Kryetari i PD, Lulzim Basha, ka zhvilluar sot një vizitë zyrtare në Prishtinë dhe është takuar me liderët e politikës së Kosovës. Ai e ka vënë theksin në fjalën e tij tek rëndësia e dialogut me serbinë dhe perspektiva e integrimit të Kosovës.
Në vizitën në Kosovë, Kryetari i Partisë Demokratike Lulzim Basha shoqërohet nga Edi Paloka, Nënkryetar i PD
Z. Besnik Mustafa, ish-Ministër i Jashtëm dhe Kryetar i Këshillit të Ambasadorëve Shqiptarë
Z. Kreshnik Çollaku, anëtar i Kryesisë së PDSH
Z. Arben Çejku, ish-ambasador dhe drejtues i Qendrës Shqiptare për Mirëqeverisje
“Kënaqësi dhe vlerësim i veçantë të takohem dy herë brenda pak ditëve me Kryeministrin e Kosovës, për më tepër në momentet kur Kosova po përjeton zhvillime të rëndësishme. Si nip i Kosovës, Qytetar Nderi i Prishtinës, por edhe për shkak se kam punuar për shumë vite në këtë vend, është gjithmonë kënaqësi të rikthehem në Prishtinë”, shprehet Basha.
Situata e rënduar e shkaktuar nga COVID-19, është emergjente për të dy vendet. Është e rëndësishme që situata të vendoset nën kontroll sa më shpejt, dhe për këtë Kryeministri i Kosovës më njohu me masat e fundit për decentralizimin e testimeve për COVID-19.
Përgëzova zotin Hoti për ndihmën ekonomike që qeveria e Kosovës i ka dhënë qytetarëve të saj, duke qenë vend lider në rajon për mbështetjen e ofruar ndaj qytetarëve dhe biznesit.
Ky dialog duhet të ketë si përfundim njohjen reciproke të Kosovës. Unë dhe PD do të ofrojmë të gjithë mbështetjen tonë, dhe jemi gati të kontribuojmë aty ku lidership-i i Kosovës mendon se është i nevojshëm.
Ashtu siç kemi bashkëpunuar për shpalljen e pavarësisë dhe njohjen ndërkombëtare, ne jemi të gatshëm të bashkëpunojmë sot në opozitë dhe nesër në qeverisjen e vendit, për të garantuar arritjen e objektivave të qytetarëve të Kosovës, duke nisur me liberalizimin e vizave, proces të cilin ne e kurorëzuam me sukses në vitin 2010, anëtarësimin në OKB, NATO dhe avancimin në procesin e integrimit në BE.
Bashkëpunimi mes Shqipërisë dhe Kosovës nuk mund të mbetet vetëm në fjalë dhe në letra. Ai duhet konkretizuar me vepra. Dhe një nga vendimet e mia të para si Kryeministër i Shqipërisë do të jetë heqja e taksës së Rrugës së Kombit dhe rivënia e saj pa asnjë ndalesë në shërbim të qytetarëve dhe ekonomisë së të dy vendeve.
Shqipëria dhe Kosova kanë potenciale të shumta për bashkëpunim mes dy vendeve, dhe ne duhet të punojmë fort që rinia e Shqipërisë dhe Kosovës të mos largohen, por të jetojnë e punojnë në vendin e tyre.
Gjatë vizitës së tij në Kosovë, kreu i Partisë Demokratike, Lulzim Basha, ka zhvilluar një takim dhe me Presidentin e vendit, Hashim Thaçi.
Basha shkruan në ‘Facebook’ se ka diskutuar me Thaçin mbi hapat që po hidhen në drejtim të dialogut midis Republikës së Kosovës dhe Republikës së Serbisë, që kanë qëllim dhe objektiv final, njohjen reciproke.
Pata kënaqësinë të bisedoja dhe shkëmbeja mendime me Presidentin Hashim Thaçi.
Diskutuam për hapat që po hidhen në drejtim të dialogut midis Republikës së Kosovës dhe Republikës së Serbisë, që kanë qëllim dhe objektiv final, njohjen reciproke.
Bashkërendimi i ngushtë midis SHBA dhe BE, ka qenë dhe mbetet një parakusht për suksesin e çdo iniciative në raport me stabilizimin përfundimtar dhe perspektivën europiane dhe euroatlantike të rajonit.
Për sa i përket aktakuzës ndaj Presidentit Thaçi, shpreha bindjen time se luftën e UÇK-së nuk mund ta përbaltë askush. Ajo është një luftë e drejtë, për të cilën kanë sakrifikuar jetën ndër shekuj bijtë dhe bijat e Kosovës.
Drejtësia duhet të bëjë natyrisht punën e saj, por ndryshe nga agresori, asnjë nga komandantët apo ushtarët e UÇK-së nuk i kanë ikur asaj, por janë përballur me nder dhe dinjitet. Vlerësova me këtë rast dhe qasjen e Presidentit Thaçi, i cili për katër ditë me radhë, iu përgjigj pyetjeve të prokurorëve, dhe besoj se do të dalë faqebardhë në këtë betejë. Shqiptarët s’kanë qenë kurrë agresorë, por viktima të dhunës dhe spastrimit etnik. Sigurisht që nuk është e drejtë që më shumë është hetuar e gjykuar viktima se agresori, por kam besim të plotë se drejtësia do të triumfojë sërish.
