Kryeministri Edi Rama mikpriti sot në zyrën e tij, Presidentin e Francës Emmanuel Macron, në ditën e dytë të vizitës së tij në Tiranë, në kuadër të Samitit të gjashtë të Komunitetit Politik Europian.
Pas takimit mes tyre, në praninë e Kryeministrit Rama dhe Presidenti francëz Macron u shkëmbyen marrëveshjet e bashkëpunimit në fushën e energjisë, si dhe u nënshkrua Memorandumi I mirëkuptimit ndërmjet Ministrisë së Turizmit dhe Mjedisit dhe Agjencisë Franceze për Zhvillim për krijimin e një projekti gjithëpërfshirës për turizmin e qëndrueshëm në rajonin e Korçës.
Kryeministri Edi Rama vlerësoi sot se marrëdhënia e Shqipërisë me Francën ka hyrë në një fazë të re.
Kryeministri nënvizoi po ashtu se “rajoni ka fituar një mbështetës shumë të qëndrueshëm të të gjitha proceseve transformuese në adresimin e momenteve të vështira që duhen ende zgjidhur dhe përfshirjen e gjithë rajonit në Europën e bashkuar”.
Rama vlerësoi faktin se në një kohë kaq të shkurtër presidenti i Francës riviziton Shqipërinë dhe qëndron për një tjetër vizitë bilaterale.
“Kjo na jep shumë krenari dhe mirënjohje për këtë shtysë të fortë nga ana e presidentit dhe Republikës së Francës në marrëdhëniet me Shqipërinë, të cilat kanë hyrë në një fazë krejtësisht të re dhe të panjohur më parë”, tha Rama.
Kryeministri informoi se përveç bilancit të punëve të realizuara pas vizitës së parë historike të presidentit Macron, që ishte i pari kryetar shteti i Francës që viziton Shqipërinë, kemi vazhduar të nënshkruajmë marrëveshje të tjera për të thelluar bashkëpunimin në fushat e paracaktuara edhe në marrëveshjen kuadër mes dy qeverive.
“Është një privilegj i veçantë që Shqipëria mikpriti Komunitetin Politik Europian dhe patjetër kënaqësi që së bashku me presidentin dhe një grup vendesh e kemi shtyrë këtë projekt të komunitetin në pikën ku tanimë ka konsensus të plotë nga të gjitha vendet përbërëse”, tha Rama.
Ndërsa Presidenti i Francës, Emmanuel Macron, në konferencën e përbashkët për shtyp me Kryeministrin Edi Rama, gjatë vizitës së tij zyrtare në Tiranë, bëri të ditur se janë realizuar tashmë mbi 300 milionë euro investime franceze në Shqipëri dhe theksoi angazhimin për të përshpejtuar projekte të reja në sektorë kyç.
“”École 42″ është tashmë realitet në Shqipëri. Në të njëjtën mënyrë kemi vendosur për hapjen e Liceut Francez të Korçës, i cilësuar si djepi frankofon në vend. Studimi paraprak është përfunduar dhe do të vijojmë ta përshpejtojmë këtë projekt”, u shpreh Macron.
Në fushën e arsimit të lartë, presidenti francez theksoi se bashkëpunimi universitar mes Tiranës dhe një universiteti teknologjik francez është në fazë avancimi.
Sa i takon bashkëpunimit ekonomik, Macron vuri në dukje vendosjen e projekteve prioritare në fushat e menaxhimit të ujit, turizmit dhe bujqësisë.
“Më shumë aktorë francezë janë të përfshirë në projektet tona të përbashkëta, të cilat janë strukturuese për të gjithë rajonin”, deklaroi ai.
Presidenti francez tha gjithashtu se është avancuar në fushën e mbrojtjes, me marrëveshje të rëndësishme të nënshkruara mes dy vendeve.
“Kemi bërë përparim në bashkëpunimin në mbrojtje. Ministrat tanë kanë nënshkruar marrëveshje dhe partneritete strukturuese, përfshirë radarët e mbikëqyrjes dhe bashkëpunimin për ristrukturimin ajror. Franca mbetet e angazhuar në projekte të rëndësishme infrastrukturore dhe në menaxhimin e ujit dhe mbetjeve në Shqipëri”, theksoi Macron.
Ai përfundoi duke riafirmuar mbështetjen e Francës për Shqipërinë, nëpërmjet financimeve dhe përfshirjes së operatorëve të mëdhenj industrialë francezë.
“Franca është pranë Shqipërisë dhe mbështet zhvillimin e saj përmes një agjende pragmatike dhe ambicioze”, përfundoi presidenti Macron.
/Argumentum.al
