Ministri i Punëve të Jashtme i Turqisë, Hakan Fidan, ka pritur Takimin e tretë të Platformës së Paqes për Ballkanin, të zhvilluar në kuadër të Forumit të Pestë të Diplomacisë në Antalya.
Platforma e Paqes për Ballkanin, e krijuar nën udhëheqjen e Turqisë, kishte zhvilluar më herët takimin e parë më 26 korrik 2025 dhe të dytin më 23 janar në Stamboll. Nisma synon të forcojë dialogun rajonal përmes një qasjeje të drejtpërdrejtë dhe të orientuar drejt rezultateve, duke u mbështetur në bashkëpunimin midis vendeve të Ballkanit.
Në këtë takim mori pjesë edhe Ministri për Evropën dhe Punët e Jashtme i Shqipërisë, Ferit Hoxha, i ftuar nga homologu turk.
Diskutimet u fokusuan në forcimin e bashkëpunimit rajonal, perspektivën e integrimit evropian, zhvillimin ekonomik dhe sigurinë energjetike. Ministrat theksuan rëndësinë e dialogut dhe besimit si elementë kyç për paqen dhe stabilitetin në rajon, duke riafirmuar vizionin për një Ballkan Perëndimor më të integruar dhe të orientuar drejt së ardhmes.
Argumentum.al
