Sot, më 11 maj 2025, qytetarët shqiptarë votuan për të zgjedhur 140 deputetët e rinj të Kuvendit të Shqipërisë. Procesi i votimit u zhvillua në mënyrë të qetë në të gjithë vendin, me vetëm disa incidente të vogla të raportuara në disa qarqe. Votimi nisi në orën 07:00 të mëngjesit dhe përfundoi në orën 19:00 të pasdite
Deri në orën 18:00, KQZ raporton se pjesëmarrja në votim ishte 41.37%. Kanë raportuar 3890 nga 5225 qendra votimi në total. Krahasuar me vitin 2021 kemi një pjesëmarrje gati 4% më të ulët, ku 4 vite më parë deri në orën 18:00 ka qenë afro 45.48%. Pas mbylljes së procesit të votimit ka nisur edhe dorëzimi i kutive në Qendrat e Numërimit.
Në përfundim të procesit të votimit për zgjedhjet e përgjithshme të 11 majit, ka nisur dorëzimi i bazës materiale nëpër KZAZ.
Në të gjitha KZAZ-të respektive po kryhet procesi i marrjes në dorëzim të bazës materiale nga komisionet e qendrave të votimit.
Të drejtën e votës e kishin 3,713,761 shtetas shqiptarë, brenda e jashtë vendit dhe 114,642 zgjedhës ishin votues për herë të parë. Sa i takon diasporës, vetëm 78% e atyre që u regjistruan morën pjesë në votim. 191 912 zarfe kanë mbërritur në Shqipëri nga 254 935 totali.
Gjithashtu, edhe 3 027 persona, të dënuar dhe të paraburgosur mund të ushtronin të drejtën e tyre kushtetuese për të votuar në 21 institucione të ekzekutimit të vendimeve penale.
Në këtë proces zgjedhor, për herë të parë u bë e mundur përfshirja e emigrantëve shqiptarë në mënyrë që ata të ushtronin të drejtën e votës përmes postës nga shteti ku kanë vendqëndrimin pa pasur detyrim të vijnë në Shqipëri.
Në zgjedhjet e sotme parlamentare kishin mundësi të votonin edhe ata qytetarë të cilëve u kanë skaduar dokumentet e identifikimit.
Në total janë prodhuar 3 534 792 fletëvotimi për zgjedhësit brenda vendit duke i shtuar 2% mbi numrin e zgjedhësve.
Për këto zgjedhje janë regjistruar 53 parti politike si subjekte zgjedhore, mes tyre dhe disa parti të reja dhe 3 koalicione.
Vota nga Diaspora
191,912 është numri i votave që kanë mbërritur nga diaspora.
Italia mban numrin më të lartë të votave të kthyera me 72,800, ndjekur nga Greqia me rreth 52 942. Greqia duket se ka raportuar problemet që u hasën ditëve të fundit, pasi kishte një shifër shumë më të ulët. Në total në Greqi janë shpërndarë 68,380 zarfe zgjedhore.
Nga Gjermania kanë ardhur 20,176 vota, ndërsa nga SHBA kanë mbërritur 16,401 vota. Shifër të konsiderueshme shënon edhe Mbretëria e Bashkuar me 11,764 vota të mbërritura.
Ndërkohë, sa i përket qarqeve, numri më i lartë i votave të mbërritura janë të Tiranës me 41,748, ndjekur nga Fieri me 25,949, Durrësi me 19,699 vota, Elbasani me 19,237 etj.
Numërimi i votës se diasporës është i kushtëzuar nga fillimi i numërimit të qarqeve respektive.
Zarfe të mbërritura në KQZ, sipas qarqeve
Tiranë 41,748
Fier 25,949
Durrës 19,699
Elbasan 19,237
Korçë 16,049
Vlorë 15,516
Shkodër 13,343
Berat 12,117
Lezhë 11,584
Dibër 7,339
Gjirokastër 6,531
Kukës 2,800
Në total, 7 persona u arrestuan në gjithë vendin për fotografim të votës. Pas rastit të parë të një 56-vjeçare në Elbasan Majlinda Cani, dhe më pas një gruaje tjetër po 56-vjeçe policia njofton se ka arrestuar edhe dy persona të tjerë, një 57-vjeçar dhe një 28-vjeçar, respektivisht Hasan Doka dhe Redion Lelo. Një tjetër i prangosur është Renato Feri, 34-vjeçar, ish-punonjës policie.
Në Gjirokastër, strukturat e Posaçme për Hetimin e Krimeve Zgjedhore arrestuan një 30-vjeçar nga Këlcyra pasi dyshohet se ka fotografuar fletën e votimit. Ndërkohë në Fshatin Spathar të Librazhdit, u arrestua edhe një 43-vjeçar tjetër për fotografim vote dhe më pas iu sekuestrua celulari.
Në fletën e votimit, shqiptarët gjejnë kësaj radhe 11 subjekte politike, ku 3 janë koalicione, dhe 9 janë parti që garojnë të vetme. Secili subjekt zgjedhor ka në garë 186 emra të shpërndarë sipas qarqeve. 2046 persona janë kandidatë për parlamentin e ardhshëm, për të zënë 140 karrige Kuvendore. Kësaj radhe, në asnjë qark të vendit, nuk konkurron asnjë kandidat i pavarur.
Kandidatët janë në dy grupe: lista e mbyllur, të cilët janë të privilegjuar dhe do të fitojnë të parët mandat sipas radhës që ka përcaktuar partia, dhe lista e hapur,.
Kryesocialsiti Edi Rama kërkon mandatin e katërt nën udhëheqjen e PS, ndërsa PD me aleatët, të udhëhequr nga Sali Berisha nën koalicionin “Shqipëria Madhështore” kërkojnë të rikthehen në pushtet pas 12 vitesh në opozitë. Në garë janë edhe 9 subjekte të tjera, Lëvizja Bashkë e Arlind Qorit, Koalicioni euroatlantik i Lulzim Bashës, PSD e Tom Doshit, Shqipëria Bëhet, Lapaj-Shabani, AKSH, Elena Kocaqi, ADR, Edmond Stojku, Partia Atdheu, Mundësia – Agron Shehaj, Koalicioni “Djathtas për Zhvillim”- Shehi-Alibeaj.
/Argumentum.al
