Pas shpalljes së rezultateve të zgjedhjeve parlamentare, ku Partia Socialiste siguroi fitoren që i garanton mandatin e katërt radhazi, Kryeministri Edi Rama ka marrë urime nga një sërë liderësh evropianë si; Giorgia Meloni, presidenti i Ukrainës, Volodymyr Zelenskyy, kryeministri i Spanjës, Pedro Sanchez, kryeministri i Kroacisë, Andrej Plenković si dhe kryeministri i Mbretërisë së Bashkuar, Keir Starmer, kryeministri i Hungarisë, Viktor Orban, Presidenti i Francës, Emmanuel Macron, Presidenti i Emirateve të Bashkuara Arabe, Mohamed bin Zayed Al Nahyan dhe Presidentja e Komisionit Evropian, Ursula von der Leyen. Udhëheqësit e vendeve anëtare të Bashkimit Evropian dhe përfaqësues të institucioneve ndërkombëtare kanë vlerësuar procesin zgjedhor dhe e kanë përgëzuar Ramën për vazhdimin e drejtimit të qeverisë shqiptare.
Presidentja e Komisionit Evropian, Ursula von der Leyen, uroi Kryeministrin Rama për rezultatin elektoral, duke theksuar përparimin e Shqipërisë në rrugën drejt integrimit evropian.
“I dashur Edi, urime për fitoren tuaj në zgjedhje! Nën udhëheqjen tuaj, Shqipëria ka bërë përparim të madh drejt Bashkimit tonë. Le të vazhdojmë të punojmë ngushtë së bashku për reformat e BE-së. Shqipëria i përket BE-së! Pres me padurim t’ju përgëzoj personalisht nesër në Tiranë”, shkroi Von der Leyen.
Presidenti i Këshillit Evropian, Antonio Costa, gjithashtu uroi Ramën, duke e cilësuar rezultatin si “mbresëlënës”.
“Urimet më të ngrohta, i dashur Edi, për këto rezultate mbresëlënëse zgjedhore. Pres me padurim t’Ju përgëzoj personalisht nesër në Tiranë”, u shpreh Costa.
Presidenti i Francës, Emmanuel Macron, uroi Kryeministrin shqiptar duke shkruar në gjuhën shqipe.
“Urime Edi Rama, mik i dashur, për fitoren tënde në zgjedhjet parlamentare. Franca do të jetë gjithmonë në krah të Shqipërisë në rrugën e saj drejt Bashkimit Europian”, deklaroi Macron.
Ai shtoi se të dy do të takohen të premten në Samitin e Komunitetit Politik Europian, “për një vizitë që duhet të na lejojë të forcojmë edhe më shumë partneritetin tonë”.
Presidenti i Emirateve të Bashkuara Arabe, Mohamed bin Zayed Al Nahyan, vlerësoi rritjen e marrëdhënieve mes dy vendeve dhe shprehu bindjen për një bashkëpunim më të thellë në të ardhmen.
“Përgëzime të sinqerta Kryeministrit Edi Rama për rezultatin e zgjedhjeve parlamentare në Shqipëri. Marrëdhëniet mes Emirateve të Bashkuara Arabe dhe Shqipërisë kanë parë një rritje të fortë vitet e fundit dhe jam i bindur se së bashku do të mund të vazhdojmë të zgjerojmë bashkëpunimin dhe të promovojmë zhvillimin e mëtejshëm në dobi të vendeve dhe popujve tanë.”
Kryeministri i Hungarisë, Viktor Orban, e cilësoi fitoren e Ramës si “bindëse” dhe theksoi rëndësinë e Samitit të Komunitetit Politik Evropian që do të mbahet në Tiranë.
“Urime Kryeministrit Edi Rama për fitoren e tij bindëse në zgjedhjet parlamentare të Shqipërisë. I dashur Edi, mezi pres t’ju shoh këtë të premte në Tiranë në atë që mund të jetë një Samit historik i EPC-së.”
Kryeministri i Mbretërisë së Bashkuar, Keir Starmer, uroi Ramën për një “fitore historike” dhe shprehu dëshirën për të vazhduar bashkëpunimin mes dy vendeve.
“Urime Edi Rama për fitoren tuaj historike në zgjedhje. Pres me padurim të vazhdojmë bashkëpunimin për të sjellë rezultate për njerëzit e zakonshëm në të dy vendet tona.”
Presidenti i Ukrainës, Volodymyr Zelenskyy, gjithashtu uroi Kryeministrin Rama dhe Partinë Socialiste për rezultatin në zgjedhje.
“Urime për Edi Ramën dhe Partinë Socialiste për fitoren bindëse në zgjedhje. Ju uroj sukses në shërbim të popullit shqiptar”, shkroi Zelenskyy.
Kryeministri i Kroacisë, Andrej Plenković, në mesazhin e tij theksoi rëndësinë e forcimit të marrëdhënieve dypalëshe dhe bashkëpunimit në kuadër të NATO-s.
“Urime për fitoren në zgjedhjet parlamentare. Pres me padurim forcimin e mëtejshëm të marrëdhënieve tona dypalëshe dhe bashkëpunimin në NATO dhe forume të tjera ndërkombëtare.”
Këto urime vijnë në një kohë kur Shqipëria pritet të jetë gjithashtu në qendër të vëmendjes së mediave ndërkombëtare, pasi do të mirëpresë Komunitetin Politik Evropian
Kujtojmë se më 16 maj 2025, Shqipëria do të mirëpresë në Tiranë Samitin e gjashtë të Komunitetit Politik Evropian (EPC), duke shënuar një ngjarje historike jo vetëm për vendin, por për gjithë rajonin e Ballkanit Perëndimor. Për herë të parë, ky forum i rëndësishëm mbledhës do të zhvillohet në këtë pjesë të Evropës, duke reflektuar rëndësinë strategjike që rajoni ka fituar në arkitekturën politike dhe të sigurisë së kontinentit.
Në këtë samit pritet të marrin pjesë 47 Kryetarë Shtetesh dhe Qeverish, së bashku me udhëheqësit e institucioneve më të larta evropiane dhe ndërkombëtare, përfshirë Presidenten e Komisionit Evropian Ursula von der Leyen, Presidentin e Këshillit Evropian Antonio Costa, si dhe figura të tjera kyçe në drejtimin e BE-së, NATO-s dhe OKB-së.
Organizimi i këtij samiti në Tiranë vjen në një moment kur Shqipëria është gjithnjë e më e angazhuar në procesin e integrimit evropian dhe ka rritur profilin e saj diplomatik në arenën ndërkombëtare. Zhvillimi i samitit në kryeqytetin shqiptar konsiderohet një moment simbolik dhe politikisht domethënës, duke dëshmuar mbështetjen e fuqishme për perspektivën evropiane të Ballkanit Perëndimor dhe përfshirjen më të thellë të vendeve të rajonit në agjendat strategjike të Evropës.
/Argumentum.al
