh zëdhënësi.
Në komentet e paraqitura Komisionit Evropian, Kina theksoi se projekti mund të shkelë rregullat themelore të Organizatës Botërore të Tregtisë (OBT), duke përfshirë parimet e trajtimit të vendit më të favorizuar dhe të trajtimit kombëtar, si edhe angazhimet specifike të BE-së për tregtinë e shërbimeve.
Dokumenti dyshohet gjithashtu se tejkalon autoritetin ligjor të BE-së, duke cenuar fuqitë ekskluzive të shteteve anëtare në menaxhimin e çështjeve të sigurisë kombëtare.
Nëse ai miratohet, kjo do të shkaktojë dëme të konsiderueshme në marrëdhëniet ekonomike e tregtare Kinë-BE, do të prishë rëndë zinxhirët globalë industrialë e të furnizimit dhe do të ndikojë në tranzicionin digjital e të gjelbër të vetë BE-së, tha zëdhënësi.
Kina i ka kërkuar BE-së të heqë dispozitat që lidhen me “vendet që paraqesin shqetësime për sigurinë kibernetike” dhe “rreziqet joteknike”, si edhe të heqë ose të rishikojë në mënyrë thelbësore kriteret për identifikimin e “furnizuesve me rrezik të lartë” dhe masat kufizuese përkatëse.
Kina shprehu gjithashtu shpresën se BE-ja do t’u kushtojë vëmendjen e duhur komenteve të paraqitura dhe rishikimeve të propozuara, do t’u përmbahet në mënyrë të rreptë rregullave të OBT-së, do të shmangë masat kufizuese diskriminuese dhe do të mbrojë qëndrueshmërinë dhe funksionimin e qetë të zinxhirëve industrialë dhe të furnizimit Kinë-BE dhe globalë.
Kina do të ndjekë nga afër procesin e rishikimit të projektit dhe është e gatshme të angazhohet në dialog me BE-në për këtë çështje, tha zëdhënësi, duke paralajmëruar që, nëse BE këmbëngul për ta kthyer projektin në ligj dhe për të diskriminuar kompanitë kineze, Kina do të duhet të marrë kundërmasat përkatëse.
“Ne shpresojmë që BE-ja nuk do ta nënvlerësojë vendosmërinë e fortë të Kinës për të mbrojtur interesat kombëtare dhe të drejtat dhe interesat e ligjshme të kompanive të saj, si edhe për të parandaluar prapavajtjen e lidhjeve ekonomike dhe tregtare Kinë-BE,” tha zëdhënësi./cgtn
