Kryeministri Edi Rama mori pjesë sot në Forumin Botëror “Future Investment Initiative (FII)”, në Romë (Itali).
Në një bashkëbisedim me Eleni Giokos, prezantuese dhe korrespondente e CNN, Rama komentoi protestat kundër investimit në Zvërnec, ndërsa shtoi se qarkullojnë shumë video të rreme.
Fillimisht, Rama u ndal te masat që ka marrë qeveria në mbrojtje të mjedisit, ndërsa kujtoi se falë moratoriumit 10-vjeçar kundër prerjes së pemëve dhe gjuetisë është trefishuar popullata e zogjve në Shqipëri.
Rama theksoi se shumica e popullit shqiptar e do projektin.
“Qyteti ku do të zhvillohet projekti është, në një shumicë shumë të madhe, në pritje të tij dhe nuk ka protesta. Komuniteti ku projekti do të zhvillohet e dëshiron projektin. Pra, ajo që shihni ju nuk është saktësisht ajo që po ndodh”, shtoi ai.
Ndërkohë, sipas tij, në rastin konkret “indinjata digjitale është provokuar më së shumti edhe për shkak të faktit se është Kushner dhe Trump dhe gjithë hijet pas janë më se të mjaftueshme që mund t’i bëjnë shumë njerëz, nga të gjitha anët, nga të gjitha kontinentet e vendet që të hidhen menjëherë”.
“Por sasia e gënjeshtrave, e videove të rreme, sasia e videove të marra nga protestat në vende të ndryshme dhe të shfaqura si video të protestave në Shqipëri, numri i BOT-eve të angazhuar dhe të përfshirë tek armiku, sepse ne kemi një armik të vetëm që është Republika khomeiniste e Iranit”, shtoi Rama.
Kryeministri kujtoi se prej tre vitesh Irani është angazhuar në një sulm kibernetik të pamëshirshëm kundër Shqipërisë.
Sipas Ramës, edhe në këtë situatë Irani është futur gjithashtu në këtë lojë.
“Gjithë kjo masë çmendurie, është diçka që dua ta them, se po gërryen brenda demokracitë tona, po i çon europianët dhe perimetrin europian në disa rrugë që herët a vonë do të shkatërrojnë tërësisht ndjenjën e politikës, ndjenjën e vendimmarrjes, ndjenjën e kompromisit në pjesën tonë të botës”, tha Rama.
Kryeministri theksoi se kjo është koha që demokracitë të reshtin së besuari më, se liria e shpërndarjes është një zgjatim i lirisë së fjalës.
“Liria e shpërndarjes është ajo që çdo regjim, përmes çdo propagande, ka bërë për të hyrë në çdo tru dhe në çdo mendje dhe për të mbjellë gënjeshtrat”, shtoi Rama.
/Argumentum.al
