Kontrollet e eksportit nga Kina mbi subjektet përkatëse japoneze synojnë të frenojnë përpjekjet e Japonisë për rimilitarizim dhe janë masa të përligjura e të arsyeshme që nuk do të ndikojnë në tregtinë normale ndërmjet të dy vendeve, tha të enjtën Ministria e Tregtisë e Kinës.
Duke iu përgjigjur një pyetjeje në lidhje me kontrollet e eksportit mbi subjektet përkatëse japoneze në një konferencë shtypi, zëdhënësja e Ministrisë së Tregtisë He Yongqian tha se masat, që kanë për qëllim të frenojnë rimilitarizimin dhe aspiratat bërthamore të Japonisë, janë plotësisht të përligjura, të arsyeshme dhe të ligjshme.
Sipas saj, këto masa zbatohen posaçërisht për artikujt me përdorim të dyfishtë dhe nuk ndikojnë në shkëmbimet normale ekonomike e tregtare midis Kinës dhe Japonisë. Subjektet japoneze që funksionojnë me integritet dhe që zbatojnë ligjin, nuk kanë arsye për t’u shqetësuar.
Japonia kohët e fundit ka përshpejtuar ritmin e zgjerimit dhe të armatimit ushtarak, duke përfshirë nxitjen për heqjen e kufizimeve ndaj eksportit të armëve, zhvillimin e aftësive ushtarake sulmuese dhe përpjekjen për të rishikuar “Tre parimet jobërthamore,” vuri në dukje zëdhënësja.
Ajo theksoi se këto veprime pasqyrojnë një prirje të rrezikshme drejt përshpejtimit të rimilitarizimit dhe ambicieve bërthamore, duke paraqitur një kërcënim për paqen rajonale dhe botërore.
Si një fuqi e madhe e përgjegjshme, Kina përmbush vazhdimisht dhe në mënyrë aktive detyrimet e saj ndërkombëtare për mospërhapjen e armëve bërthamore, shtoi He.
Të martën, Kina shtoi 20 subjekte japoneze, duke përfshirë Kompaninë e Industrisë së Rëndë të Ndërtimit të Anijeve “Mitsubishi”, në një listë të kontrollit të eksportit. Operatorëve të eksportit u ndalohet të eksportojnë artikuj me përdorim të dyfishtë te subjektet e listuara, të cilat janë të përfshira në rritjen e aftësive ushtarake të Japonisë. Organizatave dhe individëve të huaj u ndalohet t’u transferojnë a ofrojnë artikuj me përdorim të dyfishtë me origjinë nga Kina këtyre subjekteve. Çdo aktivitet lidhur me këtë duhet të ndalet menjëherë, sipas një njoftimi të publikuar nga ministria.
20 subjekte të tjera japoneze, përfshirë Korporatën SUBARU, u vunë gjithashtu në një listë mbikëqyrjeje të martën, meqenëse përdoruesit e tyre fundorë dhe përdorimet fundore të artikujve me përdorim të dyfishtë nuk mund të verifikohen./cgtn
