Për të dytin vit radhazi, kryeqyteti shqiptar u shndërrua në një qendër të rëndësishme të artit dhe kreativitetit me zhvillimin e Muse-X, një event ndërkombëtar që mblodhi qindra artistë dhe profesionistë nga mbi 24 vende të botës. Me një program të pasur dhe pjesëmarrje të gjerë, eventi po konsolidohet si një platformë kyçe për promovimin e kulturës dhe bashkëpunimit ndërkombëtar.
Ceremonia e hapjes u zhvillua në ambientet e Piramida e Tiranës, një hapësirë simbolike që përfaqëson transformimin urban dhe kulturor të qytetit. I pranishëm ishte ministri i Turizmit, Kulturës dhe Sportit, Blendi Gonxhja, i cili theksoi se iniciativa të tilla janë thelbësore për zhvillimin e skenës artistike dhe për pozicionimin e Tiranës si një destinacion në rritje në hartën kulturore ndërkombëtare.
“The Muse-X është një hapësirë ku arti bëhet zë dhe përgjegjësi, duke ndikuar në mënyrën si e perceptojmë realitetin,” u shpreh Gonxhja, duke nënvizuar rolin e artit si faktor reflektimi dhe zhvillimi shoqëror.
Themeluesi i eventit, Luel Muhametaj, e cilësoi Muse-X si një “motor krijues” që ndërthur muzikën, filmin dhe edukimin në një sistem të vetëm bashkëpunimi. Sipas tij, edicioni i këtij viti vjen më ambicioz, me panele diskutimi, workshope, premiera filmash dhe performanca artistike të kuruara.
Pjesëmarrja ndërkombëtare u vlerësua edhe nga drejtori i Institutit Italian të Kulturës në Shqipëri, Alessandro Ruggera, i cili theksoi rëndësinë e kulturës si një sektor strategjik për ekonominë dhe turizmin, si dhe rolin e eventeve të tilla në forcimin e dialogut ndërkulturor.
Nga ana e tij, kryetari i Bashkisë së Hora e Arbëreshëve, Rosario Petta, e konsideroi Muse-X një urë bashkëpunimi që përfshin edhe diasporën shqiptare, ndërsa sekretarja e shtetit për kulturën nga Maqedonia e Veriut, Marija Gjorgova, vlerësoi eventin si një mundësi për krijim të përbashkët dhe lidhje profesionale ndërkombëtare.
Në fokus të diskutimeve ishte edhe zhvillimi i industrisë së filmit. Drejtori i Qendrës Kombëtare të Kinematografisë, Jonid Jorgji, theksoi se sektori po përforcohet përmes reformave ligjore, incentivave fiskale dhe krijimit të strukturave të reja si Albania Film Commission, me synim tërheqjen e produksioneve të huaja dhe promovimin e filmit shqiptar.
Ndërkohë, drejtoresha e Agjencisë së Industrive Kreative, Iris Cani, vuri në dukje rolin e artit si një domosdoshmëri në jetën e përditshme dhe si motor zhvillimi për ekonominë. Sipas saj, evente si Muse-X gjenerojnë të ardhura dhe rrisin imazhin e Shqipërisë si destinacion kulturor dhe turistik.
Me mbi 20 panele, laboratorë krijues, aktivitete të artit urban dhe performanca muzikore, Muse-X ofron një eksperiencë gjithëpërfshirëse që lidh komunitetin me industrinë kreative. Në hapësirën e “Fshatit Kreativ”, vizitorët përjetojnë forma bashkëkohore të artit dhe inovacionit, duke e kthyer eventin në një platformë dinamike ndërveprimi.
Muse-X po afirmohet kështu si një pikë referimi për skenën kulturore shqiptare dhe rajonale, duke forcuar pozicionin e Tiranës si një qendër në rritje e kreativitetit dhe inovacionit artistik.
/Argumentum.al
