TIRANË – Me 82 vota të mazhorancës dhe deputetëve të Partisë Socialdemokrate, Kuvendi i Shqipërisë rrëzoi sot kërkesën e Prokurorisë së Posaçme kundër Korrupsionit dhe Krimit të Organizuar (SPAK) për heqjen e imunitetit parlamentar të ish-zv. kryeministres Belinda Balluku.
Para këtij vendimi, Ambasada e Mbretërisë së Bashkuar në Tiranë kishte reaguar, duke theksuar se imuniteti parlamentar nuk mund të bëhet pengesë për drejtësinë dhe duke nënvizuar rëndësinë e sundimit të ligjit dhe pavarësisë gjyqësore.
Pas rrëzimit të kërkesës nga Kuvendi, reagime të ngjashme erdhën edhe nga Ambasada e Gjermanisë dhe ajo e Holandës, të cilat theksuan se Prokuroria e Posaçme duhet të mund të vijojë hetimet pa pengesa dhe se lufta kundër korrupsionit në nivelet më të larta mbetet një kusht kyç për integrimin evropian të Shqipërisë.
Por menjëherë pas deklaratave të ambasadës britanike e asaj gjermane, të cilat kërkonin që Prokuroria e Posaçme të mos pengohej në hetimin penal ndaj Belinda Ballukut, kryeministri Edi Rama reagoi duke thënë se “Belinda Balluku nuk akuzohet për korrupsion dhe hetimi i çështjes duhet të vazhdojë, i patrazuar as nga pengimi as nga yshtja e SPAK-ut, prej faktorësh jashtë kufijve të pushtetit të pavarur gjyqësor”. Në reagimin e tij, Rama thekson se kërkesa e Prokurorisë së Posaçme u trajtua dhe u analizua me seriozitet në Kuvend.
Reagimi i plotë i Edi Ramës:
Përshëndes deklaratat e ambasadave të Mbretërisë së Bashkuar dhe Gjermanisë, me parimet e shprehura në të cilat jemi të gjithë shumë dakord, 100%.
Por duke qenë se që të dyja dolën sot, kur Kuvendi me plot të drejtë refuzoi heqjen e lirisë së një deputeteje në mungesë të plotë të kushteve për ta ndërmarrë një hap të tillë ekstrem dhe, njëkohësisht, duke qenë se Shoqata e Molotovarëve të Tiranës ka filluar të flasë edhe në emër të Gjermanisë, përfitoj nga rasti të theksoj:
* Kjo shumicë qeverisëse e ka mendjen të ndarë dhe busullën të palëvizshme: Shqipëria 2030 në Bashkimin Europian
* Reforma në Drejtësi nuk kthehet mbrapa, pavarësia e gjyqësorit nuk preket dhe mbështetja për SPAK-un mbetet e palëkundur.
* Lufta reale kundër korrupsionit vazhdon, më këmbëngulëse se kurrë, siç e tregon qartë edhe pasqyra objektive e përditësuar Komisionit Europian.
* Belinda Balluku nuk akuzohet për korrupsion dhe hetimi i çështjes duhet të vazhdojë, i patrazuar as nga pengimi as nga yshtja e SPAK-ut, prej faktorësh jashtë kufijve të pushtetit të pavarur gjyqësor.
* Shumica qeverisëse, bëri sot pa asnjë diskutim atë që do të bënte çdo parlament demokratik i Europës, ku kalimi i kërkesave të prokurorisë jo për arrestin pa gjyq të një deputeti, po për të filluar apo jo hetimet, nuk është askund si kalimi pa asnjë lloj kontrolli i kufijve në zonën Shengen. Ai është një proces serioz, i bazuar në norma kushtetuese e ligjore, të cilat nuk janë as karta bianka, as dyer të mbyllura për prokurorinë.
Sot ne i kemi respektuar plotësisht ato norma dhe kush pretendon të kundërtën, ka të drejtën e vet të padiskutueshme, po s’ka argumenta të mjaftueshëm për ta fituar debatin mbi ekzistencën ose jo të kufirit mes pushteteve të pavarur kushtetues, të cilin parlamenti i Shqipërisë e mbylli sot duke treguar se dinjiteti i parlamentarëve nuk është material për eksperimente socio-politike, të cilat e bëjnë kurën më të rrezikshme se sa sëmundja që duhet të luftojë!
Ecim përpara, Shqipëria nuk ka plan B
© 2026 Argumentum
