Presidentja e shtetit, Vjosa Osmani, e cila me ftesë të kryeministrit Anwar Ibrahim, po qëndron në Malajzi në vizitë zyrtare disa ditore e ka quajtur nder të veçantë pritjen që i është bërë në këtë shtet, që është ndër të parët që e ka njohur pavarësinë e Kosovës më 2008.
“Nder i veçantë që, me ftesë të Kryeministrit Anwar Ibrahim, të mirëpritem për vizitë zyrtare në Malejzi, një ndër shtetet e para që ka njohur Republikën ton”, ka shkruar Osmani që ka shpërndarë fotografi nga pritja që i është bërë sot atje.
Presidenca ka njoftuar se në Kuala Lumpur, presidentja Osmani do të pritet me një ceremoni zyrtare në kompleksin shtetëror, Bunga Raya.
“Gjatë kësaj vizite, Presidentja Osmani do të zhvillojë një takim me Kryeministrin Anwar Ibrahim në Kompleksin qeveritar Perdana Putra në Putrajaya, pas të cilit do të mbahet një konferencë e përbashkët për media. Për nder të Presidentes Osmani, Kryeministri Ibrahim do të organizojë një drekë zyrtare në rezidencën shtetërore Seri Perdana”, bëhet e ditur tutje në njoftimin presidencial.
Në kuadër të kësaj vizite, presidentja Osmani do të dekorojë me Medalje Presidenciale të Meritave Kryeministrin aktual të Malejzisë, Anwar Ibrahim, si dhe ish-kryeministrin Abdullah Ahmad Badawi, në shenjë mirënjohjeje për kontributin e tyre në mbështetje të Kosovës.
Ndërkohë, siç njoftojnë, Osmani në prezencë të korit diplomatik dhe të ftuarve të tjerë, do ta hapë zyrtarisht Ambasadën e Republikës së Kosovës në Kuala Lumpur, që e kanë quajtur një hap të rëndësishëm në forcimin e pranisë diplomatike të Kosovës në rajonin e Azisë Juglindore.
“Presidentja Osmani do të zhvillojë gjithashtu takime me përfaqësues të Dhomës Kombëtare të Tregtisë dhe Investimeve të Malajzisë (NCCIM), si dhe me përfaqësues të sektorëve të rëndësishëm të ekonomisë malajziane, përfshirë prodhimin, teknologjinë dhe turizmin. Me këtë rast, do të diskutohet për mundësitë konkrete të bashkëpunimit ekonomik mes dy vendeve dhe tërheqjes së investimeve në Kosovë”, ka bërë të ditur Presidenca e Kosovës.
